«Շատ բուռն ընդունվեց, ինչի մասին վկայում են գրեթե ամբողջովին սպառված տոմսերը». Տաթևիկ Մելքոնյանը՝ պրեմիերայի մասին
КУЛЬТУРАՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
«Ներկայացման գործողությունները տեղի են ունենում երկու զուգահեռ իրականությունում՝ անցյալում և ներկայում: Մի իրականությունում երիտասարդ գրող Պիեռը ողջ է, մյուսում՝ մահացած: Աննան՝ նրա կինը, կասկածում է ամուսնուն դավաճանության մեջ, ինչի մասին Պիեռի մահվանից հետո զրուցում է թե՛ ընտանիքի մտերիմ ընկեր՝ Դանիելի հետ, թե՛ դերասանուհի Լոռա Դամի հետ, ում հետ, իր ենթադրությամբ, դավաճանել է ամուսինը:
Հեղինակն այնպես է խճճել իրադարձությունները, որ դժվար է հասկանալ՝ որն է իրականությունը, որը՝ մտացածինը»,- Tert.am Life-ի հետ զրույցում՝ խոսելով իր նոր բեմադրության մասին, պատմեց բեմադրիչ Տաթևիկ Մելքոնյանը:
Այս պատմությունը սիրել չկարողանալու մասին է:
«Մարդիկ ցավ են պատճառում իրենց մտերիմներին, անկախ նրանից թաքցնում են իրականությունը, թե ոչ»,- նշեց բեմադրիչը:
Ներկայացման հերոսներին մարմնավորում են Տաթև Հովակիմյանը, Հարություն Հովհաննիսյանը, Թելման Խաչատրյանը, Վալենտինա Դավիթավյանը:
Տաթևիկ Մելքնյանի խոսքով՝ թեման միշտ արդիական է, քանի որ կին և տղամարդ հարաբերությունների մասին է:
«Այս պիեսը ընտրեցի, քանի որ կարդալուց հետո այն ինձ հուզեց թե՛ իր թեմայով, թե՛ կառուցվածքով: Ֆ. Զելլերի պիեսները միանշանակ չեն, հենց դա է ինձ գրավում: Ներկայացումը բուռն ու ջերմ արձագանք ունեցավ հանդիսատեսի շրջանում, ինչի մասին վկայում են գրեթե ամբողջովին սպառված տոմսերը»,- անկեղծացավ Տաթևիկ Մելքոնյանը:
«Եթե դու մեռնեիր» ներկայացման առաջնախաղը կայացել է փետրվարի 22-ին՝ Մհեր Մկրտչյանի անվան արտիստական թատրոնում։ Հաջորդ ներկայացումը կկայանա մարտի 1-ին:
Հեղինակ՝ Անի Մնացականյան
Հետևեք մեզ՝ այստեղ
