Միջազգային գիտաժողով՝ Պլեխանովի անվան համալսարանում

2025թ. մարտի 31-ից ապրիլի 1-ը Գ․Վ․ Պլեխանովի անվան Ռուսաստանի տնտեսագիտական համալսարանի Երևանյան մասնաճյուղում տեղի ունեցավ երկօրյա միջազգային գիտաժողով՝ «Գիտության, հասարակության և կրթության զարգացման ժամանակակից միտումները» խորագրով:

Գիտաժողովը կազմակերպվել էր Գ. Վ. Պլեխանովի անվան ՌՏՀ-ի Երևանյան մասնաճյուղի՝ Տնտեսագիտության ամբիոնի, ՀՀ ԳԱԱ Մ. Քոթանյանի անվան տնտեսագիտության ինստիտուտի և Ռուսաստանի ժողովուրդների բարեկամության համալսարանի հետ համատեղ:

Արդեն առաջին օրն այն դարձավ գիտնականների, փորձագետների և ուսուցիչների միջև մտքերի փոխանակման հարթակ։

«Գիտությունը, հասարակությունը և կրթությունն առանձին-առանձին գոյություն չունեն, դրանք սերտորեն կապված են և անմիջականորեն ազդում են միմյանց վրա: Նման գիտաժողովները ոչ միայն քննարկումներ են, այլ իրական լուծումներ գտնելու հնարավորություն, որոնք կբերեն շոշափելի արդյունքների», - ընդգծեց մասնաճյուղի տնօրեն Թամարա Վարդանյանը:

«Ժամանակակից աշխարհը արագորեն փոխվում է գիտատեխնիկական առաջընթացի, գլոբալիզացիայի և թվայնացման ազդեցության տակ: Այս գործընթացներն ընդգրկում են կյանքի բոլոր ոլորտները, ներառյալ գիտությունը, հասարակությունը և կրթությունը: Կարևոր է ոչ միայն հասկանալ այդ փոփոխությունները, այլև նորարարական լուծումներ առաջարկել դրանց հարմարվելու և հասարակական շահերի օգտին կիրառելու համար»,- նշեց ամբիոնի վարիչ Բելա Գաբրիելյանը:

Միջազգային բանախոսների թվում էին Սվետլանա Ռատները՝ ESG ներդրումների մասին զեկույցով և Սվետլանա Բալաշովան (РУДН), ով խոսեց թվային գրագիտության մասին՝ որպես սոցիալ-տնտեսական զարգացման ցուցանիշ:

Կոնֆերանսի մասնակիցները քննարկեցին նաև մտավոր կապիտալի վերափոխումը, էլեկտրոնային առևտրի վարքային միտումները, հուզական ինտելեկտի դերը, փափուկ հմտությունների զարգացման մենթորական ծրագրերը և OSINT մեթոդների կիրառումը հետազոտություններում:

Գիտաժողովի 2-րդ օրն ընթացավ ուսանողական սեկտորի աշխատանքը, ինչին ներկա էին նաև ավագ սերնդի գիտնականները։ Տեղի ունեցավ մտքերի աշխույժ փոխանակում և որոշվեց շարունակել համագործակցությունն այս արդյունավետ ձևաչափով։