Մի խումբ հայեր՝ դժոխքում. հերթական սառը ցնցուղն Արա Երնջակյանից. պրեմիերա՝ Կամերային թատրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Կամերային թատրոնի հերթական ֆանտաստիկ ներկայացումն ենք հանձնում հանդիսատեսի դատին»,- Tert.am Life-ի հետ զրույցում՝ պրեմիերայից առաջ անկեղծացավ դերասան Սենիկ Բարսեղյանն, ով մարմավորում է գլխավոր հերոսներից մեկին:

Երեկ երեկոյան՝ Կամերային թատրոնում կայացավ Արա Երնջակյանի հեղինակած «Միսս Դժոխք անաստվածային կատակերգություն» ներկայացման պրեմիերան՝ նոր դերասանական կազմով՝ Արշալույս Հարությունյանի բեմադրությամբ:

Դերասանական կազմում ընդգրկված են Սենիկ Բարսեղյանը, Էվա Խաչատրյանը, Վիկտորյա Սահակյանը, Ավետ Զոհրաբյանը, Էրմինա Զախարովան, Դավիթ Աբրահամյանը, Նարեկ Ալեքսանյանը:

Դերասան Սենիկ Բարսեղյանի խոսքով՝ Արա Երնջակյանի պիեսներին հերթական անգամ անդրադառնալը հրաշալի իարադարձություն է յուրաքանչյուր դերասանի կյանքում:

«Բախտ եմ ունեցել ներկայացման մեջ խաղալ նաև առաջին կազմով, երբ դեռ նոր էի ընդունվել թատրոն: Այդ ժամանակ խաղում էի աշխատակազմի ղեկավար, իսկ հիմա մարմնավորում եմ սատանայի կերպարը»,- մեզ հետ զրույցում ասաց դերասանն ու խոստովանեց, որ ինքն այն հազվադեպ դերասաններից է, ով պրեմիերայից առաջ չի հուզվում:

«Դա ավելորդ ռեսուրս է վատնում դերասանից: Ես չեմ անհանգստանում մի պարզ պատճառով, որովհետև, երբ բեմի վրա հստակ գիտես անելիքդ ու պիտի փոխհարաբերվես հանդիսատեսի հետ, ով քեզ հետ հավասար գործող անձ է դառնում, անհանգստանալու կարիք չի լինում»,- Tert.am Life-ի հետ զրույցում նկատեց Սենիկ Բարսեղյանը:

Ըստ նրա՝ սատանայի կերպարը հավաքական կերպար է: Ներկայացումը հոռետեսական կատակերգություն է, որը պատմում է հայ իրականության մասին, հայի տեսակի ու բնավորության մասին:

«Հանդիսատեսը տեսնելու է հերթական հետաքրքիր ու բովանդակային ներկայացումը, որը կպատմի մեր հոգեբանության մասին: Յուրաքանչյուրը կգտնի իրեն այստեղ»,- վստահ է դերասանը:

Ներկայացման մեջ  իրադարձությունները տեղի են ունենում դժոխքում:

Սուր ու ինտելեկտուալ երանգներով, ակնակներով ու վառ գույներով...

«Աբսուրդը կայանում է նրանում, որ մի խումբ հայեր՝ իրականությունից կտրված, հայտնվում են դժոխքում, մարդիկ, ովքեր կազմում են դժոխքի օրվա կարգացուցակը: Ոչ մի հորինած ու չափազանցրած կերպար չկա»,- պատմեց Սենիկ Բարսեղյանն ու հորդորեց բաց չթողնել ներկայացումը:

Ռեժիսոր Արշալույս Հարությունյանի խոսքով՝ Երնջակյանի թեմաները ցավեցնելու աստիճան արդիական են:

«Ովքեր ծանոթ են մեր ներկայացումներին, կհասկանան ու կհաստատեն, որ կարծես հայ իրականության տարեգրությունը լինի:

Այնպիսի դրվագներ կան, որ 10 տարի առաջ գրված պիեսներն այսօր էլ շատ ժամանակակից են: Այն կանխատեսումները, որ նա անում է իր գրվածքներում, իրականություն է դառնում:

Մենք ներկայացման ամբողջ ընթացում ծիծաղում ենք մեր մենթալիտետի, մտածելակերպի, մեր ազգային տեսակի ու բովանդակության վրա, թե ինչ տեսակ ժողովուրդ ենք, իսկ վերջում այնպիսի սառը ցնցուղի տակ է պահում դրամատուրգորեն, որ հենց դրա համար էլ կոչվում է հոռետեսական կատակերգություն:

Այս ներկայացումն այնքա՜ն մեր մասին է, այնքա՜ն մեր ձևի ու բովանդակության, մեր թերությունների, միամտության, մեր խեղճության ու ագրեսիվության... վերնագիրն ամեն ինչ ասում է, մնացածը թողնենք, թող հանդիսատեսը տեսնի»- մեզ հետ զրույցում ասաց Արշալույս Հարությունյանը:

Ռեժիսորը վստահ է՝ այս ներկայացումը շատ կոնկրետ իր տեղը կգտնի խաղացանկում:

«Շատ հետաքրքիր էմոցիաներ կան, շատ տաղանդավոր դերասաններ են խաղում, նոր, թարմ ուժեր, վառվռուն աչքեր ու կրակոտ դեմքեր են ներգրավված, ինչը ներկայացմանը առանձնահատուկ հմայք է հաղորդում:

Պիեսը գրվել է 10 տարի առաջ, բայց այն հենց այսօրվա, այս պահի մասին է»,- ամփոփեց Արշալույս Հարւթյունյանը՝ հանդիսատեսին կոչ անելով գալ թատրոն:

Լուսանկարները՝  Հակոբ Քալաշյանի

 Հետևեք մեզ՝ այստեղ