Վերին Չարբախում տան հրդեհի ժամանակ երեխաները մենակ են եղել, փոքրը խաղացել է լուցկիով

Հունիսի 2-ին Երեւանի Վերին Չարբախ թաղամասի 3-րդ փողոցի թիվ 45 տանը հրդեհի բռնկման պահին երեխաները տանը մենակ են եղել: Այս մասին այսօր՝ հունիսի 3-ին, NEWS.am-ի հետ զրույցում ասաց  հրդեհի պահին երեխաներին օգնության հասած հարևաններից Կարինե Բաբայանը՝ հավելելով, որ հրդեհը, երեխաների պատմելով, բռնկվել է  3 տարեկան երեխայի` լուցկիով խաղալու հետեւանքով:

 «Նոր հարևաններ են, 1 տարի է` ապրում են այս տանը, երիտասարդ զույգ է, երեխաներն էլ մեկը` 3, մյուսը` 5 տարեկան են, բայց հիմնականում տանը մենակ են մնում, ծնողներն ինչ-որ աշխատանքի են գնում: Երեկ էլ երեխաներից փոքրը լուցկիով գորգի վրա խաղացել է, գորգը վառվել ու հրդեհը տարածվել է ամբողջ տնով մեկ: Երեխաները պատշգամբ էին դուրս եկել ու լացում էին, հազիվ երեք տղաներ եկան ու կարողացան մեկին պատշգամբից, մյուսին էլ պատուհանից դուրս բերել, փառք Աստծու, ոչինչ չէր եղել նրանց»,- պատմեց հարևանուհին:

Հարևաններից  Մարինե Արբրահամյանն էլ նշեց, որ 45 տան բնակիչներին, որոնք ապրում են անմիջապես իր տան վերևում,  հիմնականում  1 տարվա ընթացքում չի տեսել, քանի որ նրանք աշխատանքից ուշ են վերադարձել, իսկ երեխաներին փակել են տանը՝ մենակ:

Հարևանուհին բողոքեց, որ երեկվա հրդեհի պատճառով զգալի վնասվել է իր՝ նոր վերանորոգված տան առաստաղը. «Հրաշքով ենք փրկվել բոլորս, եթե գազը պայթեր, ամբողջ թաղով մեռնելու էինք: Ահավոր սթրես տարանք, հղի հարսս վախից ընկավ, վախեցած վազվզում էինք, գոնե լավ է` երեխաները փրկվեցին»,-ասաց տիկին Մարինեն: 

Նշենք, որ հրդեհի պատճառով ամբողջությամբ այրվել է տան հյուրասենյակը՝ գույքով, մասամբ՝ ննջասենյակը, շքամուտքը եւ պատշգամբը:

Ավելի վաղ տեղեկացրել էինք, որ  Փրկարար ծառայությունը հունիսի 2-ին, ժամը 19.15-ին ահազանգ է ստացել, որ հրդեհ է բռնկվել Երեւանի Վերին Չարբախ թաղամասի 3-րդ փողոցի թիվ 45 տանը: Հրդեհը մեկուսացվել է ժամը 19.42-ին, մարվել` 19.56-ին: Մինչ հրշեջ-փրկարարների կանչի վայր հասնելը՝ երեխաները (3 եւ 5 տարեկան) տնից դուրս են բերվել տեղի ուժերով. վնասվածքներ չունեն: