Վթարային դպրոցները նոր կյանք են ստանում․ ԱԶԲ-ի ֆինանսավորմամբ կկառուցվի 46 դպրոց

ОБЩЕСТВО 21 Май, 2025 18:45

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Դպրոցաշինություն, հիվանդանոցների նորոգում, հիմնանորոգում, ճանապարհաշինություն․ ահա թե ինչ է արել Ասիական զարգացման բանկը Հայաստանի հետ համագործակցության 20 տարիների ընթացքում։

Այս կարևոր իրադարձությանն ընդառաջ՝ կազմակերպվեցին լրատվական շրջայցեր ՀՀ վեց մարզերում՝ նպատակ ունենալով լրատվամիջոցների ներկայացուցիչներին ներկայացնել ԱԶԲ-ի կողմից ֆինանսավորվող խոշորագույն ներդրումային ծրագրերն ու դրանց առարկայական ազդեցությունը համայնքների վրա։

Լրագրողները հնարավորություն ունեցան այցելել մի շարք ենթակառուցվածքային և սոցիալ-տնտեսական ծրագրերի իրականացման վայրեր, շփվել տեղում շահառուների հետ և առաջին ձեռքից տեղեկանալ՝ ինչպես են այս ծրագրերը փոխում բնակիչների առօրյան։

Հատուկ ուշադրության էր արժանացել կրթության ոլորտը, մասնավորապես՝ դպրոցաշինական ծրագրերը, որոնք նպատակ ունեն ապահովել ժամանակակից, անվտանգ և հասանելի կրթական միջավայր տվյալ համայնքի բոլոր երեխաների համար։

Կանգառը՝ Աբովյանի թիվ 2 հիմնական դպրոց․

Դպրոցը դրսից անգամ լույս էր առկայծում, իսկ ներսը ջերմացնում էին հայկական պարը և երաժշտությունը։ Լրագրողների հետ զրույցում դպրոցին հիացմունքով նայող տնօրեն Արթուր Տաշչյանը պատմում է, որ դպրոցի նոր շենք տեղափոխվել են 2025 թվականի փետրվարի 18-ից, իսկ պաշտոնական բացումը եղել է մարտի 1-ին։

«Պայմանները կատարյալ են և համահունչ նոր չափորոշիչին, ժամանակակից կրթության պահանջներին։ Բոլոր պայմաններն առկա են որակյալ և արդյունավետ ուսուցում ապահովելու 1563 աշակերտի համար»,- նշում է տնօրենը։

Նոր մասնաշենքը հագեցած էի նաև կենսաբանության, քիմիայի, ֆիզիկայի լաբորատորիաներով և աշխարհագրության սենյակով, երկու թվային գրագիտության աշխատարաններով, որոնք հագեցած են համապատասխան սարքավորումներով։

Այս դպրոցում ինչպես ԱԶԲ-ի կառուցած մյուս դպրոցներում ևս մի քանի տարի է, ինչ գործում է նաև «Արմաթ» աշխատարանը։ Նոր տեղեկատվական կենտրոն և գրադարան, տեղեկատվական տեխնոլոգիաների դասասենյակ, մեծ մարզահամալիր՝ բաղկացած երկու մարզադահլիճներից տարրական և միջին դասարանցիների համար։

Մինչ նոր կառուցված դպրոցը՝ աշակերտները սովորել են հնամաշ, վաղուց կառուցված, ճաքճքած պատերով, վթարային շենքում, չեն ունեցել ֆիզկուլտ դահլիճ և հանդիսությունների սրահ։ Այժմ դպրոցն ունի ընդարձակ սպորտդահլիճիներ և հանդիսությունների սրահ՝ կահավորված լավագույն կահյուքով և տեխնիկայով։

Դպրոցի պատերը փոխվել է, սակայն դպրոցում նախկին ջերմությունն առկա է, ինչը համոզվեցինք տնօրենի զրույցներից։

Դպրոցում աշխատում է Պայծառ տատն, ով 86 տարեկան է, տնտեսական բաժնի աշխատակից է, որ իր կյանքի կեսը նվիրել է դպրոցին։ Տնօրեն Արթուր Տաշչյանը պատմում է, որ երբ նշանակվել է տնօրեն և եկել է առաջին անգամ դպրոց, Պայծառ տատը մտել է իր աշխատասենյակ, շնորհավորել և ասել է «դու իմ 7-րդն ես»։ Հիմա էլ ողջագուրվում են և ժպիտով հիշում միասին անցած ճանապարհը։ Տնօրեն Տաշչյանը կատակում է, որ ինքը դպրոցի տնօրենն է, իսկ Պայծառ տատը՝ ծաղիկների տնօրենն է։ Իսկ Պայծառ տատի արտակարգ խնամված ծաղիկները դպրոցի զարթ են համարվում, որոնց մի մասը կա՛մ ինքն է բերել, կա՛մ տնօրենը, կա՛մ նախկին դպրոցից է մնացել։

