Ադրբեջանական ԶԼՄ-ները ապատեղեկատվություն են տարածում. Թուրքիայի նախագահի վարչակազմ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Թուրքիայի նախագահի վարչակազմը հայտարարել է, որ ադրբեջանական լրատվամիջոցները ապատեղեկատվություն են տարածում Մարգարա սահմանային անցակետի բացման և այնտեղով Սիրիա մարդասիրական բեռի ուղարկման մասին:

Թուրքիայի նախագահի աշխատակազմի կապի վարչության՝ ապատեղեկատվության դեմ պայքարի կենտրոնը հայտարարություն է տարածել, որի համաձայն՝ ադրբեջանական ԶԼՄ-ներում լայնորեն տարածված տեղեկությունն առ այն, թե իբր Ադրբեջանը պաշտոնապես տեղեկացված չի եղել Սիրիա մարդասիրական օգնություն առաքելու մասին, չի համապատասխանում իրականությանը։

Հայտարարության մեջ նշվում է, որ Թուրքիայում Ադրբեջանի դեսպան Ռաշադ Մամեդովը և Ադրբեջանի նախագահի օգնական Հիքմեթ Հաջիևը տեղեկացվել են Սիրիա մարդասիրական օգնություն Հայաստանից ուղարկելու մասին։

«2025 թվականի փետրվարի 24-ին Անկարայում Ադրբեջանի դեսպան Ռաշադ Մամեդովին դեսպան Սերդար Քըլըչը ուղղակիորեն տեղեկացրել է մեր երկրի տարածքով Սիրիա մարդասիրական օգնություն առաքելու Հայաստանի ցանկության մասին, 2025 թվականի փետրվարի 26-ին Ադրբեջանի նախագահի օգնական Հիքմեթ Հաջիևը նույնպես տեղեկացվել է այդ մասին մեր երկիր կատարած այցի ժամանակ»,- ասվում է հաղորդագրության մեջ։

Բացի դրանից, ընդգծվում է, որ այդ սահմանային անցակետը վերջին անգամ օգտագործվել է 2023 թվականին Հայաստանից Թուրքիա մարդասիրական օգնություն առաքելու համար, որն ուղարկվել էր փետրվարի 6-ի երկրաշարժից հետո։

Նշվում է նաև, որ սահմանային անցակետն օգտագործվել է հատուկ ներկայացուցիչների 5-րդ հանդիպման, ինչպես նաև սահմանային հանձնաժողովների նիստերի շրջանակներում հետիոտնային անցումների համար։

Ավելի վաղ հայտնել էինք, որ Հայաստանի անունից հումանիտար օգնությունը Սիրիա տեղափոխող բեռնատարները մարտի 21-ի առավոտյան ուղևորվել են հայ-թուրքական սահմանի Մարգարայի անցակետ։

 Հետևեք մեզ՝ այստեղ