«Մուլտֆիլմի հերոսուհուց արտաքնապես շատ տարբեր եմ». «Գեղեցկուհին և հրեշը» հայտնի մուլտֆիլմի հերոսները՝ Խամաճիկների թատրոնում՝ Լիլի Էլբակյանի մեկնաբանությամբ
КУЛЬТУРАՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
«Ես ունեմ շարք դիսնեյյան տարբեր ներկայացումների և «Գեղեցկուհին և հրեշը» եկավ լրացնելու այդ շարքը: Որոշեցինք այն իրականացնել հենց Խամաճիկների թատրոնում, քանի որ հերոսներն ու տիկնիկները չափազանց համահունչ էին մեր թատրոնի ձևաչափին»,- Tert.am Life-ի հետ զրույցում պատմեց ռեժիսոր, դերասանուհի Լիլի Էլբակյանը:
Գլխավոր հերոսներին մարմնավորում են Էմմի Սարդարյանը, Համո Ադիյանը, Ռադիկ Ղուկասյանը, Սենիկ Գոմցյանը:
Գեղեցկուհուն՝ Բելլին մարմնավորող Էմմի Սարդարյանը Tert.am Life-ի հետ զրույցում նշեց, որ Գեղեցկուհին Դիսնեյի հերոսուհիներից իր ամենասիրելի կերպարն է, քանի որ շատ է սիրում գրքեր կարդալ և չի վախենում տարբերվելուց:
«Կերպարն ինձնից շատ տարբեր է, բայց նմանություններ ևս կան: Սիրում եմ կերպարիս անվախ բնավորության գիծն ու անձնազոհության գնալու որոշումը՝ իր հորը փրկելու համար:
Մուլտֆիլմի հերոսուհուց արտաքնապես շատ տարբեր եմ և՛ սանրվածքի, և՛ զգեստների առումով, բայց բնավորությունը պահպանել ենք»,- անկեղծացավ Էմմի Սարդարյանը:
Բեմադրության հեղինակ Լիլի Էլբակյանը նշեց՝ ներկայացումը միտումնավոր է մուլտֆիլմի նման, քանի որ երեխաներն արդեն ճանաչում ու սիրում են այն:
«Բացի այդ՝ այլ գրական նյութ չկար օգտվելու, օգտվել ենք մուլտից ու փորձել ենք ճանաչելի դարձնել հերսոներին: Բայց տիկնիկները դիսնեյի պատկերներով չեն պատրաստված, մենք հատուկ նկարիչ ենք հրավիրել: Հատուկ ներկայացման համար արվել են էսքիզներ, կարվել են զգեստներ՝ մեր մեկնաբանությամբ»,- պատմեց ռեժիսորը:
Լիլի Էլբակյանը նշեց, որ միայն Գաստոնի դերակատարին է ընտրել արտաքին նմանությամբ:
«Ռադիկ Ղուկասյանը շատ լավ ընդգրկվեց մեր թատրոնի դերասանակազմ, մտերմացանք ու հրաշալի համագործակցություն ստացվեց»,- ասաց ռեժիսորը:
Դերասան Համո Ադիյանը Tert.am Life-ի հետ զրույցում նշեց, որ սիրով է ընդունել ներկայացման առաջարկը: Նրա խոսքով՝ միշտ պատասխանատվությունը մեծ է, մանավանդ, երբ հանդիսատեսը երեխաներն են:
«Մարմնավորում եմ Գեղեցկուհու հայրիկին՝ Մորիսին: Մի քիչ ցնդած, հետաքրքիր բնավորությամբ մարդ է, ով պատրաստվում է մասնակցել գյուտարարների մրցույթին»,- նշեց դերասանը:
Համո Ադիյանն անկեղծացավ՝ մուլտֆիլմը վերջին անգամ նայել է 12 տարի առաջ, շատ դրվագներ լավ չի հիշում ու ավելի շատ կենտրոնացել է ռեժիսորի տված խնդիրների վրա:
Գեղեցկությունը թաքնված է ներսում, այն, ինչ հաճախ թվում է գեղեցիկ, դա դեռ այդպես չէ. սա է «Գեղեցկուհին և հրեշը» ներկայացման գլխավոր ասելիքը՝ Լիլի Էլբակյանի մեկնաբանությամբ:
«Արքայազնը, որ հրեշ է դառնում իր եսասիրության պատճառով, փոխվում է աղջկա սիրուց: Սերը կարող է փոխել ամեն ինչ:
Հենց այս միտքն էլ փորձել ենք շեշտադրել ու տեղ հասցնել մեր փոքրիկ հանդիսատեսին»,- ասաց ռեժիսորը:
Նրա խոսքով՝ մեծ թիմ է աշխատել ներկայացման վրա: Ամեն ինչ արել են, որ Խամաճիկների թատրոնի փոքրիկ բեմում հանդիսատեսը հրաշքի ականատես լինի:
Հեղինակ՝ Անի Մնացականյան
Հետևեք մեզ՝ այստեղ
