«Բաց թող» ֆիլմի պրեմիերան, գրքի շնորհանդեսը, կարմիր գորգն ու հայտնի հյուրերը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Հունվարի 22-ին, «Մոսկվա» կինոթատրոնում կայացավ «Բաց թող» կարճամետրաժ գեղարվեստական ֆիլմի փակ ցուցադրությունը և համանուն գրքի շնորհանդեսը։ «Բաց թող» ֆիլմի գաղափարի հեղինակն ու պրոդյուսերը Լարիսա Խաչատրյանն է, ով ֆիլմի ու գրքի միջոցով ներկայացրել է իր անձնային պատմությունը։ Tert.am LIfe-ը ներկա է եղել ֆիլմի պրեմիերային, զրուցել ստեղծագործական թիմի հետ ու առանձնացրել երեկոյի կարևոր դրվագները։

««Բաց թող»-ը պատասխաններ գտնելու մասին չէ։ Այն սովորելու մասին է՝ ապրել առանց ափսոսանքի, ցավի ու այն ծանր զգացումների, որոնք խանգարում են տեսնել կյանքի գեղեցիկ ու լուսավոր կողմերը։ «Բաց թող»-ը նվիրում եմ իմ ամենաիսկական ընկերոջը՝ հայրիկիս։ Ես դեռ սովորում եմ բաց թողնել, և այս ֆիլմն ու գիրքը այդ ճամփորդության մի մասն են։ Շնորհակալ եմ նկարահանող ամբողջ թիմին, ստեղծագործական կազմին և ընկերներիս, ովքեր օգնեցին ինձ անցնել այս դժվար, բայց սիրով լի ուղին։ Նրանք ոչ միայն զգացին իմ ապրումները, այլև կարողացան դրանք ճշգրտորեն փոխանցել էկրանին», - նշել է ֆիլմի գաղափարի հեղինակ ու պրոդյուսեր Լարիսա Խաչատրյանը։

«Բաց թող» կարճամետրաժ ֆիլմը հոր և դստեր անբեկանելի, ամուր, բայց ցավով ու կարոտով լի կապի մասին պատմություն է՝ հիմնված իրական փաստերի վրա. Սևանի ափի, մանկության հիշողությունների և վերածնվող ցավի միջով անցնելով ֆիլմը բացում է հայ ընտանիքի ներքին վերքերը, այն պահը, երբ հայրերը հեռանում են, իսկ երեխաները՝ ընդմիշտ փոխվում։

Ֆիլմում գլխավոր հերոսուհուն՝ Լառային հասուն տարիքում մարմնավորել է Լուիզա Ղամբարյանը, իսկ մանուկ հասակում՝ Տաթև Ավետիսյանը, Լառայի հորը մարմնավորել է Բաբկեն Չոբանյանը։ Ֆիլմում նկարահանվել են նաև Ջուլիետա Ստեփանյանը, Հրաչյա Գասպարյանը, Ագնեսա Շահնազարյանը։

Բաբկեն Չոբանյանը նշում է, որ ֆիլմի թեման կարևոր է, քանի որ այն անդրադառնում է հասարակության համար ցավոտ ու հաճախ լռության մատնված իրականությանը․ «Բաժանումը միշտ ցավ է, և ոչ բոլորն են կարողանում դրա հետ ապրել։ Այն մեկին կարող է ուժ տալ, մյուսին՝ կոտրել ու թևաթափ անել։ Արտագաղթի հետևանքով բազմաթիվ հայրեր տարիներ շարունակ հեռացել են իրենց ընտանիքներից, ինչի հետևանքով հիմնականում տուժել են երեխաները»,-նշել է Բաբկեն Չոբանյանն ու հավելել,-«Թեման կարևոր էր ինձ համար և ֆիլմը առիթ էր ևս մեկ անգամ այս թեմայի մասին բարձրաձայնելու, թե ինչպես է ծնողների վարքը, ծնողների կյանքն անմիջականորեն անդրադառնում երեխաների վրա։ Սա խնդիր է, որն անմիջապես հարվածում է ընտանիքներին»։

Լուիզա Ղամբարյանն, ով մարմնավորում է Լառային, ընդգծում է, որ ֆիլմում մասնակցելու իր հիմնական խթանն անձնական պատմությունն է․ «Ֆիլմում մասնակցելու հիմնական շարժառիթն իմ անձնական պատմությունն էր՝ հորս հետ ունեցած ամուր կապն ու նրա կորստի ցավը։ Հայրս էր ինձ դեպի արվեստ ուղղորդողն ու առաջին հանդիսատեսը։ Այսօր ամեն ինչ կտայի, որ ծափահարություններից մի քանիսը լինեին ծնողներինս։ Կարոտի, հայրական սիրո և այդ բացակայության մասին ես փորձեցի պատմել արվեստի լեզվով։ Ես ինձ տեսա այս կերպարում, ֆիլմում տեսա ասելիք։ Պետք է շարունակել ապրել նրանց համար, ովքեր քո կյանքում ամենասիրելիներն են եղել, և, որքան էլ դժվար լինի կարոտին դիմանալը, ներսում գտնել մեջ ուժ՝ ամուր կանգնել ոտքերի վրա և ապրել ավելի լավ՝ հանուն նրանց, նրանց երազանքների ու ցանկությունների համար»,-նշել է Լուիզա Ղամբարյանը։

«Բաց թող» կարճամետրաժ ֆիլմի ռեժիսորը Միքայել Բագրազյանն է, սցենարիստն ու համանուն գրքի հեղինակը Գոհար Մեժլումյանը, բեմադրող օպերատորը՝ Արգո Բալոյանը։ Ռեժիսոր Միքայել Բագրազյանի խոսքով՝ կան պատմություններ, որոնք պետք է անպայման բարձրաձայնենք, որպեսզի կարողանանք բաց թողնել։

«Լարիսան ուներ մի ցավ, որ երկար տարիներ պահում էր, բայց ի վերջո որոշեց պատմել աշխարհին։ Ես էլ իմ հերթին փորձեցի ցույց տալ նրան հոգեվիճակի տրանսֆորմացիան։ «Բաց թող»-ը մոռանալու մասին չէ, «Բաց թող»-ը սրտիդ վրա տեղ ազատելու մասին է, որպեսզի նորով լցնես, «Բաց թող»-ը ապրելու մասին է»։

Նույն օրը տեղի ունեցավ նաև «Բաց թող» գրքի շնորհանդեսը։ Ֆիլմի սցենարիստը և համանուն գրքի հեղինակ Գոհար Մեժլումյանը նշեց. «Սա 9 ամիսների երկար, շատ դժվարություններով և սիրով անցած ճանապարհ էր, Լարիսայի հետ օրեր, գիշերներ ամիսներ աշխատել ենք։ Սա գիրք է բոլորիս համար, որտեղ բոլորս գտնելու ենք մեզնից մի մասնիկ։ Նախագծին որոշեցի միանալ, քանի որ այն պատմություն է, որն ապրում է յուրաքանչյուրիս ներսում։ Այն ինքնաճանաչման, ներքին հարցադրումների և դրանց պատասխանները գտնելու ճանապարհի մասին է։ Վստահ եմ, պատմությունը անտարբեր չի թողնի ոչ ոքի և կդառնա ներքին երկխոսության կարևոր սկիզբ։ Հուսամ, որ բոլորդ կտանեք գրքի միջոցով մի մասնիկ և կպահեք ձեր տներում։ Թող բոլորը լինեն իրենց լիարժեք ընտանիքներում»։ «Բաց թող» ֆիլմը նախատեսված է միջազգային կինոփառատոնների՝ դրամայի, ընտանեկան հոգեբանական ֆիլմերի և հեղինակային կինոյի ծրագրերի համար։

Լուսանկարները՝ Ռոբերտ Աբրահամյանի

Հետևեք մեզ՝ այստեղ