«Արցախը կա և պիտի լինի մեր ուժերի գերլարված աշխատանքով». Շանթ Հովհաննիսյանը մարմնավորում է «2020-ի հրեշտակները» ֆիլմի գլխավոր հերոսներից մեկին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Ես սիրում եմ գտնել այն մարդուն, ում հետ կարող եմ միասին ապրել կերպարը, ոչ թե խաղալ այն։ Սիրում եմ դերասանների հետ երկար զրուցել սցենարի շուրջ, կերտել կերպարը՝ խոսել հերոսի ապրումների մասին»,- ասում է «20 20-ի հրեշտակները» ֆիլմի ռեժիսոր Ջիվան Ավետիսյանը:  ֆիլմում դերասանները հանդիպում են իրական բժիշկների հետ։ Նրանք լսում են նրանց պատմությունները, զգում են նրանց վախն ու ուժը, փորձում հասկանալ, թե ինչպես է մարդը շարունակում գործել՝ երբ շուրջը փլվում է աշխարհը։ «Ես ընտրում եմ մարդկանց, ովքեր պատրաստ են ապրել այս պատմությունը ինձ հետ»,- ասում է Ջիվան Ավետիսյնանն, ով հենց այդ սկզբունքով է ընտրել Շանթ Հովհաննիսյանին, Վարդան Մկրտչյանին, Նարինե Պետրոսյանին, Սիմոն Աբգարյանին, Մուրադ Նադիրյանին, Մարիամ Ադամյանին, Լիզա Բարսեղյանին, Նարեկ Բաղդասարյանին, Վիլեն Սարգսյանին, Էմմա Մկրտչյանին և այլոց:

«Այս նախագծում առաջինն ինձ գրավեց թեմայի կարևորությունը, բացի այդ Ջիվանի աշխատանքները բոլորն էլ իրենց գեղագիտությամբ բարձրարժեք աշխատանքներ են: Այս մարդը լուռ իր գործն է անում, խաչմերուկներ է  ստեղծում դրսի հետ՝ աշխարհին պատմելով, որ այս մեծ երկրագնդում և այս փոքր կետում ապրող մարդիկ կան, ովքեր համամարդկային արժեքներով են ապրում»,-Tert.am Life-ի հետ զրույցում ասաց դերասան Շանթ Հովհաննիսյանը:  Նրա խոսքով՝ այս ֆիլմով ռեժիսորը հանրահռչակում ու ներկայացնում է պատերազմն իր բոլոր նրբություններով, ցույց տալիս տագնապի ու մղձավանջի միջով անցած մարդկանց ապրումներն ու զգացողությունները:

«Մենք շատ անգամ զինվորականների մասին ենք ֆիլմեր նկարում, հերոսացնում նրանց, և իսկապես դա պետք է, փառք ու պատիվ մեր բոլոր զինվորներին։  Բայց, այդ հրեշտակները՝ ինչպես Ջիվանն է ֆիլմում նրանց անվանել՝ «20 20-ի հրեշտակները», բժիշկները, բուժշաշխատողները, բոլոր այն մարդիկ, ովքեր անտեսանելի ձևով այդ մղձավանջի մեջ փորձել են հույսի և լույսի կետ լինել, և նպաստել շատ շատերի ճակատագրերի շարունակությանը, նույնպես արժանի են գնահատանքի: Այստեղ և՛ աշխատանք կա դերասանի համար, և՛ պատվաբեր է դա անելու ու լուսաբանելու առումով»,- նշեց Շանթ Հովհաննիսյանը:

Ֆիլմում նա  մարմնավորում է գլխավոր հերոսներից մեկին՝ Տիգրան անունով բժշկին, ով նաև ճանապարհ է անցել 90-ականներին: Դերասանը գիտակցում է, որ բարդ ու ծանր նկարահանումներ են սպասվում, բայց խոստովանում է, որ ավելի բարդ նկարահանումներ է հաղթահարել ու պատկերացնում է նաև այս ծավալը: 

Անդրադառնալով այն խնդրին, որ բարդ է լինելու նաև հոգեբանական առումով, երբ Արցախի մասին ֆիլմը նկարահանվելու է Սյունիքում, որովհետև Արցախն օկուպացված է՝ դերասանն արձագանքեց. 

«Գիտեք, այդ ցավը, որ Արցախը չկա, միշտ, ամեն տեղ՝ կենցաղում լինի, ֆիլմը նկարելուց, թե առօրյա կյանքում՝ դա բոլորիս մեջ է։ Այդ չկա բառը մենք մեր լեքսիկոնից պիտի հանենք: Արցախը կա և պիտի լինի մեր ուժերի գերլարված աշխատանքով: Ամենքս մեր ոլորտում պիտի հասնենք այն արդարությանը, մեր ուժերը համատեղենք և արդարությունը պիտի վերականգնվի, Արցախցին պիտի ապրի իր հազարամյա պատմություն ունեցող հողում։  Պիտի հասկանանք որտեղից է գալիս այս համատարած անտարբերությունը: Հավատարիմ ձևով մենք մեր աշխատանքը կանենք՝ անկախ դժվարություններից: Իսկ Ջիվանը միշտ իր արվեստով է գործում, ինքը արվեստով ամեն ինչի պատասխանը տալիս է: Ես իր հետ ծանոթ չէի, բայց  ծանոթացանք ու ինձ հաճելի է իր մոտ աշխատելը: Տա Աստված, որ այս նախագծով հաջողություն ունենանք և կարողանանք նոր գեղարվեստական  որակ տալ ու համամարդկային թեմաների շուրջ խոսենք ո՛չ միայն մեր պետության, այլ նաև՝ աշխարհի համար»,- ամփոփեց Շանթ Հովհաննիսյանը:

Հիշեցնենք՝ ֆիլմը հարգանքի տուրք է արցախյան պատերազմի ժամանակ իրենց կյանքը վտանգած բուժաշխատողներին:

 Ֆիլմի 1-ին բաժինը պատմում է Հայաստանից Արցախ մեկնած բժիշկների մասին, 2-րդ բաժինը՝ Արցախի Հանրապետությունում ծառայության մեջ գտնվող կամ քաղաքացիական կառույցներում աշխատող բուժաշխատողների մասին, 3-րդ բաժնում դեպքերն ամբողջովին ընթանում են սահմանագծին, իսկ 4-րդ պատմությունը սփյուռքից Արցախ ու Հայաստան ժամանած բժիշկների պատմությունն է:

Ռեժիսորը խոստանում է շատ հուզիչ ու դրամատիկ, նաև հաղթանակով ու բերկրանքով լեցուն դրվագներով ֆիլմ:

 «2020-ի հրեշտակները» ֆիլմի նկարահանումները կսկսվեն հաջորդ տարի: Այս ընթացքում թիմը սպասում է Հայաստանի կինոյի հիմնադրամից պետական աջակցության:

Հետևեք մեզ՝ այստեղ