«Այս դերասաններին նման ձևաչափով երբեք չենք տեսել»․ «Օպերացիա Հովաշեն». նոր սիթքոմ հայկական իրականության մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Արմենիա հեռուստաընկերության եթերում մեկնարկում է նոր հումորային նախագիծ՝ «Օպերացիա Հովաշեն» սիթքոմը: Թեթև, բայց նաև ուսուցողական նախագծի վրա աշխատում է պրոֆեսիոնալ թիմ։ Ներգրավված են սիրված դերասաններ, որոնք հեռուստադիտողին ներկայանալու են բոլորովին նոր ձևաչափով:

«Ամբողջ աշխարհում ընդունված պրակտիկա է․ հայտնի ֆիլմերը վերցվում են և ադապտացվում տեղական իրականությանը։ Մենք ընտրել ենք կոմեդիա և փորձել այն ներկայացնել հայկական առօրյայում։ Համոզված եմ՝ սիթքոմը սիրված է լինելու բոլորի կողմից։ Ամեն ինչ արվում է բարձր մակարդակով»,-Tert.am Life-ի հետ զրույցում նշեց նախագծի պրոդյուսեր Վահան Թովմասյանը։

Սիթքոմի պրեմիերան կկայանա սեպտեմբերի 8-ին։ Դերասանական կազմում ընդգրկված են Ալբերտ Սաֆարյանը, Էվա Խաչատրյանը, Բոնին, Հայկ Հովհաննիսյանը, Լիլիթ Թոխատյանը, Սեդա Սարգսյանը, Կարո Հովհաննիսյանը և Օնո Մանուկյանը։  Ֆիլմի ռեժիսորը Գևորգ Ենոքյանն է: 

Tert.am Life-ը ներկա է եղել ֆիլմի նկարահանումներին, զրուցել դերասանների հետ ու առանձնացրել կադրից դուրս մնացած հետաքրքիր դրվագները:

«Այս դերը շատ անսովոր է ինձ համար». Ալբերտ Սաֆարյան

«Այս ընտանիքի հայրն եմ, ով ինչ-որ չափով թերացել է երեխաների դաստիարակության մեջ։ Երեք տարբեր կանանցից երեք երեխա ունի, և ես փորձում եմ այդ ընտանիքը հավաքել ու միասին խելքի բերել։ Կերպարս՝ Կառլենը, մարդ է, որ հարստացել է, բայց ստիպված է երեխաներին սովորեցնել, որ գումար աշխատելը հեշտ չէ։ Այս դերը շատ անսովոր է ինձ համար․ նման կերպարի դեռ չեմ հանդիպել։ Հուսով եմ՝ հանդիսատեսին դուր կգա»։

 «Կերպարս՝ Զավենը սիրում է աղջիկներին». Հայկ Հովհաննիսյան

«Իմ կերպարը Զավենն է։ Նա վստահ է, որ բոլոր աղջիկներն էլ փողի գերին են։ Բայց տեղափոխվելով գյուղ՝ հասկանում է, որ իրականում ամեն ինչ այդպես չէ։ Զավենը սիրահարվում է գյուղի սովորական աղջկա, և այդտեղ բախվում են երկու աշխարհներ։ Սա սիթքոմի ամենահետաքրքիր կողմերից է։ Հեռուստադիտողը կտեսնի, թե ինչպես է ընտանեկան կյանքը փոխվում, երբ բոլորը սովոր են շքեղությանը, բայց ստիպված են իրենց քրտինքով գումար աշխատել»։

«Իմ կերպարը՝ մունաթով հարուստ աղջիկ». Լիլիթ Թոխատյան

«Նախագծում մարմնավորում եմ Գաբիին։ Նա հարուստ ընտանիքից է, բայց գյուղ տեղափոխվելուց հետո բախվում է իրական դժվարությունների։ Գաբին սովոր է, որ իրեն միշտ ծառայեն, իսկ հիմա պետք է ինքը սովորի աշխատել։ Կերպարս շատ տարբեր է այն աղջիկներից, որ մինչ այժմ խաղացել եմ։ Հիմա առաջին անգամ փորձում եմ մունաթով կերպար, և դա ինձ համար նոր ու հետաքրքիր փորձ է։ Հուսով եմ՝ հանդիսատեսը կհավանի ու չի զայրանա իմ նոր կողմի համար»։

«Նկարահանումների ընթացքում մեզ մոտ միշտ ծիծաղ կա». Եվա Խաչատրյան

«Իմ կերպարը Մարգոն է՝ ընտանիքի մայրը։ Նա տաքարյուն է, էքսցենտրիկ, հավատում է էներգիաներին ու յոգայով է զբաղվում։ Ի տարբերություն երեխաների, Մարգոն ծագումով հարուստ ընտանիքից չէ և գիտի ինչ է դժվար կյանքը։ Տուն տեղափոխվելուց հետո ստիպված է անել այն ամենը, ինչ երբեք չի արել՝ մաքրել, պատրաստել։ Կարծում եմ՝ նրա իրավիճակային հումորը շատ հետաքրքիր կլինի հանդիսատեսի համար։ Նկարահանումների ընթացքում մեզ մոտ միշտ ծիծաղ կա, նույնիսկ զավեշտալի դեպքեր են լինում։ Օրինակ՝ Բոնին նկարահանումների ժամանակ ճկույթն է կոտրել, բայց նույնիսկ այդ իրավիճակը դարձավ հումորային»։

«Համոզված եմ՝ հանդիսատեսը շատ կծիծաղի». Բոնի  

«Այս սիթքոմում իմ կերպարը տարբեր է նախորդներից։ Այստեղ ես խոսում եմ իմ իսկ ձայնով, շարժումները նույնպես իմն են։ Կերպարս ավելի բիզնես մտածելակերպ ունի, ինչը ինձնից հեռու է։ Բայց հուսով եմ՝ այս նախագծից հետո ես էլ կունենամ այդ մտածելակերպը։ Համոզված եմ՝ հանդիսատեսը շատ կծիծաղի, որովհետև սա իմ ամենազավեշտալի դերերից է»։

  

Հետևեք մեզ՝ այստեղ