Միհրան Ծառուկյանի, Մհերի, Քրիստինե Պեպելյանի եւ Արամեի համատեղ համերգից հետո երեւանյան համերգները հնարավոր է ավելի հաճախակի բնույթ կրեն

Փետրվարի 18-ին Արամ Խաչատրյանի համերգասրահում համատեղ համերգով հանդես կգան Միհրան Ծառուկյանը, Մհերը, Քրիստինե Պեպելյանն ու Արամեն: Այս մասինLife.panorama.am-ին հայտնել է համերգի կազմակերպիչ Հարություն Էքիզյանը:

«Համերգը տեղի կունենա փետրվարի 18-ին, որում ընդգրկել ենք մեր ամենապահանջված երգիչներից չորսին՝ Միհրան Ծառուկյանին, Մհերին, Քրիստինե Պեպելյանին եւ Արամեին: Իհարկե, մենք ունենք էլի մի շարք բարձր վարկանիշով երգիչներ, որոնց եւս կցանկանայինք հրավիրել, սակայն նրանք այս շրջանում քաղաքում չէին լինելու: Համերգը կոնկրետ խորագիր չի ունենալու, սա կոմերցիոն համերգ է, որի վերաբերյալ նպատակներ ունենք՝ շատ ենք ուզում, որ սա շարունակական բնույթ կրի եւ առաջիկայում հաճախ կազմակերպենք նման համերգներ: Միաժամանակ, չեմ կարող չնկատել, որ նմանատիպ համերգների հաճախականությունը կախված կլինի սրանից, եթե սա կոմերցիոն առումով արդարացվի, ուրեմն այն շարունակական բնույթ կկրի, իսկ եթե ոչ, հնարավոր է՝ մի քանի համերգից հետո դադարացվի»,- նշեց կազմակերպիչը:

Այն նկատառմանը, որ վերջին տարիներին կատարողներից շատերը սրտնեղում են, որ համերգներ չեն կազմակերպվում, միաժամանակ դրա խնդիրը հիմնականում տեսնում են պահանջարկի բացակայության մեջ, Հարություն Էքիզյանը պատասխանեց. «Դեռեւս մեկնաբանություն չեմ ուզում տալ այդ հարցի շուրջ՝ սպասելով այս համերգի իրականացմանը: Իհարկե, վերջին հինգ տարիներին համերգներ շատ հաճախ չեն կազմակերպվում, որովհետեւ կա համացանց, որի միջոցով մարդիկ «You Tube»-ով իրենց ցանկացած կատարումները լսում են, բացի այդ, երկրի տնտեսական վիճակն էլ թույլ չի տալիս, որ մարդիկ թեկուզ 3000 դրամ տան, տոմս գնեն ու գնան համերգի»:

Հետաքրքրվելով, թե նախատեսվելիք համերգի տոմսերի արժեք որքա՞ն է լինելու, կազմակերպիչը նկատեց. «Տոմսերի արժեքը կսկսվի 3000-ից ու կհասնի 10.000-ի: Տոմսերի վաճառքը դեռեւս այնքան էլ ակտիվ չի, բայց շուտով, երբ գովազդային արշավը ավելի ծավալուն լինի, հուսամ, վաճառքն էլ կակտիվանա»:

 

Զրույցի ընթացքում անդրադարձանք նաեւ կազմակեպվող համերգների ոչ այնքան ճոխ բեմահարթակների խնդրին. «Սա կրկին գումարների հետ է կապված, շուկան թույլ չի տալիս ժամանակին համընթաց շարժվել: Եթե այսօր տոմսերի վաճառքը միայն բավարարում է երգիչներին հրավիրելուն ու գովազդային արշավին, հետեւաբար ճոխ բեմահարթակների մասին խոսք լինել չի կարող: Եթե համեմատենք նույն մոսկովյան փորձի հետ, այնտեղ տոմսերը կարող են վաճառվել 300.000 դրամի սահմաններում, ուստի նրանց շքեղ բեմահարթակները այդ արժեքին էլ համապատասխան են լինում: Իհարկե, մենք էլ ամեն ինչ անում ենք, որ մեր բեմերն էլ հնարավորինս գեղեցիկ ու լուսային էֆեկտներով հագեցած լինեն: Բացի այս, կարեւոր է նաեւ այն, որ մեր կազմակերպած համերգներին մարդիկ գալիս են եւ կենդանի ձայն են լսում, ինչպես եւ կլինի փետրվարի 18-ին»,- հավելեց Հարություն Էքիզյանը: