Լարված իրավիճակն ու քաոսը Լոս Անջելեսում պահպանվում են. նահանգը դատական հայց կներկայացնի Թրամփի վարչակազմի դեմ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կալիֆոռնիայի նահանգապետ Գևին Նյուսոմը հայտարարել է, որ նահանգը երկուշաբթի դատական հայց կներկայացնի ԱՄՆ նախագահ Դոնալդ Թրամփի վարչակազմի նկատմամբ՝ անկարգությունների դեմ պայքարելու նպատակով նահանգում ազգային գվարդիա տեղակայելու համար:

«Նախագահն ավելի վատացրեց իրավիճակը։ Նա յուղ է լցնում կրակի վրա՝ հայտարարելով, որ կգլխավորի ազգային գվարդիան: Դա անօրինական, անբարոյական արարք է, որը հակասում է Սահմանադրությանը»,- նշել է նահանգապետը և հավելել, որ դատական հայցը կվիճարկի առանց նահանգի համաձայնության Կալիֆոռնիայի ազգային գվարդիան դաշնայնացնելու Թրամփի որոշումը ճի՞շտ է, թե՞ ոչ:

Նահանգապետը Թրամփի գործողություններն անվանել է «հակասահմանադրական» և «անօրինական»։

Անկարգությունները ճնշելու համար Լոս Անջելես են ժամանել Ազգային գվարդիայի զորքերը՝ բաղկացած 2000 զինվորականից:

Իրավիճակը շարունակում է մնալ լարված ու պայթյունավտանգ:

Լոս Անջելեսի կենտրոնում կիրակի օրը ձերբակալվել է ընդհանուր առմամբ 27 մարդ, լրագրողներին հայտնել է Լոս Անջելեսի ոստիկանության պետ Ջիմ ՄաքԴոնելը երեկոյան մամուլի ասուլիսի ժամանակ։ ՄաքԴոնելը նշել է, որ ենթադրյալ հանցագործությունների թվում են ոստիկանի վրա Մոլոտովի կոկտեյլ նետելը և մոտոցիկլետով ոստիկանական շարքին մխրճվելը։ 

CNN-ը հայտնում է, որ ոստիկանությունը օգտագործել է լուսաձայնային նռնակներ և արցունքաբեր գազ՝ ամբոխը ցրելու համար, ոմանք ձերբակալություններ կատարելիս հարվածել և հրել են ցուցարարներին, կիրառվել է բիրտ ուժ։ Ցուցարարները հրկիզել են առնվազն երկու ոստիկանական մեքենա։ Լոս Անջելեսի ամբողջ կենտրոնը հայտարարվել է անօրինական հավաքների տարածք։

Հիշեցնենք՝ երկրի իշխանությունները և ցուցարարները օրեր շարունակ բախումների մեջ են միգրացիոն գործակալների կողմից տասնյակ մարդկանց ձերբակալելուց հետո։ 

Ավելի վաղ ԱՄՆ նախագահ Դոնալդ Թրամփի վարչակազմը հայտարարել էր, որ գործի կդնի ազգային գվարդիայի 2 հազար ծառայողի՝ Լոս Անջելեսում անօրինական միգրանտների դեմ ռեյդերը բոյկոտողների հետ տեղի ունեցած բախումների կապակցությամբ: Պենտագոնի ղեկավարը չի բացառել բանակի կիրառումը։ Կալիֆոռնիայի  նահանգապետ Գևին Նյուսոմը և երկրի մեծությամբ երկրորդ քաղաքի քաղաքապետը Սպիտակ տանը մեղադրել են սադրանքի և վախ սերմանելու փորձի համար:

Լոս Անջելեսում մի քանի օր շարունակ ընթանում են բողոքի ցույցեր, որոնք ուղղված են ներգաղթյալների շրջանում իրավապահ մարմինների իրականացրած ստուգայցերի դեմ։ Դրանցից հետո քաղաքի տարբեր հատվածներում զանգվածային ցույցեր են սկսվել, որոնց ընթացքում ձերբակալվել և բերման է ենթարկվել մի քանի տասնյակ մարդ։

Կալիֆոռնիան ավանդաբար դեմոկրատների հենակետն է համարվում, և Թրամփը բազմիցս բուռն է անդրադարձել այնտեղ տեղի ունեցող ցանկացած իրավիճակի: Մայիսին նա սպառնացել է կրճատել նահանգի ֆինանսավորումը և չեղարկել 126,4 միլիոն դոլար հեղեղումների կանխարգելման ծրագրերը։

Հետևեք մեզ՝ այստեղ