Ուսուցիչները ԳԹԿ-ից պահանջում են մինչև երկուշաբթի 4 քայլ կատարել

ОБЩЕСТВО 27 Декабрь, 2025 20:55

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Այս պահին ԳԹԿ-ից պահանջվում են ոչ բացատրություններ, զանգեր, այլ անմիջական իրավական քայլեր»,-մի խումբ ուսուցիչներ հրապարակային կերպով բաց նամակ են ուղղել ԳԹԿ-ին՝ ներկայացնելով խնդիրներն ու իրենց պահանջները։

Նամակում ասված է.

ՊԱՏԱՍԽԱՆԱՏՎՈՒԹՅԱՆ ԵՎ ԺԱՄԿԵՏՆԵՐԻ ՄԱՍԻՆ

Մեր ներկայացրած զեկույցը և պահանջները վերաբերում են ուսուցիչների աշխատանքային իրավունքներին, վարչական ակտերի իրավաչափությանը և մարդու արժանապատվության և սոցիալական վիճակի պաշտպանությանը, ուստի ենթակա են սեղմ ժամկետներով քննության։

ԳԹԿ-ն պարտավոր է

• մինչև 15 օր /որը լրանում է 29.12.2025թ./ տրամադրել գրավոր, պաշտոնական պատասխան՝ զեկույցում արձանագրված խախտումների և ներկայացված պահանջների վերաբերյալ (ՀՀ «Դիմումների և բողոքների մասին» օրենքի հիմքով)։
• անմիջապես, այսինքն՝ առանց ժամկետի սպասման, կասեցնել վիճարկելի թեստերի հիման վրա ուղարկվող բոլոր ծանուցումները, քանի որ դրանք ունեն անմիջական և անդառնալի աշխատանքային հետևանքներ։

ԿԳՄՍ նախարարությունը պարտավոր է

• մինչև 15 օր արձագանքել որպես վերադաս մարմին՝ գնահատելով ԳԹԿ-ի գործողությունների իրավաչափությունը և ապահովելով վարչական վերահսկողություն։

Մարդու իրավունքների պաշտպանը պարտավոր է

• անհապաղ արձագանքել, քանի որ առկա են՝ աշխատանքի կորստի ռիսկեր, հոգեբանական ճնշումներ և հավասարության սկզբունքի խախտումներ։

Եթե սահմանված ժամկետներում պատասխան չի տրամադրվում, դա օրենքի տեսանկյունից դիտարկվում է որպես վարչական անգործություն, որը բացում է ճանապարհը վերադաս բողոքների և վարչական դատարան դիմելու համար։

Ի՞նչ պետք է արդեն արված լիներ, կամ ամենաուշը՝ մինչև երկուշաբթի արվի:

Մենք ըմբռնումով ենք մոտենում տարեվերջյան ծանրաբեռնվածությամբ աշխատող բոլոր մասնագետների և պետական կառույցների նկատմամբ։ Սակայն անհրաժեշտ է հաշվի առնել, որ խնդիրը այլևս տեսական կամ ընթացակարգային չէ։

Այս պահին առկա է անմիջական վնաս․ որոշ դպրոցների տնօրեններ արդեն ձեռնմուխ են եղել վիճարկելի ատեստավորման արդյունքների հիման վրա ուսուցիչներին ծանուցումներ բաժանելուն, հաճախ՝ անօրինական ձևաչափերով, մարդկանց դնելով հոգեբանական սթրեսի, աշխատանքի կորստի և արժանապատվության խախտման առաջ։

Այդ պայմաններում լռությունը կամ սպասումը չեն կարող արդարացվել ծանրաբեռնվածությամբ, քանի որ խոսքը գնում է աշխատանքային իրավունքների, վարչական ակտերի իրավաչափության և մարդու հիմնարար անվտանգության մասին։ Ուստի, արդարության, համաչափության և իրավական վստահության սկզբունքներից ելնելով, մինչև այս պահը, կամ ամենաուշը՝ մինչև երկուշաբթի, պետք է արդեն իսկ իրականացված լինեին հետևյալ գործողությունները.

Քայլ 1.

Անմիջապես քայլեր ձեռնարկել՝ կասեցնելու համար ատեստավորման տվյալ փուլում չանցողիկ միավորների հիման վրա ուղարկվող բոլոր ծանուցումները, որոնք տրվել են տնօրենների կողմից մասնագետներին։

Վիճարկելի թեստի հիման վրա ուղարկված ծանուցումները չեն կարող համարվել իրավաչափ վարչական ակտեր։

Քայլ 2.

Պաշտոնապես արձանագրել, որ տվյալ փուլում կիրառված թեստերում առկա են եղել նորմատիվ և մեթոդաբանական խախտումներ, որոնք ազդել են արդյունքների օբյեկտիվության վրա։

Քայլ 3.

Մինչ այդ խախտումների ամբողջական քննությունը չեղարկել չանցողիկ միավորների բոլոր իրավական և աշխատանքային հետևանքները՝ առանց բացառության։

Քայլ 4.

Նախաձեռնել անկախ մասնագիտական գնահատում՝ դուրս ԳԹԿ ներքին շրջանակից, և դրա արդյունքները ներկայացնել հանրությանը։

Կոնկրետ օրինակ՝ դասվարների և ֆիզիկայի ուսուցիչների մասով

Եթե նորմատիվով սահմանված է եղել, որ դասվարների ատեստավորման թեստը պետք է բաղկացած լինի 60 հարցից, սակայն փաստացի կիրառվել է 71 հարց, իսկ ֆիզիկայի ուսուցիչների համար սահմանված 40 հարցի փոխարեն կիրառվել է 37, ապա տվյալ թեստը կիրառվել է սահմանված կարգից դուրս՝ խախտելով թեստի կառուցվածքի սահմանված պահանջները։

Այս պայմաններում

հարցերի հետին թվով կրճատումը անթույլատրելի է, արդյունքների մասնակի վերաշարադրումը՝ անօրինական, իսկ այդ թեստի հիման վրա ուսուցիչներին ուղարկվող ծանուցումները՝ իրավական ուժ չունեցող։

Ուսուցիչը գործել է իրեն ներկայացված պայմաններով։ Պետական մարմնի թույլ տրված սխալի ռիսկը չի կարող տեղափոխվել ուսուցչի վրա։

Այսպիսով, մինչև խնդրի ամբողջական, իրավաչափ և արդար լուծումը՝ ցանկացած ծանուցում, ցանկացած ճնշում, ցանկացած վարչական կամ աշխատանքային հետևանք ոչ միայն անարդար է, այլ նաև չունի օրինական հիմք։ Սխալը չի ուղղվում լռությամբ կամ մասնավոր զանգերով՝ առանձին դեպքերի «կարկատմամբ»։ Սխալը չի ուղղվում ուսուցչի հաշվին։ Սխալը պետք է ուղղվի համակարգային եղանակով՝ չվնասման և արդարության սկզբունքով»։

Հետևեք մեզ՝ այստեղ