«Պիտի հաղթահարեի որոշ վախեր իմ առողջականի, ժամանակի սղության, ոչ ստանդարտ պիեսի հետ կապված». Լուսինե Ավանեսյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Իրականում շատ ուրախացա, որ նոր դեր եմ ստացել ու շատ հետաքրքիր կերպար է։ Քանի որ վաղուց թատրոնում գլխավոր կերպար չէի խաղացել, պիտի հաղթահարեի որոշ վախեր իմ առողջականի, ժամանակի սղության, ոչ ստանդարտ պիեսի ու էլի մի քանի նրբություններին վերաբերող։

Բայց ես սիրում եմ նոր բաներ փորձել, սիրում եմ աշխատել նոր սերնդի հետ, եթե նույնիսկ շատ է տարբերվում նրանից, ինչ ես եմ տեսնում։

Ես միշտ վստահում եմ այն մարդկանց, ում հետ աշխատում եմ։ Դա ինձ շատ է օգնում»,- Tert.am Life-ի հետ զրույցում՝ խոսելով Էլվինա Մակարյանի կյանքի պատմության մասին «Երկաթ ծամեմ» ներկայացման մեջ գլխավոր հերոսուհու կերպարի մասին, պատմել է դերասանուհի Լուսինե Ավանեսյանը:

Նրա խոսքով՝ կերպարը բարդ էր, պատասխանատվության զգացումը և՛ օգնում, և՛ ահավոր խանգարում էր։

«Ինձ շատ օգնեցին իմ կողքի մարդիկ։ Բարդ էր մարմնավորել այս կերպարը, որովհետև եղել է նման մարդ ու այն մարդիկ, ովքեր ճանաչում էին, բնական է շատ բան չէին ընդունի։ Նորմալ է, որ իրենք կուզեին տեսնել էն կնոջը, ում գիտեին։ Իմ մոտեցումը մի փոքր այլ է։

Մանավանդ պիեսը էս կնոջն ուրիշ կողմից էլ է ցույց տալիս։ Ու չեմ կարծում, միայն ուժեղ կին խաղալը կբավարարեր հանդիսատեսին»,- մեզ հետ զրույցում ասաց դերասանուհին:

Նա նշեց, որ կերպարում իրեն հոգեհարազատ էր այն, որ նա մայր է, որը շատ է սիրում իր աղջկան, ուզում է ու ամեն ինչ անում, որ նրան երջանիկ տեսնի։

«Միշտ նրա կողքին է։ Առյուծի պես պաշտպանում ու փորձում է հնարավորինս բացասականից հեռու պահել։ Տաղանդավոր մարդու մայր լինելը մեծ պատասխանատվություն է։ Դու ես նրան ծնել այդպիսին ու պարտավոր ես օգնել նրան հաղթահարել ամեն ինչ»,- նշեց Լուսինե Ավանեսյանը:

Դերասանուհին խոստովանեց, որ հատուկ վերաբերմունք չի ունեցել Էլվինայի նկատմամբ։

«Սիրել ու գնահատել եմ, բայց ոչ ավելին։ Ներկայացումից 2 շաբաթ առաջ հասկացա, որ պիտի դառնամ նրա ամենամեծ երկրպագուն։ Ամբողջ օրը սկսեցի լսել նրա երգերն ու հարցազրույցները նայել։ Դա շատ շատ օգնեց ինձ»,- ամփոփեց դերասանուհին: 

Հիշեցնենք՝  «Երկաթ ծամեմ» ներկայացման պրոդյուսերը Էդվարդ Մխիթարյանն է, բեմադրիչը՝ Նադեժդա Իսրաելյանը, պիեսի հեղինակը Անահիտ Ղազարյանն է, երաժշտությունը՝ Հայկ Կարոյի:

Ներկայացման հերոսներին մարմնավորում են դերասաններ Լուսինե Ավանեսյանը,  Դիանա Ռազիելը, Թելման Խաչատրյանը, Մարի Գրիգորյանը, Անդրանիկ Աբրահամյանը և Ժիրայր Օհանյանը: 

Հեղինակ՝ Անի Մնացականյան

Հետևեք մեզ՝ այստեղ