Պետք է մի կողմ թողնել բոլոր հարցերը, էմոցիաները, երազանքները, մեկը մյուսին վիրավորելու արատավոր պրակտիկան և սկսել քննարկել՝ ինչպես է լուծվելու մեր պետության և տարածաշրջանի անվտանգության խնդիրը․ Ավետիսյան

Անկեղծ մտածում էի, որ Հայաստանի նախկին նախագահները այսօր միմիայն այս հարցը պետք է քննարկեն, քանզի Հայաստանի գործող իշխանությունը, առանց թաքցնելու, բացեիբաց պնդում է, որ Հայաստանի անվտանգության համակարգը կառուցվելու է դեպի Արևմուտք։

 

Հիմա ընդդիմությունը պետք է կամ հակադարձի այս թեզերին՝ պնդելով, որ չի կարող Հայաստանի անվտանգություն լինել առանց Ռուսաստանի և չի կարող մեր տարածաշրջանում լինել խաղաղություն առանց Ռուսաստանի անվտանգության ճարտարապետության, կամ պետք է հայտարարի, որ այս ամենակարևոր հարցում համակարծիք է գործող իշխանության հետ։ Այդ դեպքում բանական մարդիկ եզրակացություն կանեն, որ եթե այս հարցում ընդդիմությունն ու իշխանությունը համակարծիք են, ապա մնացած բոլոր հարցերը դառնում են երկրորդական, և ընդդիմությունը ինքը, որպես այդպիսին, կորցնում է ընդդիմություն լինելու իր դերակատարումը։

 

Ես կրկին անգամ ուզում եմ հիշեցնել մեր քաղաքական այսպես կոչված էլիտաներին, որ Հայաստանի և մեր ռեգիոնի անվտանգության խնդիրը լուծված չէ, և մենք ունենք իրական անվտանգության խնդիր։ Հետևաբար պետք է մի կողմ թողնել բոլոր հարցերը, էմոցիաները, երազանքները, մեկը մյուսին վիրավորելու արատավոր պրակտիկան և սկսել քննարկել՝ ինչպես է լուծվելու մեր պետության և տարածաշրջանի անվտանգության խնդիրը։

 

Եվ եթե ընդդիմադիրները չեն ուզում այս հարցը քննարկել, ապա նրանք պարտավոր են ազատել ընդդիմադիր հարթակը՝ թույլ տալու, որպեսզի Հայաստանում իսկապես ձևավորվի հայ-ռուսական հարաբերությունները կարևորող, այդ հարաբերությունների այլընտրանքը հանուն Հայաստանի Հանրապետության անվտանգության հարթություններում չտեսնող նոր ընդդիմություն։ Հակառակ պարագայում այն, ինչ անում են այսօր նախկին նախագահները և գործող այսպես կոչված ընդդիմությունը, մեր պետության շահերը և մեր երկրի անվտանգության խնդիրը չլուծող գործունեություն է։