Աղքատների խմիչքից՝ աշխարհի ամենավաճառվողներից մեկը. «Փաստ»

«Փաստ» օրաթերթը գրում է.

 Վերջին 200 տարվա ընթացքում բուրբոնը դարձել է իրապես ամերիկյան ազգային խմիչք: Այդ ըմպելիքը, որը ստացվում է եգիպտացորենի խյուսի թորումից, տարիների ընթացքում աղքատների խմիչքից վերածվել է բարդ ըմպելիքի, որն ունակ է բավարարել ալկոհոլային խմիչքների պահանջկոտ գիտակներին: Այսօր աշխարհում բուրբոնի ամենահին և ամենահայտնի ապրանքանիշերից մեկը Jim Beam բուրբոնն է:

Այդ խմիչքի պատմությունը սկսվել է 1788 թվականին, երբ ԱՄՆ Սահմանադրության ընդունումից հետո Ջեյքոբ Բիմը տեղափոխվեց Արևմուտք։ Նրա իրերի հետ սայլի մեջ նաև պղնձե թորման սարք կար, որի մասին նա երկար ժամանակ չէր հիշում։ Ջեյքոբը Արևմուտքում շատ հեռու չգնաց և բնակություն հաստատեց Կենտուկիում:

Այնտեղ նա ֆերմա և ջրաղաց ձեռք բերեց, որտեղ հացահատիկ էր աղում այլ ֆերմերների համար և, որպես վճար, հացահատիկ էր վերցնում։ Որոշ ժամանակ անց Ջեյքոբը հայտնաբերեց, որ կուտակվել է հացահատիկի բավականին մեծ ավելցուկ։ Չկարողանալով այն վաճառել՝ նա գտավ դրա այլ կիրառություն. նա որոշեց դրանից վիսկի պատրաստել, ինչը գործնական լուծում էր, քանի որ վիսկին ժամանակի ընթացքում չի փչանում, այն հեշտ է տեղափոխվում և, որպես արժույթ, այն ժամանակ երբեմն գնահատվում էր ավելի բարձր, քան ազգային արժույթը: Սկզբից իր պղնձե թորման սարքի օգնությամբ Ջեյքոբ Բիմը սկսեց եգիպտացորենից, տարեկանից և գարու ածիկից վիսկի արտադրել։ 1795 թվականին նա վաճառքի հանեց իր բուրբոնը։

1820 թվականին Ջեյքոբը ձեռնարկության կառավարումը հանձնեց իր որդուն՝ Դեյվիդին։ Այն ժամանակահատվածում, երբ Դեյվիդ Բիմը ղեկավարում էր գործերը, Ամերիկան մեծապես փոխվել էր: Նախ՝ արդյունաբերական հեղափոխությունն էր հասել Միացյալ Նահանգներ: Երկրորդ հերթին՝ արևմուտքում հայտնաբերվել էին ոսկու հանքավայրեր, որոնք սկսել էին մեծ թվով մարդկանց գրավել այդ շրջաններ։ Եվ երրորդն այն էր, որ կառուցվել էր Էյրի ջրանցքը, որը հեշտացնում էր նավարկումը Միսիսիպիով: Այդ բոլոր գործոնները դրական ազդեցություն ունեցան Բիմ ընտանիքի բիզնեսի վրա:

1850-ական թվականներին Բիմ ընտանիքի գործարանը տեղափոխվեց հարևան այլ թաղամաս՝ ավելի մոտ երկաթգծին, ինչը նույնպես դրական ազդեցություն ունեցավ բիզնեսի զարգացման վրա։ Խմիչքը ստացել է իր ժամանակակից Ջիմ Բիմ անվանումն՝ ի պատիվ Ջեյմս Բիմի՝ Ջեյքոբ Բինի ծոռի։ Ջեյմսն սկսել էր արտադրությունը կառավարել 1894 թվականից և ղեկավարել ընտանեկան բիզնեսը հաջորդ հիսուն և ավել տարիների ընթացքում:

Ընկերությունը ծաղկում էր ապրում մինչև 1919 թվականին ԱՄՆ-ում ալկոհոլի արգելքի ներդրումը: Այդ հանգամանքը ստիպել էր Ջեյմս Բիմին վաճառել իր գործարանը և Ֆլորիդայում նարինջ աճեցնել։ 1933 թվականին արգելքը չեղյալ հայտարարվեց, և Ջեյմս Բիմը 70 տարեկան հասակում որոշեց վերակենդանացնել ալկոհոլի արտադրությունը։ Մեկ տարի անց հիմնադրվեց The James B. Beam Distilling ընկերությունը, որը Ջեյմս Բիմը ղեկավարեց ևս 11 տարի։ Նա մահացել է 1947 թվականին 83 տարեկան հասակում։ Մահից մեկ տարի առաջ նա իր գործերը փոխանցել էր որդուն՝ Ջերեմի Բիմին։ Հետագա տասնամյակներում Jim Beam բուրբոնի ժողովրդականությունը միայն աճել է, և 200 տարուց ավելի կյանք ապրած Jim Beam-ն այսօր ամենավաճառվող բուրբոնն է աշխարհում:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում