«Թատրոնը միակ տեղն է, որտեղ միշտ կարող ես մնալ դերասան». Նիկոլայ Ավետիսյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Դեպի բեմ՝ պատահական, բայց ճակատագրական քայլով

Նիկոլայը դերասանի մասնագիտությունն ընտրել է գրեթե պատահաբար՝ դպրոցական թատերական խմբակի շնորհիվ։ Նրա ընկեր Հայկը՝ Սոս Սարգսյանի թոռը, հավատացել էր նրա տաղանդին և առաջարկել հանդիպել Սոս Սարգսյանին։ 
«Նա լսեց ինձ ու ասաց, որ կդառնամ դերասան։ Դա ինձ համար մեծ ազդակ էր՝ շարունակելու այս ուղին։ Այդ օրից մինչև հիմա իմ կյանքը կապված է բեմի հետ»,-հիշեց նա։

Tert.am Life-ը զրուցել է դրամատիկական թատրոնի երիտասարդ դերասան Նիկոլայ Ավետիսյանի հետ՝ պարզելու նրա անցած ճանապարհը, ձեռքբերումներն ու ապագա պլանները։

Առաջին փորձությունները դրամատիկական թատրոնում
16 տարեկանում, երբ առաջին անգամ հայտնվեց թատրոնում, զգաց, որ գիտելիքներով շատ հետ է ավագ գործընկերներից։ «Վեց ամիս օր ու գիշեր գիրք էի կարդում, որպեսզի կարողանամ նրանց հետ խոսելու ընդհանուր թեմաներ ունենալ»,- պատմեց նա։ Բայց նույնիսկ տարիների փորձից հետո, նոր դերի դեպքում նույն անհանգստությունն է զգում․ «Յուրաքանչյուր նոր դեր սթրես է, որովհետև միշտ թվում է, թե չի ստացվի»,- Tert.am Life-ի հետ զրույցում անկեղծացավ դերասանը:

«Թատրոնն իմ ամբողջ երիտասարդությունն է վերցրել…» 
Նրա համար կարևոր դերերից մեկը եղել է «Ձուկն առանց ջրի» ներկայացման մեջ՝ որտեղ խաղացել է Արթուր Ութմազյանի հետ։ Այդ աշխատանքը նրան բերեց «Տարվա երիտասարդ դերասան» մրցանակը։ Մինչ այդ էլ առաջին մեծ դերը ստացել էր Գրիգոր Խաչատրյանի բեմադրած ամանորյա ներկայացման մեջ՝ թզուկի կերպարը, որը դարձել էր դրամատիկական թատրոնում իր «մեծ մուտքը»։
«Թատրոնը իմ ամբողջ երիտասարդությունն է վերցրել։ Եղել են հնարավորություններ ավելի շատ վաստակելու, բայց ես մնացել եմ այստեղ, որովհետև թատրոնը պահում է դերասանի ձևը, մշտապես մարզում է»,-ասաց Նիկոլայը։

Սերիալներ և կինո
Նիկոլայը նախընտրում է կարճ՝ 16 մասանոց սերիալներ, որոնք, ըստ նրա, վերջին տարիներին որոշակի առաջընթաց են արձանագրել։ «Թատրոնը, համեմատության կարգով, հիմա ավելի բարձր մակարդակի վրա է, քան կինոն։ Բայց կան նաև լավ սերիալներ»,- նշեց մեր զրուցակիցը: 
Նա նկարահանվել է «Պատվի համար», «Սուրբը», «Վենդետա» սերիալներում, իսկ այժմ նկարահանում է «Манюня. детство Ба» ռուսալեզու սերիալում՝ Նարինե Աբգարյանի «Մանյունյա»-ի նորացված տարբերակի հիման վրա։ Ռեժիսորը Արման Մարությանն է, ֆիլմի գլխավոր հերոսներին մարմնավորում են Նիկոլայն ու դերասանուհի Աննա Մանուչյանը: 
Զուգահեռ նկարահանվում է նաև պատերազմական թեմայով գեղարվեստական ֆիլմում,  ըստ նրա՝ առաջին անգամ այս թեմային մոտենում են  այլ ձևով։

«Սկզբում չէի հավատում նման ծանոթություններին, բայց դա վերածվեց իրական սիրո…»
 Նիկոլայը կնոջ՝ լրագրող Կարինայի հետ ծանոթացել է Ինստագրամի միջոցավ։ «Սկզբում չէի հավատում նման ծանոթություններին, բայց դա վերածվեց իրական սիրո։ Նա իմ կյանքի հստակությունն է, ես ավելի թռուցիկ եմ ամեն հարցում: Այդ բալանսն է, որ մեզ առաջ է տանում»,- պատմեց դերասանը։

Երազանքներն ու թատրոնի ապագան
Նիկոլայը չի նշում կոնկրետ դեր, որի մասին երազում է․ «Կան նպատակներ, բայց ամենամեծ երազանքս խելացի երեխա ունենալն է»։
Նա նաև հպարտությամբ խոսում է դրամատիկական թատրոնի նոր զարգացումների մասին, որի տնօրենն այժմ Գրիգոր Խաչատրյանն է․ «Հանդիսատեսին սպասվում են նոր, հետաքրքիր ներկայացումներ։ Թատրոնը պատրաստվում է ներկայանալ նորովի»։