«Ամենաբարդը դերասանների ընտրությունն էր». HK Productions-ը ֆիլմ է նկարահանում Հովիկ Աֆյանի «Կարմիր» վեպի մոտիվներով

КУЛЬТУРА 24 Июль, 2025 0:35

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

HK Productions-ը սկսվում է երկու նոր գեղարվեստական լիամետրաժ ֆիլմի արտադրություն: 2026 թվականը նշանային տարի է ինչպես ընկերության, այնպես էլ հիմնադիր Հրաչ Քեշիշյանի համար։
HK Productions-ը դառնում է 20 տարեկան, իսկ Քեշիշյանի՝ հեռուստատեսային ու կինո ոլորտում ակտիվ ստեղծագործական գործունեության՝ 40-րդ տարեդարձն է։
«Այսօր, նոր սերնդի հետ համատեղ, մենք վերստին սկսում ենք մի ճանապարհ՝ նույն ոգով, նույն հավատով։ Եվ խորհրդանշական է, որ հոբելյանական տարում կրկին համատեղվում են ռեժիսորական և պրոդյուսերական աշխատանքներս»,- նշեց Հրաչ Քեշիշյանն ու հավելեց, որ նոր ֆիլմերը խոստանում են ոչ միայն բարձր գեղարվեստական մակարդակ, այլև խորքային ու ժամանակակից թեմաներով կառուցված պատմություններ։
Առաջին ֆիլմը, որի նկարահանումներն արդեն մեկնարկել են, Հովիկ Աֆյանի հայտնի «Կարմիր» վեպի մոտիվներով է: Tert.am Life-ը ներկա է եղել ստեղծագործական թիմի հետ հանդիպմանն ու առանձնացրել կարևոր դրվագները:

Սյուժեն ավանգարդ ոճով է։ Այն մի պատմություն է՝ կորսված սերերի, հիշողության ու մարդկային ճակատագրերի մասին՝ հետխորհրդային բարդ իրականության ֆոնին։ Պետրոս Հովհաննիսյանի հետ միասին սցենարի համահեղինակը Արամ Խաչատրյանն է, ռեժիսորը Պետրոս Հովհաննիսյանը, բեմադրող օպերատորը Մկրտիչ Մալխասյանն է, պրոդյուսերը՝ Վահե Քեշիշյանը, իսկ գլխավոր պրոդյուսերը Հրաչ Քեշիշյանն է:
Դերասանական կազմում ընդգրկված են Ներսես Ավետիսյանը, Սամվել Թադևոսյանը, Նունե Դանիելյանը, Տաթև Հովակիմյանը, Արմեն Մարգարյանը, Նարինե Գրիգորյանը, Վիլեն Սարգսյանը:
Ֆիլմը նկարահանվում է Հայաստանի Կինոֆոնդի աջակցությամբ և «Կինոդարան» ընկերության մասնակցությամբ։

ՀՀ ԿԳՄՍ նախարարի տեղակալ Դանիել Դանիելյանն՝ անդրադառնալով կինոյի ոլորտին, նշեց, որ կինոյի մասին օրենքի նախագիծը նոր հնարավորություններ կստեղծի կինոգործիչների համար։
«Սակայն առանցքայինն այստեղ բովանդակության հարցն է․ պետք են օրիգինալ սցենարներ, պետք է արդի գրականությունը տեղափոխվի կինոյի լեզվով։ Այդ իմաստով ուրախալի է, որ Հովիկ Աֆյանի վեպը վերածվել է սցենարի»։

Ֆիլմի գաղափարն իր մեջ կրում է ոչ միայն անձնական ապրումների տարր, այլև համամարդկային թեմաներ։ Վեպի հեղինակ Հովիկ Աֆյանն՝ անդրաառնալով պատմության զգացմունքային խորությանն ընդգծեց.
«Ես սիրում եմ այս պատմությունը։ Այն պատերազմի ստվերում ընթացող կյանքի ու ապրելու ձոն է։ Շատ ուրախ եմ, որ իմ վեպի հիման վրա սցենարը գրվել է Պետրոս Հովհաննիսյանի և Արամ Խաչատրյանի կողմից։ Վստահ եմ, նրանք այն լիարժեք զգացել են»:

Ռեժիսոր Պետրոս Հովհաննիսյանը խոստովանեց, որ ֆիլմի դերասանական կազմի ընտրությունը բավականին բարդ է եղել:
«Իրականում դերասանների քասթինգն ամենաբարդն է եղել։ Այս պատմության կերպարները շատ հստակ բնավորություններ ունեն։ Շատ երկար եմ նայել, որոնել, մտածել։ Պատմությունը մեկ հերոսի շուրջ չէ, կերպարները շատ են։
Հույս ունեմ՝ կինոյի լեզվով կկարողանամ փոխանցել «Երջանկահովտի» ողջ դրաման ու խորությունը՝ հրաշալի դերասանական կազմի օգնությամբ և հավատով, որ կինոն կարող է մեզ մի փոքր ավելի լավը դարձնել»։

ֆիլմի բեմադրող օպերատոր Մկրտիչ Մալխասյանը կարևորեց նյութի կինեմատոգրաֆիական պոտենցիալը.
«Հրաչ Քեշիշյանի հետ համագործակցությունն ու ընկերությունն արդեն քսան տարվա պատմություն ունի։
Երբ կարդացի սցենարը, գրեթե միանգամից տվեցի համաձայնությունս։
Այս պատմությունը սինեմատիկ լեզվով մեծ պոտենցիալ ունի և կարող է մրցունակ լինել միջազգային փառատոներում։
Մենք Պետրոսի հետ փորձում ենք մնալ մաքուր եվրոպական դրամայի շրջանակում»:

ֆիլմի սցենարի հեղինակ Արամ Խաչատրյանը ևս կարևորեց թեմայի ընտրությունը:
«Ես հանդիպեցի Պետրոսի հետ, նա ասեց, որ ֆիլմի գաղափար ունի Հովիկ Աֆյանի գրքի հիման վրա, իսկ հետո
կարդացի գիրքը՝ անմիջապես հասկացա՝ սա պետք է դառնա ֆիլմ։ Կան թեմաներ, որոնք հավերժ են՝ սեր, պատերազմ, սպասում…
Շատ հազվադեպ են ստեղծվում ֆիլմեր պատերազմի մասին՝ խաղաղության տեսանկյունից։ Հովիկը շատ հստակ է այդ գաղափարը հասցրել։
Դժվար էր ընտրել, թե ինչ թողնել, ինչ հանել, որովհետև գրքում ամեն ինչ կարևոր էր։ Բայց Պետրոսի հետ կարողացանք գտնել հիմնական սյուժետային գիծը ու կարծում եմ՝ վատ սցենար չենք գրել։ Իսկ քանի որ Պետրոսը հրաշալի ռեժիսոր է, վստահ եմ՝ ֆիլմն էլ է այդպիսին լինելու»,- ամփոփեց սցենարի հեղինակը:
HK Productions-ի կողմից նկարահանվող հաջորդ ֆիլմին կանդրադառնանք առաջիկայում: