Արմեն Ջիգարխանյանի կանայք. լուսանկարներ

Wnews.am-ը գրում է.

Խարիզմատիկ, հաջողակ ու սիրված. Խորհրդային շրջանի ամենատաղանդավոր դերասաններից մեկը համարվող Արմեն Ջիգարխանյանի կյանքում կանանց պակաս չի զգացվել։  Ո՞վ չի երազում իր կողքին  նման հատկանիշներով տղամարդու տեսնել։ Երազանքը երազանք, իսկ իրականությունն այն է, որ բազում կանայք մինչեւ օրս էլ Ջիգարխանյանին իդեալական տղամարդու խորհրդանիշ են համարում։ Ջիգարխանյանն էլ, գտնում է, որ սերը տարիք չի հարցնում եւ անգամ 80 տարեկանում սիրավեպ է սկսել 36-ամյա կնոջ հետ։

Բայց, սկսենք ամենասկզբից. Wnews.am-ը ներկայացնում է հայ սրտակեր դերասանի կյանքի կանանց։

Ինչպես միլիոնավոր  մարդկանց, այնպես էլ Արմեն Ջիգարխանյանի կյանքը միշտ չէ հարթ եղել։ Նրա առաջին կինը Երեւանի Ստանիսլավսկու անվան դրամատիկական թատրոնի դերասանուհի Ալլա Վանովսկայան էր: Ջիգարխանյանն  իսկապես մեծ կիրք էր տածում առաջին կնոջ հանդեպ։

1964 թ. ծնվեց նրանց դուստր Ելենան, ում անունը կնքեցին Ջիգարխանյանի մոր պատվին։ Ալլա Վանովսկայան Ջիգարխանյանին խելագարի պես  խանդում էր։ Կասկածի տակ էին ընկնում նրան ծանոթ բոլոր կանայք։ Վանովսկայայի խանդը խորացավ հոգեկան հիվանդության ֆոնին, իսկ դերասանը վախենում էր իրենց դստեր համար։ Մի օր նա պարզապես վերցրեց երեխային եւ կնոջից ընդմիշտ հեռացավ։ Կինն ինքնասպան եղավ։

Երկար տարիներ Ջիգարխանյանը գաղտնի էր պահում իր առաջին ամուսնության մասին ճշմարտությունը։ 1987 թ. դերասանի կյանքում եւս մեկ դժբախտություն պատահեց. ավտոմեքենայում խեղդամահ եղավ նրա  23-ամյա դուստրը։

Արմեն Ջիգարխանյանի երկրորդ կինը Տատյանա Վլասովան էր, ում հետ նա ամուսնացավ առաջին կնոջից բաժանվելուց անմիջապես հետո։

Ջիգարխանյանը խոստովանում է, որ իրենց ամուսնությունն այնքան անսպասելի եւ արագ է ստացվել, որ չեն հասցրել անգամ ամուսնության մատանի գնել, ուստի Արմենը կնոջ մատին դրել է իր տատիկից ժառանգած ամուսնական մատանին։ Ամուսնության սկզբնական շրջանում, չունենալով իրենց տունը, Արմեն Ջիգարխանյանն ու Տատյանան տեղավորվել էին թատրոնի նկուղում: Նրանք իրենց հարսանիքին կանչեցին միայն 2 վկայի: Բոլորը կարծում էին, որ այս ամուսնությունը երկար չի տևի, սակայն սխալվում էին։

1999 թ. Արմեն Բորիսովիչը ԱՄՆ-ի գրին քարտ է ստանում եւ կնոջ հետ տարվա մեջ մի քանի ամիս անցկացնում Միացյալ Նահանգներում, որտեղ ունի յոթ սենյականոց առանձնատուն, որը նվեր է երկրպագուներից մեկից։

Տատյանան առաջին ամուսնությունից որդի ուներ՝ Ստյոպան, ով մեծացել է Ջիգարխանյանի դստեր՝ Լենայի հետ։ Ջիգարխանյանը որդեգրել է Ստյոպային եւ մեծացրել հարազատ որդու պես։ 

Որոշ ժամանակ անց դերասանի կինը բնակություն է հաստատում ԱՄՆ-ում, որտեղ Դալլասի համալսարանում ռուսերեն էր դասավանդում, իսկ Արմեն Ջիգարխանյանի կյանքը մեծ մասամբ ընթանում էր Ռուսաստանում։

Ամուսնությունը տեւեց 40 տարի, որից 6 տարին զույգը գրեթե չէր շփվում։

2009 թ., երբ Արմեն Ջիգարխանյանը  ստացավ երկորդ միկրոինսուլտը, նրա կողքին հայտնվեց Վիտալինա անունով մի կին, ով նախկին դաշնակահարուհի էր: Վիտալինան Մոսկվայի դրամատիկական թատրոնի երաժշտական բաժնի պատասխանատուն էր: Ջիգարխանյանի կողքին նրա հայտնվելը սկանդալ առաջացրեց թատրոնում, բոլորը մեղադրում էին նրան Արմեն Բորիսովիչի վրա ունեցած վատ ազդեցության համար: Ոմանք անգամ հեռացան թատրոնից՝ պահանջելով Տատյանայի վերադարձը:

Նախորդ տարի, երբ լրացավ  Արմեն Ջիգարխանյանի 80-ամյակը, նա վերջնականապես բաժանվեց ԱՄՆ-ում գտնվող Տատյանայից եւ կյանքի նոր փուլ մտավ 36-ամյա Վիտալինա Ցիմբալկուկ-Ռոմանովսկայի հետ։

Ջիգարխանյանի երիտասարդ սերը խոստովանում է, որ Արմենը դեռ մանկուց իր կուռքն է եղել։ «Ես նրան սիրահարվեցի, երբ 16 տարեկան էի։ Ամեն ինչ սկսեց նամակից։ Ես պարզապես Արմեն Բորիսիչին նամակ գրեցի, որը նրան փոխանցեցին եւ նա կարդաց։ Երեւի դերասանին նամակն այնքան անկեղծ թվաց, որ նա համաձայնեց հանդիպել ինձ։ Մենք միասին թեյեցինք, շփվեցինք, նա ինձ վրա մեծ տպավորություն թողեց։ Այդ ժամանակ ես իհարկե չէի մտածում, որ մենք միասին կլինենք։ Ավելի ուշ, 2000-ականների սկզբին մենք սկսեցինք հանդիպել։ Սկզբում տեսնվում էինք Կիեւում։ 

Երբ Հունաստան էի մեկնել, Ջիգարխանյանի հարցազրույցի շնորհիվ տեղյակ էի, որ նրա ամենասիրած կերպարը Սոկրատն է, ուստի այնտեղից Արմենի համար Սոկրատի արձանը գնեցի։ Երբ Մոսկվա եկա, հանդիպեցի նրան եւ նվիրեցի արձանը։Երբ Արմենը հիվանդ էր, ամեն օր նրա մոտ հիվանդանոց էի գնում։ Այդտեղից էլ սկսվեց մեր մտերմությունը»,- պատմում է Ջիգարխանյանի երիտասարդ սիրուհին։

Նրա խոսքով, իրեն շատ կանայք են նախաձնում եւ նա հասկանում է բոլոր այդ կանանց։

«Ինձ չի կաշկանդում Արմեն Ջիգարխանյանի տարիքը։ Ինչ տարբերություն, թե նա քանի տարեկան է նա, չէ՞ որ նա Ջիգարխանյանն է։ Ինձ թվում է Արմեն Բորիսիչը երեւույթ է, տղամարդ՝ առանց տարիքի։ Նա ինչպես ֆիզիկապես, այնպես էլ հոգեպես, լավ ֆորմայի մեջ է»,- ասում է Վիտալինան։