Շատ ավելի վտանգավոր է, երբ մարդիկ դադարում են ճանաչել կապն իրենց անցյալի հետ. «Փաստ»

«Փաստ» օրաթերթը գրում է.

ritmeurasia.ru–ն ««Իրական Հայաստանի» պատմությունը քաղաքական անպատասխանատվության ապոթեոզն է» վերնագրով հոդվածում գրում է, որ Մոսկվայի պետական համալսարանի Կենտրոնական Ասիայի և Կովկասի ուսումնասիրությունների ամբիոնի վարիչ, պատմական գիտությունների դոկտոր Ալեքսեյ Մուրավյովը նշել է, որ «իրական Հայաստան» հայեցակարգի առաջխաղացումը և պատմական հիշողությունից հրաժարվելու կոչերը սնվում են քաղաքացիների կողմից իրենց անցյալի բարդ նրբերանգների մեջ խորանալու դժկամությամբ, սակայն նման անպատասխանատվությունը սպառնում է լուրջ հետևանքներով։ Մասնագետի խոսքով, պատմությունը վերանայելու մասին քննարկումները անհիմն չեն։ Մարդիկ դժվարանում են ընկալել ժամանակակից Թուրքիայի, Լիբանանի և այլ երկրների տարածքների հետ կապված դարավոր ժառանգությունը։ Սակայն պատմաբանն անպատասխանատվության ապոթեոզ է անվանել պատկերը պարզեցնելու փորձերը՝ «եկեք ամեն ինչ մի կողմ դնենք և առաջ շարժվենք» հայտարարությամբ։ Նա այդ մոտեցումը համեմատել է ամուսնալուծության ժամանակ հոգեվերլուծաբանի խորհրդի հետ՝ «ապրեք այնպես, կարծես ոչինչ չի պատահել», և շփոթված է նրանից, թե ինչպե՞ս կարող է նման տրամաբանությունը պարտադրվել մի ամբողջ ազգի։ Մուրավյովը շեշտել է, որ ազգերը, ինչպես ծառերը, աճում են իրենց արմատներից, և խաբկանք է մտածել, որ պատմությունը մերժելը կտանի «ուր ուզում ես»։ «Նման կերպ կհասնեք հենց այնտեղ, որտեղ պատմությունը կտանի, իսկ հայերի համար դա հազարամյակների հարց է», - հիշեցրել է նա։

Պրոֆեսորի խոսքով, պատմության քաղաքական մանիպուլ յացիաները միշտ ուղղված են ոչ պատմական նպատակներին հասնելուն՝ լինի դա ռեսուրսների վերաբաշխում, թե հակառակորդին անցյալից զրկել։ Սակայն դա շատ ավելի վտանգավոր է, երբ մարդիկ իրենք են դադարում ճանաչել կապն իրենց նախնիների հետ և պատրաստ են ընդունել, որ «պատմություն չեն ունեցել»։

Ավելի վաղ ritmeurasia.ru–ն հաղորդել էր, որ Հայաստանի իշխանությունները մշակել են «իրական Հայաստանի գեղագիտության» հայեցակարգը, որը ենթադրում է մշակութային քաղաքականության վերանայում։ Նիկոլ Փաշինյանը հերքել էր, որ այնպիսի քայլերը, ինչպես, օրինակ՝ Արարատ լեռան պատկերի հեռացումը պաշտոնական նամականիշներից, թելադրված են Թուրքիայի պահանջներով։ Նա դա անվանել է «երկիրը ճիշտ աերոդինամիկայի վրա դնելու» միջոցառում։

Մանրամասները՝ «Փաստ» օրաթերթի այսօրվա համարում