Բացառությամբ Վարդենյաց լեռնանցքի` Հայաստանի բոլոր ավտոճանապարհները բաց են

ОБЩЕСТВО 9 Февраль, 2016 17:05

Հայաստանի Հանրապետության միջպետական և հանրապետական նշանակության ավտոճանապարհների ձմեռային պահպանության աշխատանքներն ընթանում են ըստ նախօրոք հաստատված կարգի՝ շաբաթվա բոլոր օրերին, 24-ժամյա ժամանակացույցով: Հանրապետության թե՛ հյուսիսում, թե՛ հարավում ճանապարհների մաքրման, աղ ու ավազով մշակման աշխատանքներ են իրակ անացնում 35 ճանապարհաշինական ընկերություններ: Նրանք սպասարկում են 17 միջպետական և 85 հանրապետական նշանակության ավտոճանապարհներ ամբողջ հանրապետությունում: Բոլոր ընկերություններն ունեն անհրաժեշտ քանակությամբ ձյուն մաքրող տեխնիկա, աղ ու ավազ: Ընկերություններում կուտակված է մոտ 1356 տոննա աղ և 36.905 խմ ավազ: Այս մասին«Արմենպրես»-ին տեղեկացրին ՀՀ տարածքային կառավարման եւ արտակարգ իրավիճակների նախարարությունից:

Սևան-Զովաբեր ավտոճանապարհը, որտեղ երեկ գիշեր բուք ու տեսանելիության ցածր մակարդակ է եղել, այսօր արդեն բաց է բոլոր տեսակի տրանսպորտային միջոցների համար: Ճանապարհը սպասարկող «Գոլդեն-Քարափ» ՍՊ ընկերության ղեկավար Նորիկ Սիմոնյանը նշեց, որ ամբողջ գիշեր ճանապարհաշինարարները մաքրել ու լայնացրել են ճանապարհը: Այժմ տեղումները թեև դադարել են, սակայն ձյուն մաքրող մեքնենամեխանիզմներն ու բանվորական ուժն այս պահին էլ շարունակում են աշխատել:

Վանաձոր-Ալավերդի ճանապարհը նույնպես բաց է: Այս հատվածում առանց տեղումների եղանակ է, ճանապարհին մերկասառույց չկա: Անդրադառնալով մամուլի հրապարակումներից մեկին, թե գիշերն այստեղ մերկասառույցի պատճառով ճանապարհի խցանումներ են առաջացել, ճանապարհահատվածը սպասարկող «Լոռի ՃՇՇ» ՓԲ ընկերության ղեկավար Արայիկ Վարդանյանը նշեց, որ Վանաձոր-Ալավերդի ճանապարհը չէ վարորդներին անհարմարություններ պատճառել: Խնդիրը մեծ քանակությամբ բեռնատարների շարժն է եղել, որոնցից մի քանիսն ընթացել են դանդաղ՝ առաջացնելով խցանում, սակայն ճանապարհային ոստկանների ժամանելուց հետո խնդիրը հարթվել է: Ընկերության ղեկավարը վարորդներին հորդորեց ամառային կամ մաշված անվադողերով ճանապարհ դուրս չգալ և չվտանգել ուրիշների և սեփական կյանքը:

Այս պահի դրությամբ հանրապետության բոլոր ավտոճանապարհները բաց են ու անցանելի, բացառությամբ Վարդենյաց լեռնանցքի, որտեղ արդեն քամին դադարել է, և ճանապարհաշինարարները սկսել են մաքրման աշխատանքները:

Հիշեցնենք, որ Հանրապետությունում ավտոճանապարհների վիճակի մասին տեղեկությունների համար կարող եք զանգահարել ՀՀ տրանսպորտի և կապի նախարարությունում գործող թեժ գծին՝ (010) 56-25-33 քաղաքային հեռախոսահամարով: