Հրդեհները հասել են Գլենդել, հայերը տարհանվել են․ ի՞նչ վիճակ է կրակի ճիրաններում հայտնված Կալիֆորնիայում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ–ի Կալիֆորնիա նահանգում մասշտաբային հրդեհները շարունակում են մոլեգնել, անտառային հրդեհները հասել են անգամ հայաշատ Գլենդել. այս մասին MediaHub-ին փոխանցեցին այնտեղ ապրող մեր հայրենակիցները։ 

Նշենք, որ այս պահին հայտնի է արդեն 5 մահվան դեպքի մասին, որոնք չեն տարհանվել և դարձել են կրակի զոհ, ըստ նախնական տեղեկությունների՝ նրանց մեջ ազգությամբ հայեր չկան։ Լոս Անջելեսում արտակարգ դրություն է հայտարարվել։ 

MediaHub-ի հետ զրույցում մեր հայրենակիցներից մեկը նշեց, որ Փասադենայի հրդեհների պատճառով Գլենդելում բավականին հայեր տարհանվել են իրենց տներից, տարբեր շրջաններում շարունակվում են տարհանել մարդկանց։

«Պարբերաբար ուժեղ քամի է բարձրանում, փոթորիկի նման, որի պատճառով լույս չի լինում, առաջին անհարաժեշտության առարկաները դրել ենք, որ պետք եղած ժամանակ վերցնենք և արագ դուրս գանք տներից»,– նշեց լոսանջելեսաբնակ մեր զրուցակիցը։

Նրանք  նշում են, որ տանից դուրս չեն գալիս, ամեն ինչ փակ է Լոս Անջելեսում՝ դպրոցները, խանութները, կազմակերպություններ, օդն այնքան աղտոտված  է, ծուխն այնքան ուժեղ, որ անգամ վախենում են պատուհանները բացել։ 

«Այրվող թաղամասը մեզանից մոտ 15 րոպե ճանապարհի վրա է գտնվում, ամենաահավոր վիճակը Փասադենայում է։ Գիշերվա փոթորիկն էլ իր հերթին էր շատ դաժան, այն այս պահին դադարել է, ինչը հնարավոր է դարձրել կրակը մարելը, ինչն անհնար էր փոթորիկի դեպքում»,– նշեց մեր զրուցակիցը։

Բոլորը միաբերան նշում են՝ մարդիկ վախեցած են, չգիտեն, թե ինչ է լինելու, ինչ են անելու, տները մեծամասամբ փայտից են, որի պատճառով մի տնից մյուս տուն կրակը բավականին արագ է անցնում։

«Գլենդելի վերևի մասերում կրակն իսկապես հասել է մարդկանց տները, ավելի սարային հատվածների տներին վնաս եղավ, Փասադենան, հիմնականում, կաթվածահար է եղել, վախենում ենք տանից դուրս գալ, դուրս գալուց էլ դիմակներով ենք դուրս գալիս, այժմ հրդեհները դեռ կան, բայց էն ուժգնությամբ չեն»,– նշեց MediaHub-ի զրուցակիցը։

Նշենք, որ երեկ հայտնի դարձավ, որ ամբողջությամբ այրվել է 1980 թվականին հիմնադրված «Սահակ-Մեսրոպ Հայ Քրիստոնյա» դպրոցի շենքը, որը գտնվում է Ալթադենայում։ Հոլիվուդյան մի քանի տասնյակ աստղերի առանձնատներ են այրվել՝ Լեոնարդո Դի Կապրիոյի, Փերիս Հիլթոնի առանձնատները, Gossip Girl-ի աստղ Լեյթոն Միսթերի և նրա ամուսնու՝ դերասան Ադամ Բրոդիի եռահարկ վիլլան, Ջոն Գուդմանի, Մայլս Թելլերի, Բիլ Քրիսթալի տները։

MediaHub-ը շարունակում է հետևել Կալիֆորնիա նահանգում՝ հայաշատ Լոս Անջելես քաղաքում և դրա հարակից շրջաններում հրդեհների հետևանքով տեղի ունեցող զարգացումներին, մենք կապի մեջ ենք մեր հայրենակիցների հետ և պարբերաբար կտեղեկացնենք, թե ինչպիսին է իրավիճակը: