«Մինչև վերջին վայրկյանը չէի հավատում, որ ես չեմ հաղթողը». Սիմոնը՝ «Դեպի Եվրատեսիլ» մրցույթի ու էմոցիաների մասին
ЛАЙФՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
««Դեպի Եվրատեսիլ»-ը իմ մեջ վառ տպավորություններ ու հիշողություններ է թողել, որովհետև ձեռք եմ բերել լավ ընկերներ: Մարդիկ կային, որոնց հետ այդ ընթացքում եմ ծանոթացել, այդ թվում հաղթողի՝ Պարգի հետ:
Ես նրա մասին լսել էի, բայց ծանոթության առիթ չէր եղել:
«Դեպի Եվրատեսիլ»-ը հնարավորություն տվեց, որ դառնանք շատ լավ ընկերներ»,- Tert.am Life-ի հետ զրույցում նշեց Սիմոնը, ով ներկայացավ «AY PAPAREY BYE» երգով ու ժյուրիի կողմից ստացավ ամենաբարձր գնահատականը:
Երգիչը՝ խոսելով իր ելույթի մասին, նշեց, որ երբ միանում է երաժշտությունը, բեմում ամեն ինչի մասին մոռանում է ու մաքսիմալ տրվում էմոցիաներին:
«Հետո տանն եմ նայել ելույթս և դժգոհ չեմ: Հպարտ եմ, որովհետև մեր և միջազգային ժյուրիի կողմից ստացել եմ ամենաբարձր միավորները: Եթե անկեղծ լինեմ, մինչև վերջին վայրկյանը չէի հավատում, որ ես չեմ հաղթողը:
Բայց, երբ քննարկում եմ ինքս իմ մեջ, հասկանում եմ, որ ես սոցցանցերում ակտիվ չեմ եղել, չեմ ունեցել նկարահանած տեսահոլովակներ:
Մարդիկ ինձ չեն ճանաչել այնպես, ինչպես մյուս մասնակիցներին: Ինձ առաջին անգամ են տեսել և կարծում եմ՝ դա է նպաստել, որ քվեարկության արդյունքներն այդպիսին են եղել: Չնայած, քիչ ձայն չէի հավաքել, ինչի համար հպարտ եմ»,- անկեղծացավ երգիչը:
Սիմոնը մեզ հետ զրույցում պատմեց, որ միշտ պատկերացրել է, որ կհաղթի ու իր հաղթանակը եթերում կնվիրի իր զույգ որդիներին:
«Երբ սառը գլխով դատում ես, ուզում ես գոհացնել քո հանդիսատեսին, մարդկանց, ովքեր քեզ քվեարկել ու հավատեցել են մինչև վերջին վայրկյանը:
Ես ու Պարգը համերգի ամբողջ ընթացքում ետնաբեմում իրար երգեր էինք երգում: Միանշանակ նրա երգն իմ ֆավորտիների մեջ էր, ինչպես նաև՝ Արսենի ու «Altsight» խմբի երգը շատ եմ հավանել:
Մի շատ կարևոր բան եմ ուզում ասել. ես հիմա մեկնաբանություններում շատ եմ կարդում, որ իմ երկրպագուներն ինձ աջակցում են, ասում, որ ես պիտի գնայի, բայց ես ուզում եմ բոլորս միասին համախմբվենք ու աջակցենք Պարգին:
Մեր երկիրը մրցելու է այլ երկրների դեմ: Չեմ ուզում, որ ներքին մրցակցություն լինի: Կուզեմ՝ բոլորս նրան աջակցենք, որ շատ լավ ելույթ ունենա ու մեր երկիրը պատվով ներկայացնի:
Շնորհակալ եմ Հանրային հեռուստաընկերությանը, որովհետև «Դեպի Եվրատեսիլ»-ի շրջանակներում մեր շոուբիզնեսը տեսավ ու ձեռք բերեց վառ արտիսնետրի: Հուսով եմ՝ նրանք առաջիկայում ցույց կտան իրենց նոր գործերն ու մեծ ներդրում կունենան մեր երգարվեստում»,- ամփոփեց երգիչը:
Սիմոնը նաև ընդգծեց, որ Եվրատեսիլ մեկնելու միտքն ու նպատակն իրենից չի բաժանվում:
«Գնամ, մեր երկիրը ներկայացնեմ, և ինչու ոչ՝ վերադառնամ հաղթանակով: Ամեն ինչ դեռ առջևում է»,- եզրափակեց նա:
Հեղինակ՝ Անի Մնացականյան
Հետևեք մեզ՝ այստեղ
