Ժողովրդականություն չունեցող վարչապետի հարձակումը Եկեղեցու վրա մեծ հակազդեցության է հանդիպել. «Փաստ»

«Փաստ» օրաթերթը գրում է.

kommersant.ru–ն գրում է, որ Նիկոլ Փաշինյանը կտրուկ բարձրացրել է Հայ առաքելական եկեղեցու հետ առճակատման խաղադրույքները: Ամենայն հայոց կաթողիկոս Գարեգին Բ-ին մեղադրելով կուսակրոնության ուխտը խախտելու մեջ՝ նա կոչ է արել փոխարինել ՀԱԵ ղեկավարին և նորին ընտրել դարավոր ընթացակարգի խախտմամբ: Վարչապետը «հավատացյալներին և հոգևոր մաքրությունը պաշտպանելու» նպատակով առաջարկել է ստեղծել համակարգող խումբ՝ ՀԱԵ ղեկավարի վերընտրությունը կազմակերպելու համար: Մինչ այժմ Եկեղեցուն վարկաբեկելու՝ ժողովրդականություն չունեցող վարչապետի փորձերը միայն քննադատություն են առաջացրել ինչպես հոգևորականության, ընդդիմության, այնպես էլ Կաթողիկոսին աջակցող քաղաքացիների կողմից:

Բանն այն է, որ հոգևորականության և ՀՀ իշխանությունների միջև ներկայիս առճակատման մասշտաբները շատ ավելի լայն են: 2018 թվականին դառնալով վարչապետ՝ Նիկոլ Փաշինյանը աստիճանաբար իրեն ենթարկեցրեց իշխանության գործադիր, օրենսդիր և դատական ճյուղերը, բայց Եկեղեցին մնաց անկախ։ Եվ խորհրդարանական ընտրությունների մոտենալուն զուգընթաց, որոնք նախատեսված են 2026 թվականին, հոգևորականության կողմից կառավարության քաղաքականության քննադատությունը Նիկոլ Փաշինյանի համար ավելի ու ավելի ցավոտ է դառնում։ «Իշխող կուսակցությունը խորհրդարանական ընդդիմությանը լուրջ սպառնալիք չի համարում՝ չնայած իր չափազանց ցածր վարկանիշին։ Եթե նայենք առկա քաղաքական իրականությանը, ապա միակ ուժը, կառույցը, ինստիտուտը, որը չի վերահսկվում իշխանությունների կողմից, Եկեղեցին է», - kommersant.ru-ի հետ զրույցում բացատրել է Կովկասի ինստիտուտի (Երևան) տնօրեն Ալեքսանդր Իսկանդարյանը։

Gallup International-ի մայիսյան հարցման համաձայն, հարցվածների 11,5 %-ն է պատրաստ քվեարկել Նիկոլ Փաշինյանի «ՔՊ» կուսակցության օգտին։ Միևնույն ժամանակ, Եկեղեցին է ավանդաբար մեծ աջակցություն վայելում հայ բնակչության կողմից. 2024 թվականի «Կովկասյան բարոմետրի» հարցման համաձայն, կրոնական հաստատությունների նկատմամբ վստահության մակարդակը 79,4 % է։ Պարզ է, որ վարչապետի հարձակումների ֆոնին Եկեղեցու աջակցության հանրահավաքները բավականին կանխատեսելի են։ Հունիսի 2-ին և 5-ին տասնյակ մարդիկ էին բողոքի ցույցի դուրս եկել կառավարության շենքի մոտ, իսկ հունիսի 11-ի գիշերը շատերը անձամբ էին գնացել Երևանի «Զվարթնոց» օդանավակայան՝ դիմավորելու ԱՄԷ-ից ժամանած Գարեգին Բ-ին։ Վերադառնալուց հետո Կաթողիկոսը աղոթք է կարդացել, կոչ արել ժողովրդին միավորվել և վստահություն հայտնել, որ Եկեղեցին կհաղթահարի առաջացած դժվարությունները։ Միևնույն ժամանակ, նա չի պատասխանել լրագրողների հարցերին, թե արդյո՞ք Նիկոլ Փաշինյանի խոսքերը ՀԱԵ ղեկավարի՝ երեխա ունենալու մասին, ճիշտ են։

Մանրամասները՝ «Փաստ» օրաթերթի այսօրվա համարում