Պատրիկ Ֆիորիի հայկական արմատներն ու ընտանիքը. ինչու նա փոխեց իր ազգանունը. լուսանկարներ

Wnews.am-ը գրում է.

Wnews.am-ը շարունակում է ներկայացնել ծագումով հայ սիրված եւ հեղինակավոր անձանց։ Այս անգամ ներկայացնում ենք աշխարհահռչակ երգիչ Պատրիկ Ֆիորիի կյանքն ու հայկական արմատները։

Ֆրանսիայի ամենահայտնի դերասաններից մեկը` Պատրիկ Ֆիորին, ամեն երեկո դուդուկ է նվագում եւ երբեք չի մոռանում իր հայկական ծագման մասին։ Ամուր արմատները նրան հավերժ կապել են Հայաստանի հետ։

Պատրիկը մեծ հաջողության է հասել  «Փարիզի աստվածամոր տաճարը» ներկայացումից հետո, որտեղ մարմնավորում էր Ֆեբի դերը։

Նա ծնվել է 1969թ. սեպտեմբերի  23-ին Մարսելում, մեծացել Կորսիկա կղզում։ Նրա հայրն ազգությամբ հայ  Ժակ Շուշանյանն է, մայրը` կորսիկուհի Մարիա-Անտուանետ Ֆիորին է։ Ծնողները  դաստիարակել են իրենց հինգ զավակներին։

Ֆիորին նշում է, որ կորսիկանցիները ուժեղ, ուղիղ եւ արդար մարդիկ են եւ նման են հայերին, ուստի, ըստ նրա, զարմանալի չէ, որ իր ծնողները սիրել են միմյանց։

Ֆիորին պատմում է, որ կարիերայի սկզբում ընտանիքը փողի կարիք ուներ եւ ծնողները շատ էին աշխատում, որպեսզի կարողանան ապահովել իրենց զավակներին։Ֆիորին ինքը տարբեր աշխատանքներ է կատարել, որպեսզի թեթեւացնի ծնողների հոգսը. պիցցա է վաճառել, աշխատել որպես էլեկտրիկ, դեկորատոր։

Նրա առաջին բեմելը տեղի է ունեցել 12 տարեկանում Մարսելի օպերայում «La Legende des Santonniers» երաժշտական կոմեդիայում հայտնի դերասան Ֆրանկ Ֆերնանդելի հրավերով։

Պատրիկ Շուշանյանն իր ազգանունը փոխել է բեմական կարիերայի համար եւ վերցրել մոր ազգանունը։

«Ես նման քայլի եմ դիմել հորս թույլտվությամբ. բանն  այն է, որ Շուշանյան ազգանվանս արտասանության պատճառով դպրոցում միշտ խնդիրներ էի ունենում։ Հուսալ, որ հանդիսատեսն ինձ կհիշեր այս ազգանվամբ, միամիտ քայլ կլիներ»,- նշում է երգիչը։

Ֆիորիի հայրն ի սկզբանե զավակներին չէր պատմել, որ իրենք Հայոց ցեղասպանությունը վերապրածների ժառանգներն են։ Նրա հորից երկար ժամանակ պահանջվեց, որպեսզի զավակներին պատմի այդ մասին, քանի որ նա չէր ցանկանում նրանց ցավ պատճառել։

«Այդ ժամանակ ես 13-14 տարեկան էի։ Մի օր հորիցս պահանջեցի, որ ինձ ամեն ինչ բացատրի։ Հայրս պատմեց, որ իրենց գյուղում կար մի ընտանիք, որոնց մոռացել էին «այցելել» ժանդարմները։ Ընտանիքի բոլոր անդամները չէին դադարում աղոթել եւ սպասել, որ ժանդարմները իրենց էլ, ինչպես մյուս ընտանիքներին, «կայցելեն»։ Դա, բարեբախտաբար, տեղի չունեցավ, նրանց մասին մոռացել էին. այդ ընտանիքը Շուշանյանների ընտանիքն էր»,- պատմում է երգիչը։

Ֆիորին միջազգային հաջողության հասավ 1993թ.  «Եվրատեսիլ» երգի մրցույթին մասնակցելուց հետո։ 1994–1995 թթ. երգիչը թողարկեց երկու ալբոմ։

«Փարիզի աստվածամոր տաճարը» ներկայացումից նրա Belle սինգլը մինչեւ օրս էլ շատ հայտնի ու տպավորիչ է։ Ֆիորին խոստովանում է, որ մյուզիքլի շնորհիվ իր կարիերան վեր բարձրացավ «Ֆերարիի» արագությամբ։

Ֆիորին մի քանի անգամ այցելել է Հայաստան։ Նրա առաջին այցը եղել է հոր հետ 2004 թ.։ Նրանք եկել էին տեսակցելու հարազատներին, որոնց հայրը չէր տեսել ավելի քան հիսուն տարի։

« Ես միշտ գիտեի, թե ինչ մեծ նշանակություն ունի հորս համար այս հողը, իսկ հայրս ինձ համար վառ աստղ է։ Ցավոք, ես չեմ տիրապետում հայերենին, այն շատ բարդ է, սակայն ամեն երեկո ես դուդուկ եմ նվագում, որը հայրս գնել է երեւանյան Վերնիսաժից։ Այժմ առանց այդ գործիքի որեւէ համերգ չի անցնում։ Հայաստանը միշտ էլ եղել է իմ կյանքում։ Բացի այդ, եղել են հորս պատմած բազմաթիվ պատմությունները, որոնք ինձ ստիպել են միշտ բացահայտել ինքս ինձ՝ ինքնաճանաչման նպատակով։ Այդ փնտրտուքներում ինչ-որ գաղտնի եւ ձգողական բան կա։ Հավանաբար նույն զգացումն է ունենում աշխարհի ցանկացած ծայրում բնակվող յուրաքանչյուր հայ»,- ասում է երգիչը։

Պատրիկ Ֆիորիի անձնական կյանքի մասին տեղեկությունները քիչ են։ Հայտնի է, որ նրան սիրահարված է եղել երգչուհի Լարա Ֆաբիանը, ով «Փարիզի աստվածամոր տաճարը» մյուզիքլում մարմնավորում էր Էսմերալդային։

«Ես նրան ինձնից շատ էի սիրում»,- խոստովանել է Ֆաբիանը։

«Արդյո՞ք  XXI-րդ դարում գոյություն ունի ռոմանտիկա։ Ես ուզում եմ դրան հավատալ, քանի որ ռոմանտիկան կյանքն ավելի է գեղեցկացնում։ Իդեալական կնոջ մասին երեւակայություններ չստեղծելով, հուսով եմ, որ մի օր նրան կհանդիպեմ»,- ասում է  երգիչը։