Որքանո՞վ է պատվաբեր անվանի դասախոսին՝ անդամակցել Աննա Հակոբյանի ձևավորած շարժման կոմիտեին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Նիկոլ Փաշինյանի՝ «չզագսավորված» և «չքաղաքականացված» կինը որոշել է իր հորինած «Կրթվելը նորաձև է» անունով արշավին նոր շունչ հաղորդել՝ այն դարձնել շարժում և շարժման կենտրոնական կոմիտե ձևավորել։ Կոմիտեի կազմում յոթ անձ կա, այդ թվում հենց Աննա Հակոբյանը, նաև իրավաբան, ինչ-որ մարքեթինգի խորհրդատու, գյուղատնտես, կառավարման մասնագետ և փիլիսոփայական գիտությունների թեկնածու։

Մեր ուշադրությունը գրավեց հենց վերջին անունը՝ փիլիսոփայական գիտությունների թեկնածու Վահրամ Ավագյան։ Նա իմ դասախոսն է եղել ԵՊՀ փիլիսոփայության ֆակուլտետում, անվանի դասախոս է, ես նրան բավականին լավ եմ ճանաչում, գիտեմ նրա դավանած արժեքներն ու, տեսնելով նրա անունը այս ցանկում, անկեղծորեն զարմացա, նաև մի պահ կասկածեցի՝ իսկապե՞ս ինքն է, թե՞ ուրիշ Վահրամ Ավագյանի մասին է խոսքը։

Ուստի, որոշեցի զանգահարել և անձամբ իրենից ճշտել, նաև նրա մեկնաբանությունը ստանալ այս կապակցությամբ, թե ի՞նչ է կորցրել անվանի դասախոսն ու գիտությունների թեկնածուն Աննա Հակոբյանի նախաձեռնած շարժման մեջ, և որքանո՞վ է դա պատիվ բերելու իրեն։ 

-Պարոն Ավագյան, ես ճի՞շտ հասկացա, որ Դուք Աննա Հակոբյանի նախաձեռնած այդ «Կրթվելը նորաձև է» շարժման կոմիտեի անդամ եք դարձել։

-Այո։ 

-Ի՞նչ նպատակով, ի՞նչ եք անելու այնտեղ, Դո՞ւք եք առաջարկել ընդգրկվել այդ կոմիտեի կազմում, թե՞ իրենք են Ձեզ առաջարկել։

-Ինձ են առաջարկել։ Ես հիմա կարող եմ իմ ընկալումներն ասել։ Նախ, դու մեկ օր չէ, որ ինձ ճանաչում ես, ես քո դասախոսն եմ եղել, քո մասնագիտական, այդ թվում՝ լրագրողական գործունեության մեջ քո կայացման գործում ես էլ իմ վաստակն ու ներդրումն ունեմ, եթե դու դա ընդունում ես, իհարկե․․․

-Ես իմ բոլոր դասախոսների վաստակն ընդունում եմ, որոնք իրենց ներդրումն են ունեցել իմ կայացման գործում, օգնել են, գիտելիք են տվել, կրթել են ինձ, բոլորին շնորհակալ ու երախտապարտ եմ։

-Շատ լավ է, ու գիտես նաև, որ կրթության բնագավառում որոշակի աշխատանքային փորձ ունեմ, նաև երկար տարիներ արտադրության բնագավառում եմ աշխատում, և տեսնում եմ անհրաժեշտություն՝ հստակորեն մոտիվացնելու մարդկանց, կրթությանը, ինքնակրթությանն ավելի մեծ ժամանակ հատկացնելու, այդ թվում՝ արտադրական ոլորտում գիտելիքներ ձեռք բերելու, արտադրության հմտություններ ձեռք բերելու, և էս տեսանկյունից՝ հասարակական նախաձեռնություններին պատրաստ եմ աջակցել իմ փորձով, ունակություններով։

-Իսկ ի՞նչ կապ ունի կրթվելու և այդ ամենի հետ Աննա Հակոբյանը։

-Փաստացի կա նախաձեռնություն, հասարակական շարժում, որը փաստացի գործունեություն է իրականացնում, և եթե որևէ շարժման նպատակն այն է, որ մարդիկ իրենց ներկային, ապագային նայեն այն տեսանկյունից, որ վաղն ավելի կրթված լինեն, վաղն ավելի հմուտ լինեն, ավելի զարգացած, եթե ապագան վերաիմաստավորվի յուրաքանչյուրի համար, այդ տեսանկյունից ես միայն կաջակցեմ։ Քաղաքական բովանդակություն շարժումը չունի՝ այս պահին իմ ունեցած տեղեկատվությամբ, իմ մասնակցությունը որևէ քաղաքական բովանդակություն, առավելևս՝ կուսակցական բովանդակություն չունի։

-Ի դեպ, կարծիքներ կան մամուլում, որ հնարավոր է՝ սրանով Աննա Հակոբյանը քաղաքականություն մտնելու, իր համար նոր ուժ ձևավորելու, կուսակցություն բացելու հիմքեր է գցում։

-Ես այդպիսի տեղեկություններ չունեմ, կրկնում եմ՝ էն, ինչին ես մասնակցում եմ, իմ մասնակցության բնույթն էլ, շարժման բնույթն էլ ապաքաղաքական է, ապակուսակցական է և միտված է նրան, որ մարդիկ իրենց ներկային, իրենց ապագային նայեն վաղն ավելի շատ բան իմանալու, ավելի շատ բան կարողանալու տեսանկյունից։ Կարծում եմ՝ նման շարժումները միայն դրական առաքելություն ունեն՝ անկախ նրանից, թե ինչ քաղաքական համատեքստում կարող են ընկալվել։

-Կրթվելու հետ կապված շարժումներն, իհարկե, դրական են, բայց Աննա Հակոբյանի հետ կապված արձագանքները, նրա ակտիվությունը բացասական են ընկալվում հանրության կողմից։ Կարծում եմ՝ Դուք ծանոթ եք այդ արձագանքներին, թե ինչպես են քննադատում նրան, երբեմն ծաղրում, քամահրանքով արտահայտվում նրա ու նրա նախաձեռնությունների մասին։
 
-Նման տեղեկատվական հոսքերի չեմ հետևել, գիտես իմ գործի բնույթը՝ ես գիտության մարդ եմ, արտադրության մարդ եմ, նման տեղեկատվական հոսքերին հետևելու ժամանակ երևի չեմ էլ ունեցել, այդուհանդերձ․․․

-Բայց Փաշինյանին ու նրա տիկնոջը վերաբերող հանրային արձագանքին, ենթադրում եմ, տեղյակ եք, ի վերջո, Դուք էլ հանրային մարդ եք, հանրային գործունեություն եք ծավալում ու պիտի որ իմանաք՝ ով է Նիկոլ Փաշինյանը, ինչեր է արել, ով է նրա կինը։

-Իմ հանրային գործունեությունը երբեք քաղաքական ու կուսակցական բովանդակություն չի ունեցել, այսօր էլ չունի։

-Կարծում եք՝ պատվաբե՞ր է Աննա Հակոբյանի նախաձեռնություններին մաս կազմել, նրա ձևավորած շարժման կոմիտեի անդամ լինել, չէ՞ որ Ձեզ էլ կարող են քննադատել դրա համար։

-Ես վստահ եմ, որ կրթությունը հանրայնացնող, կրթվելու ձգտում առաջացնող հասարակական շարժմանն աջակցելը, մասնակցելը պատվաբեր է։

-Իսկ Աննա Հակոբյանի նախաձեռնության շրջանակներում պատվաբե՞ր է։

-Ինձ համար նախաձեռնության շրջանակներն էնքան էական չեն, ինչքան գործունեության բովանդակությունն ու նպատակը։

-Այսինքն՝ էակա՞ն չէ, թե ով է նախաձեռնողը։

-Կրկնում եմ՝ ինձ համար էական է գործունեության բովանդակությունն ու նպատակը, որովհետև մեկնաբանություններն ու պիտակավորումները տարբեր կարող են լինել, փաստացի արդյունքը, փաստացի ներդրված բովանդակությունը՝ գործունեության մեջ, ինձ համար ամենաէականն է, ես նույնիսկ չեմ էլ հետաքրքրվի, թե այս նախաձեռնության ակունքներում քաղաքական ինչ ընկալումներ կան, եթե այդ գործունեության բովանդակությունը կրթությունն է, կրթվելու մոտիվացիա առաջացնելը, ես կարծում եմ՝ ինձ հետ, որպես Ձեր դասախոսի, Ձեր շփումները միայն հավաստում են իմ ասածը, Դուք ինձ հետ նաև այդ աշխատանքն եք անցել, Ձեր մասնագիտական կայացման մեջ իմ մասնակցությունը վերհիշելով, գնահատելով՝ կարող եք հենց Դուք էլ հավաստել, որ այդ արժեքներն ինձ համար միշտ գերակա են եղել, և, այո, եթե որևէ հասարակական շարժում միտված է նրան, որ կրթության լրացուցիչ մոտիվացիա առաջացնի, ապա այդ շարժումը կարող է վստահ լինել, որ ես իմ ուժերի ներածի չափով աջակցելու եմ։

-Իսկ ի՞նչ եք անելու այդ շարժման կոմիտեի կազմում, Ձեր գործառույթը ո՞րն է լինելու, դասախոսություննե՞ր եք կարդալու հանդիպումներին։

-Իմ մասնակցությունն առավելապես տեսնում, ընկալում եմ ռազմավարության, մեթոդիկայի մշակման հարցերում։

Վահե Մակարյան

 Հետևեք մեզ՝ այստեղ