«Շատ ուրախ ենք, որ Հայաստանում կան լավ մարդիկ, ովքեր տեր են կանգնում ծերերիս». «Դու միայնակ չես» բարեգործական ճաշարանի շահառուներ

Blognews.am-ը գրում է.

Արդեն 2 ամիս է՝  Ավանում գործում է «Դու միայնակ չես» բարեգործական ճաշարանը, որի 40 շահառուներն ամեն օր սնունդ են ստանում «Avenue 37» սրճարանում գոյացած շահույթի և թեյավճարների հաշվին։ Ճաշարանի երկամսյա աշխատանքի արդյունքները որոշեցինք ամփոփել շահառուների հետ։ Այսօր հյուրընկալվեցինք բարեգործական ճաշարանում, որտեղ շահառուների գոհունակ դեմքերը, ոգևորված պատմություններն ամենալավ հավաստիքն են, որ Հայաստանում առաջին բարեգործական սրճարանի բացումը շատ լավ գաղափար էր։

Արմանուշ Սարգսյանը մեկ բառով բնորոշեց ճաշարանը՝ ընտիր է։ «Մենք շատ ուրախ ենք, որ Հայաստանում կանլավ մարդիկ, ովքեր տեր են կանգնում ծերերիս։ Աստված թող օրհնի մեր երիտասարդներին, ունևոր մարդկանց, որ տեր են կանգնում մեզ։ Աստված ասում է՝ կեր, բայց չմոռանաս սովածներին։ Շատ գոհ ու շնորհակալ ենք»,- ասաց նա ու հավելեց, որ ինքն առույգ է. բանջար, ավելուկ է հավաքում, որ տանը ձմռան պաշար ունենան, սակայն դա չի բավականացնում։ Այստեղ համեղ սնվելու հնարավորություն ունեն, ինչի համար շատ շնորհակալ են։

59-ամյա Գյուլնարա Պողոսյանը նշեց, որ ճաշարանում իրեն շատ լավ է զգում. «Շատ լավ, համեղ ճաշեր են պատրաստում, կարգուկանոն է, մաքուր։ Աշխատողներն էլ շատ լավն են, հատկապես՝ մատուցող աղջիկը, շատ բարեհամբույր, լավ մատուցում է»։ Տկն. Գյուլնարան նշեց, որ հաճույքով մասնակցում են ճաշարանում կազմակերպվող միջոցառումներին։ «Ես պարում եմ, երգում, միջոցառումներին շատ լավ ժամանակ ենք անցկացնում։ Ամանորյա համերգի ժամանակ Շուշան Պետրոսյանն էր եկել, իր հետ երգեցինք, պարեցինք։ Շատ լավ անցավ, բոլորիս շատ ուրախացրեց»,- ասաց նա։

Տկն. Ռոզա Իշխանյանը ճաշարանից օգտվում է 2 որդիների հետ։ «Մեզ շատ լավ օգնում են այստեղ։ Մենք շատ վատ վիճակում ենք, 2 տղաներս հաշմադամություն ունեն։ Մի տղաս ինձ հետ գալիս է, մյուսը, երբ լավ է լինում, գալիս է, երբ ոչ՝ իր բաժին սնունդը տուն ենք տանում։ Նրանց համար 19.000 դրամ թոշակ ենք ստանում, դրանով հագուստ չենք կարողանում գնել, ուտելիքը չենք հասցնում, մուծումներն ենք մի կերպ անում։ Շատ շնորհակալ ենք այն ամենի համար, ինչ մեզ տալիս են այստեղ։ Վերջերս սպիտակեղեն նվիրեցին, Նոր տարուն  էլ նվերներ տվեցին։ Ամեն ինչից շատ գոհ ենք»,- ասաց նա։ Ճաշարանում գործում է բուժկետ, որտեղ շաբաթական մի քանի անգամ բժշկական խորհրդատվություն, անհրաժեշտության դեպքում էլ օգնություն են տրամադրում «Դու միայնակ չես» ճաշարանի շահառուներին։ Տկն. Ռոզան էլ ճնշման խնդիր ունի. «Բուժքույրը չափում է ճնշումս, անհրաժեշտության դեպքում դեղորայք է տալիս»։

Այս օրերին սուր շնչառական վարակները չեն շրջանցել նաև ճաշարանի շահառուներին։ Կան մարդիկ, ովքեր չեն կարողանում գալ ճաշարան, նրանց ճաշն ուղարկում են տուն։ Տկն. Լենա Հակոբյանը նշեց, որ ճաշարանում ընկերուհիներ է ձեռք բերել, որոնց ճաշն այս օրերին տուն է տանում. «Հիմա նրանք վատառողջ են, երաշխավորագիր են տվել, իրենց ճաշը տանում եմ իրենց տուն։ Էստեղ իսկապես շատ համեղ, որակով ճաշեր են մատուցում»,- ասաց նա։ Տկն. Լենան նաև հանգստի սենյակի մշտական այցելուն է։ «Շատ եմ սիրում նարդի խաղալ, այստեղ ոչ միայն սնվում ենք, այլ նաև հետաքրքիր ժամանակ ենք անցկացնում, ինչը մեզ համար մեծ բան է»,- ասաց 63-ամյա կինը։

83-ամյա Ամալյա Ցամերյանը նշեց, որ ճաշարանում ամեն բան շատ լավ է. և՛ մաքուր է, և՛ համեղ, և՛ աղջիկներն են լավ պատրաստում ու սպասարկում։ Հանգստի սենյակում էլ տկն. Ամալյան իր համար հետաքրքիր զբաղմունքներ է գտնում։ «Ես ռուսաց լեզվի ուսուցչուհի եմ եղել, գրքեր եմ կարդում, նաև մյուս շահառուների հետ ենք շփվում»,- նշեց նա։

Նախագծի գաղափարի հեղինակ, «Avenue 37» սրճարանի տնօրեն և «Դու միայնակ չես» ՀԿ-ի նախագահ Արամ Անտինյանը, անդրադառնալով գաղափարին, նշեց, որ բարեգործական սրճարան և բարեգործական ճաշարան ստեղծելու գաղափարը համարում է ստացված, քանի որ տեսնում է, որ մարդիկ իսկապես հավանել են այն։

««Ավենյու 37»-ը կարծես լավ, դրական, լուսավոր մարդկանց ակումբ է դարձել, ովքեր, ամեն անգամ գալով սրճարան և այստեղից օգտվելով, ապահովում են, որ վաղը կարիքավորները «Դու միայնակ չես» ճաշարանում սնունդ ու օգնություն ստանան։ Ինչպես գիտեք, «Ավենյու 37»-ն իր ամբողջ շահույթն ուղղում է բարեգործությանը, ու այդ միտքը մարդկանց դրդում է, որ սրճարանի մշտական հաճախորդն ու արդեն ձևավորված դրական մթնոլորտի մի մասը դառնան։ Այսօր սրճարանում այցելուների քանակի ավելացման դրական մեծ տենդենց կա, ինչն ինձ ուրախացնում է։ Մեր նպատակն է ավելի շատ մարդկանց օգնել։ Շատ մեծ հույս ունեմ, որ առաջիկայում սրճարանի շահույթը, ըստ այդմ՝ նաև ճաշարանում շահառուների թիվն աճելու է, և մեր գործընկեր «Առաքելություն Հայաստան» ՀԿ-ի հետ ավելի մասշտաբային օգնություններ ենք տրամադրելու»,- նշեց Արամ Անտինյանը։

                         

Նյութը՝ Ամալյա Հովհաննիսյանի

Լուսանկարները՝ Կարեն Հովհաննիսյանի