Life.panorama.am-ը զրուցել է «Հայաստանի ձայնը 2» նախագծի մասնակից Վիգեն Ահարոնյանի հետ: Երգիչը, ճիշտ է, էկրաննեին հաճախ չի երեւում, բայց անգործ չէ: Իր խոսքերով՝ շուտով մի հիթային երգ կներկայացնի հեռուստադիտողի դատին.
«Մի շատ հիթային երգ եմ պատրաստում, բայց դեռ վերնագիրը չեմ ասի, քանի որ այն շատ սկանդալային է: Այս երաժշտության հետ կապված բոլոր աշխատանքներով զբաղվում է Արման Էլբերտը, ով իմ երաժշտական պրոդյուսերն է եւ իմ լավ ընկերը: Երգի խոսքերը ես ու Ալվինա Համբարձումյանն ենք գրել: Այն շուտով տեսահոլովակ կունենա: Այս երգի հետ կապված մեծ նպատակներ ունեմ, այն շատ կքննադատեն, բայց եւ շատ կսիրեն: Ես սիրում եմ ռիսկի դիմել, երկրպագուներս էլ ինձ սիրում են հենց այդ տեսակիս համար»,- պատմեց Վիգենը:
«2016-ին կլինի նաեւ ճանաչված երգչուհու հետ զուգերգ, որի մասին դեռեւս ուզում եմ լռել՝ լավ ու հետաքրքիր անակնկալի խոստումով»,- նկատեց Վիգենը՝ ակտիվ աշխատանքի ակնարկով:
««Օպերա Վիվա» խմբի հետ միասին շարունակում ենք նաեւ մեր աշխատանքները՝ ակումբներում հնչեցնելով դասական երաժշտություն: Այս ծրագիրը ինձ մեծ հաճույք է պատճառում: Ծրագրեր կան հետագայում էլ ավելի լայնացնելու մեր աշխատանքները՝ ներկայանալով նաեւ արտերկրում»,- նշեց երիտասրադ երգիչը:
Վիգենը նկատեց, որ ինքն էլ շատ երգիչ-երգչուհիների նման այլ տարբերակ չունենալու պատճառով երգում է ակումբներում, բայց եւ հույս հայտնեց. «Իրականում սա մեր պատկերն է, մեր գրեթե բոլոր երգիչ-երգչուները աշխատում են ակումբներում, որովհետեւ այլ տարբերակ չկա, բայց կարծում եմ, հատակապես մեր նոր սերունդը պայքարող է ու ավելի քան համոզված եմ, որ մեր մեր սերունդը դեռ շատ բարձրունքների կհասնի, որովհետեւ մենք յուրաքանչյուր պատնեշ հաղթահարող ենք, յուրաքանչյուր պատ գլխով ջարդող ենք»:
Վերագնահատելով «Հայաստնի ձայնը 2» նախագծից ունեցած սպասելիքները՝ Վիգենը նկատեց. «Մրցույթից առաջ ես չէի սպասում, որ անգամ «Մենամարտ» փուլը կանցնեմ, բայց շնորհակալ եմ իմ մարզչին՝ Հայկոյին, ով ավելի քան արդար էր իր ընտրության մեջ: Նա ամեն բան դնում էր մի կողմ ու շարժվում էր այդ պահին երգչի ելույթից ելնելով: Նախագիծը ինձ տվեց ճանաչում, որը երիտասարդ երգչի համար շատ կարեւոր է: Միաժամանակ նախագծի օգնությամբ շատ մարդկանց ճանաչեցի՝ ոչ միայն ճանաչեցի նոր մարդկանց, այլեւ վերաճանաչեցի արդեն ծանոթ մարդկանց»:
Այս թեմայի շուրջ Վիգենը հավելեց. «Մինչեւ մրցույթի մասնակցելը կարծում էի, որ շատերին գիտեմ, բայց մրցույթը ինձ հնարավորություն տվեց իսկապես ճիշտ ճանաչելու նրանց: Ես հիասթափություն չեմ ապրել, յուրաքանչյուր հիասթափության պես մի բան ի օգուտ ինձ է աշխատում, ես դրանից ավելի ուժեղ եմ դառնում: Մրցույթի ընթացքում ստացած հետաքրքիր անակնկալները, որոնք ոչ միշտ էին հաճելի, ինձ շատ բան են սովորեցրել եւ ավելի են ուժեղացրել»:
Իսկ վերջում Վիգեն Ահարոնյանը շեշտեց. «Իմ պասիվությունը միանգամից թափ առնելու համար ճիշտ հենարան կլինի: Սա մի փոքր ընդմիջում է, թեպետ այդ բառի հետ ես այնքան էլ համաձայն չեմ, քանի որ ես անընդհատ աշխատում եմ, միայն թե էկրաններին դա այնքան էլ տեսանելի չէ»:
