Ինչու էր մեկուսացել Էլվինա Մակարյանն ու ինչպես էր հաղթահարում կյանքի բարդ ու դրամատիկ փուլերը. «Երկաթ ծամեմ». պրեմիերա՝ Մհեր Մկրտչյան թատրոնում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մհեր Մկրտչյան արտիստական թատրոնում կայացավ «Երկաթ ծամեմ» վավերագրական ներկայացման պրեմիերան, որը պատմում է հայտնի երգչուհի Էլվինա Մակարյանի կյանքի դրամատիկ պատմությունը:

Ներկայացումը ստեղծվել է երիտասարդ հեղինակների կողմից և հիմնված է երգչուհու կյանքի իրական պատմության վրա։

Նախագծի հեղինակները խոստովանում են՝ անհնարին թվացող բարդ էր ու պատասխանատու անել Էլվինա Մակարյանի մասին ներկայացում:

Պրդյուսերը Էդվարդ Մխիթարյանն է, բեմադրիչը՝ Նադեժդա Իսրաելյանը, պիեսի հեղինակը Անահիտ Ղազարյանն է, երաժշտությունը՝ Հայկ Կարոյի:

Ներկայացման հերոսներին մարմնավորում են դերասաններ Լուսինե Ավանեսյանը,  Դիանա Ռազիելը, Թելման Խաչատրյանը, Մարի Գրիգորյանը, Անդրանիկ Աբրահամյանը և Ժիրայր Օհանյանը:  Tert.am Life-ը ներկա է եղել պրեմիերային, զրուցել ստեղծագործական թիմի հետ:

«Չափազանց պատասխանատու աշխատանք էր ոչ միայն հանրության առջև, այլ՝ հենց իր: Ես շատ սիրում եմ իր ստեղծագործությունները, իր երգերը հաճախ եմ լսում: Ամեն կերպ փորձել ենք մնալ հավատարիմ իր աշխատանքին, իր փիլիսոփայությանը: Ինչպես ինքը խիզախեց ու փորձեց անել նորը, մենք ևս մեր աշխատանքով ցանկացել ենք անել նոր բան: Հենց դա դարձավ ոգեշնչում»,- Tert.am Life-ի հետ զրույցում ասաց ներկայացման ռեժիսոր Նադեժդա Իսրայելյանը:  

Ներկայացման ողջ ընթացքում հանդիսատեսն անհամբեր սպասում է էլվինայի հետ հանդիպմանը, բայց հանդիպումն այդպես էլ չի կայանում՝ դրանով ավելի ինտրիգային դարձնելով և անսովոր ու խառը էմոցիաներ փոխանցելով:  

«Աշխատանքը դերասանների հետ շատ հետաքրքիր էր, քանի որ մենք խոսում էինք մի անձի մասին, ում մեծ մասը գիտեին ու սիրում էին, ու նաև հենց իրենց հանդեպ կար պատասխանատվության զգացողություն:

Ներկայացումը Էլվինա Մակարյանի մասին է, բայց նաև ամեն մի կերպարի, ով ուղիղ և ոչ ուղիղ կապ է ունեցել Էլվինայի հետ»,- նշեց բեմադրիչը:

Պիեսի հեղինակ Անահիտ Ղազարյանը Tert.am Life-ի հետ զրույցում պատմեց, որ դոկումենտալ ներկայացման հիմքում ընկած է հետազոտական մեծ աշխատանք և նյութի հավաքագրում:

«Հանրային գրադարանի մատենագիտության բաժնում փնտրեցինք և գտանք մամուլի անդրադարձը՝ ամբողջ ստեղծագործական ընթացքը, որ ունեցել է Էլվինան վաղ շրջանից մինչև մահ:

Այսինքն, թե ինչպես է մամուլն անդրադարձել իրեն, ու հետաքրքիր էր տեսնել այդ զարգացումները՝ ո՞նց է մամուլի անդրադարձը գնալով մեկ էլ քչանում ու լռում, ու հանկարծ հայտնվում է Էլվինայի մահվան մասին լուրը:  

Նյութի հավաքագրման ժամանակ հարցազրույցներ ենք ունեցել նրան ճանաչած, նրա հետ աշխատած մարդկանց հետ:

Շատ կարևոր է եղել Արտակ Ալեքսանյանի հարցազրույցը Էլվինայի հետ, որը շատ կարևոր հիմք է հանդիսացել պիեսը գրելու համար»,- պատմեց Անահիտ Ղազարյանը:

Նրա խոսքով՝ շատ օգնել է նաև հանրային ռադիոյից գտած մի հետաքրքիր հարցազրույց, որը ոչ մի տեղ հրապարակված չի եղել:  

Էլվինա Մակարյանի կյանքի դրամատիկ դրվագներից ստեղծագործական թիմն ընտրել է երգչուհու կյանքի 2-3 տարին, երբ նա տնային կալանքի տակ էր:

«Որպես պաշտոնական որոշում տնային կալանք չի եղել, բայց եղել է մեկուսացում, երբ նրան արգելել են գնալ աշխատանքի ռադիոյում:

Մենք վերցրել ենք նրա կյանքի այն բեկումնային կետը, այսինքն՝ մինչև Ամերիկա գնալը և ներկայացրել ենք Ամերիկա գնալու դրդապատճառը»,- ամփոփեց պիեսի հեղինակը:

Հաջորդ ներկայացումը կկայանա հունիսի 8-ին՝ Մհեր Մկրտչյանի անվան արտիստական թատրոնում:

Հետևեք մեզ՝ այստեղ