Տնօրենը ծնողներին հորդորեց իրենց երեխաների համար դպրոց ընտրել ոչ միայն շենքի, այլև բովանդակության համար, և հավաստիացրեց, որ Աբովյան քաղաքի թիվ 2 հիմնական դպրոցում այդ երկու գործոնները համադրվել են, ինչին ուսումնական հաստատությունը հասել է երեք տարիների համառ աշխատանքի արդյունքում։

Կանգառ՝ Գանձաքարի միջնակարգ դպրոց․

Տավուշի մարզի Գանձաքար համայնքի՝ 1960 թվականից կառուցված դպրոցը երբեք չի նորոգվել։ Սեյսմակայունության տեսանկյունից այն համարվում էր ամենախոցելիներից մեկը։ Հենց այս պատճառով էլ ընդգրկվել է Ասիական զարգացման բանկի ֆինանսավորմամբ և Հայաստանի տարածքային զարգացման հիմնադրամի միջոցով իրականացվող «Սեյսմիկ անվտանգության բարելավման» ծրագրում։

Դպրոցի ընդհանուր արժեքը կազմել է մոտ 2 մլրդ դրամ, որի արդյունքում կառուցվել է 480 աշակերտի համար նախատեսված դպրոց: Դպրոցն ունի սպորտդահլիճ և հանդիսությունների սրահ: Դպրոցը ջեռուցման համար ունի առանձին կաթսայատուն, տանիքին տեղադրված է 24 կիլովատ հզորությամբ արևային ֆոտովոլտային կայան։ Դպրոցն ունի երկու վերելակ, հարմարեցված է հենաշարժողական խնդիրներ ունեցող անձանց համար։

Գանձաքարի միջնակարգ դպրոցի տնօրեն Անուշ Մեհրաբյանը պատմում է, որ կառուցման 3 տարիներին դժվար է եղել դասերի կազմակերպումը, բայց որևէ աշակերտ չի լքել գյուղն ու մարզկենտրոն չի գնացել։

«Դպրոցը շահագորժման է հանձնվել 2025 թվականի հունվարի 7-ին և նույն օրն էլ տեղափոխվել ենք։

Շահագործումից հետո 467 աշակեր և 67 ուսուցչական և տեխնիկական կազ տեղափոխվել է այս դպրոց։ Դասերը 3 տարի 6 ամիս կազմակերպել ենք ծանր պայմաններում, ոևտեղ շատ հնարավորություններ չեն եղել աշակերտների համար, ուսուցումը կատարվել է երկհերթ։ Սպորտդահլիճ չենք ունեցել և օգտագործել ենք մշակույթի տան բակը, իսկ ուսուցումը կազմակերպել ենք մշակույթի տանը»,- հիշելով նախկին դժվարությունները՝ պատմում է տնօրենը։

Ասիական զարգացման բանկի «Սեյսմիկ անվտանգության բարելավման» ծրագրի ղեկավար Գոհար Մուսայելյանը, այցի ընթացքում ներկայացնելով դպրոցների նորոգման կամ կառուցման ծրագիրը, նշեց, որ ծրագիրը հաստատվել է 2015 թվականին։ Առաջին վարկով տրամադրված գումարը կազմել է 88,5 միլիոն դոլար։ 2023 թվականին հաստատվել է լրացուցիչ ֆինանսավորում՝ 72,3 միլիոն դոլարի չափով, որովհետև հաստատված նախնական գումարը բավարար չէր բոլոր 46 դպրոցը վերակառուցելու կամ ամրացնելու համար։

«Ծրագիրն իր տեսակով առաջին անգամ է իրականացվել Հայաստանում։ ԱԶԲ-ն շատ մեծ ազդեցություն չի ունենում որոշումների կայացման վրա, այսինքն՝ գնումներն ու ֆինանսական կառավարումն ամբողջությամբ իրականացնում է Հայաստանի տարածքային զարգացման հիմնադրամը։ Երբ ծրագրի արդյունքներն արդեն ապահովված են լինում, և ԱԶԲ-ն համոզվում է, որ երաշխավորված են ծրագրի պահանջները, այդ դեպքում միայն իրականացվում են ֆինանսական մասհանումները»,-ներկայացրեց Մուսայելյանը։

Անմիջականորեն այցելելով այս դպրոցները՝ լրագրողները արձանագրեցին ոչ միայն ֆիզիկական պայմանների բարելավում, այլև համայնքների վերաբերմունքի փոփոխություն։ Տեղի բնակիչներն ավելի շագրգռված են, որ իրենց երեխաները հենց այս դպրոցներում ուսում ստանան։ Ավելին՝ բարձրորակ կրթական միջավայրը նպաստում է ուսման շարունակականությանը, ուսանողների մոտիվացիային և կրթության հանդեպ վերաբերմունքի ամրապնդմանը։

Էմմա Միքայելյան

Հետևեք մեզ՝ այստեղ