Դա քրեորեն պատժելի արարք է ու մենք դիմելու ենք համապատասխան մարմիններին. Պրոդյուսերը պարզաբանում է «Աջ, թե ձախ» հաղորդման շուրջ ծավալվող խոսակցությունները

Aysor.am-ը գրում է.

Արդեն մի քանի օր է՝ համացանցը հեղեղված է Արմենիա հեռուստաընկերությամբ հեռարձակվող «Աջ, թե ձախ» հաղորդման շուրջ ծավալվող խոսակցություններով: Այդ խոսակցությունների նախապայման հանդիսացավ օրեր առաջ YouTube-ում հայտնված վերոնշյալ հաղորդման չմոնտաժված ու չհրապարակված տարբերակը՝ Անատի Սաքանյանի մասնակցությամբ: Անմիջապես պարզ է դառնում, որ ի սկզբանե հաղորդման հաղորդավարուհի էր ընտրվել ոչ թե երգչուհի Սյուզի Շահբազյանը, այլ Անատի Սաքանյանը:

Aysor.am-ը հաղորդման պրոդյուսեր Արկադի Շուշանյանից նախ հետաքրքրվեց, թե ինչո՞վ է պայմանավորված եղել Անատի Սաքանյանի փոխարինումը Սյուզի Շահբազյանով: Ի դեպ, դերասանուհին հարցազրույցներից մեկում վստահեցրել է, թե առաջին եթերաշրջանի մյուս նկարահանումներին չի մասնակցել զուտ այն պատճառով, որ արտերկրում է եղել: «Եթե նա ասել է, որ իր մասնակցությամբ նկարահանումները չեն շարունակվել իր՝ երկրից բացակայելու պատճառով, ապա բոլորս պարտավոր ենք հավատալ ու հարգել նրա տեսակետը»,-առանց ավելորդ մեկնաբանությունների նշեց պրոդյուսերը:

Դերասանուհին նաև շեշտել էր, որ «Աջ, թե ձախ» ծրագրի անձնակազմի կողմից հրավերը մինչ օրս ուժի մեջ է ու եթե ժամանակը ների և կարողանա համատեղել, ապա երկրորդ եթերաշրջանում հնարավոր է հաղորդավարուհին ինքը լինի: «Ցանկացած մարդ ունի ազատ խոսքի, ցանկության իրավունք: Օրինակ, ես ցանկանում եմ դառնալ ԱՄՆ-ի նախագահ, բայց դա միայն իմ ցանկությունն է ու ես իրավունք ունեմ այդ մասին բարձրաձայնել… Եթե այս պահին նույնիկ մենք՝ ստեղծագործական կազմը չի որոշել, թե ովքեր են երկրորդ եթերաշրջանում լինելու հաղորդավարները, ապա ուրիշներն ինչպե՞ս կարող են այդ մասին իմանալ»,-զարմանք հայտնեց մեր զրուցակիցը:

Ինչ վերաբերում է հիմնական մեղավորին՝ Անատի Սաքանյանի մասնակցությամբ տարածված հաղորդման չմոնտաժված տարբերակի տարածողին, Ա. Շուշանյանը պատասխանեց. «Այստեղ խախտվել են մեր հեղինակային իրավունքները, ոչ ոք իրավունք չուներ ոտնահարել այն: Ես դա, մեղմ ասած, անշնորքություն եմ համարում: Ավելին, չէր կարելի այն տարածել ու սխալ ինֆորմացիա ներկայացնել: Դա քրեորեն պատժելի արարք է ու մենք դիմելու ենք համապատասխան մարմիններին, ովքեր օրենքի շրջանակներում հետամուտ կլինեն ու կգտնեն: Թեև այդ նյութը մեր պահոցում էր մնալու՝ որպես մեր հաղորդման առաջին նմուշ, բայց միևնույն է, դրա վրա մարդիկ են աշխատել, չարչարվել, իսկ որոշ մարդիկ կամ մարդ իրեն իրավունք է վերապահում այն հանրայնացնել»:

Թե ով կարող է լինել տեսանյութի տարածողը՝ կասկածներ չկան: «Ես ինձ իրավունք չեմ վերապահում կասկածել այս կամ այն մարդուն: Վստահում եմ բոլորին, շատ լավատես ու բարին ցանկացող մարդ եմ: Եվ հետո, գործի մարդիկ ենք ու նախընտրում ենք ավելի շատ գործել, քան խոսել: Թիմի ներսում, համախոհների շրջանակում երբևիցե չի եղել մեկը, ով այս կամ այն արարքով կասկածի տեղիք տա: Շատ լավ աշխատանքային թիմ, հաղորդավարներ ունենք, ովքեր առաջին ենթերաշրջանում հրաշալի ներկայացան: Չգիտեմ՝ ում կողմից, բայց հուսանք, որ այս ամենը թյուրիմացաբար է եղել»:

Ինչևէ, հաղորդման պատասխանատուները մեծահոգություն կցուցաբերեն և կներեն մեղավորին, եթե նա հայտնվի ու խոստովանի իր մեղքը: 

Որոշակի խոսակցություններ են շրջանառվում նաև, որ հնարավոր է՝ որոշ հանգամանքներից ելնելով, հաղորդաշարն ընդհանրապես փակվի: «Ես չգիտեմ, թե որտեղի՞ց է նման ինֆորմացիա տարածվել: Պաշտոնապես հայտարարում եմ, որ նման բան չկա, հաղորդումը փակվելու միտում չունի: Ընդհակառակը, գնալով ավելի զարգացնում, հետաքրքիր ենք դարձնում: Կարծում եմ, շուտով՝ նոր եթերաշրջանում, մեր հեռուստադիտողը ավելի գունեղ ու գեղեցիկ, դրական հաղորդաշար կտեսնի»,-վստահեցրեց պրոդյուսերը:

Արդյոք նոր եթերաշրջանում Սյուզի Շահբազյանն ու Դավիթ Թադևոսյանը կշարունակեն հաղորդավարի կարգավիճակում հանդես գալ հարցին Aysor.am-ի զրուցակիցը պատասխանեց. «Հաղորդման ձևաչափը հնարավորություն է տալիս բավականին ճկուն մեթոդներով աշխատել՝ հաղորդավար փոխել, հյուրեր ունենալ: Առհասարակ, մենք միշտ կարևորում ենք հեռուստադիտողի կարծիքը, հաշվի ենք նստում բոլոր առողջ քննադատությունների, կառուցողական մտքերի հետ, որպեսզի հաղորդումը ավելի սիրված և ընկալելի լինի: Ինչ վերաբերում է հաղորդավարների փոփոխությանը, ապա դեռևս վերջնական որոշում չենք կայացրել: Հնարավոր է, հաղորդավարները չփոխվեն, թեպետ այս պահին երկու տարբերակն էլ քննարկվում են: Միայն մեկ բան է պարզ. ինչ էլ անենք՝ անելու ենք ի շահ հաղորդման, առանց ամբիցիաների ու քմահաճույքյերի: Սա բավականին սիրված, վարկանիշային հաղորդաշար է ու չենք պատրաստվում այն փչացնել»: 

Քանի որ հաղորդումը ոչ թե Արմենիա հեռուստաընկերության, այլ «Շելբի» ընկերության արտադրանքն է, հետաքրքրվեցինք՝ հնարավո՞ր է, որ այն այս անգամ վստահվի մեկ այլ հեռուստաընկերության: «Ո՛չ, հեռուստաընկերության փոփոխություն հաստատ չի լինելու»,-եզրափակեց Արկադի Շուշանյանը: