Երբ ծնողները դառնում են «բեռ». ցավոտ իրականությունը՝ բեմում. «Շունչ» թատրոնի պրեմիերան՝ սիրո ու մոռացության մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

«Ծնողը» ներկայացումը նոր շունչ ու կարևոր խոսք է բերում ընտանիքի, սիրո ու պատասխանատվության մասին՝ հիշեցնելով, թե որքան կարևոր է գնահատել մեր ամենամոտ մարդկանց, քանի դեռ ժամանակ ունենք։

«Շունչ» թատրոնում կայացավ «Ծնողը» ներկայացման պրեմիերան։ Բեմադրության հեղինակը Սամսոն Մովսիսյանն է, իսկ դերասանական կազմում ընդգրկված են Ալբերտ Սաֆարյանը, Էվելինա Շահիրյանը, Անահիտ Կիրակոսյանը, Արաքսյա Մելիքյանը, Սամվել Դանիելյանը և Ադրինե Աճեմյանը։ 

Tert.am Life-ը ներկա է եղել ներկայացման պրեմիերային, ետնաբեմում զրուցել դերասանների ու ռեժիսորի հետ:

Դերասանուհի Էվելինա Շահիրյանի խոսքով՝ իր կերպարը հոգեբանական խոր շերտեր ունեցող բարդ դեր է։ Նա ընդգծում է, որ ներկայացումը պատմում է ծնողների անսահման նվիրումի մասին, որոնք իրենց ամեն ինչից զրկելով մեծացնում են զավակներին, սակայն ժամանակի ընթացքում կարող են ընկալվել որպես «բեռ»։ Նրա հերոսուհին նույնիսկ ինքնակամ է հայտնվում ծերանոցում՝ ընտանիքին չխանգարելու համար։

Շահիրյանը նշում է, որ այս դերը պահանջել է մեծ ներքին աշխատանք և զգացմունքային զսպվածություն, բայց թիմային աշխատանքն օգնել է հաղթահարել դժվարությունները։ Նրա կարծիքով՝ ներկայացման հիմնական ուղերձը ծնողներին սիրելու, գնահատելու և նրանց մասին չմոռանալու կոչն է։

Դերասան Ալբերտ Սաֆարյանը խոստովանում է, որ ընտրողական է դերերի հարցում, սակայն այս առաջարկը ընդունել է մեծ հետաքրքրությամբ։ Նրա համար թեման կարևոր է, քանի որ, թեև թվում է մեզ օտար, իրականում խնդիրն առկա է նաև մեր հասարակության մեջ։ Դերասանը նշում է, որ ներկայացումը նպատակ չունի պատրաստի լուծումներ տալու, այլ հանդիսատեսին մտածելու առիթ է տալիս։ Նա նաև ընդգծում է ներկայացման հուզիչ եզրափակիչ գաղափարը՝ սիրո և ընտանիքի արժեքի մասին հիշեցնող խոսքերով. «Մենակ մայր ունենալու համար կարելի էր ապրել»:

Ռեժիսոր Սամսոն Մովսիսյանի կարծիքով՝ ներկայացումը միշտ արդիական թեմա է շոշափում։ Նա նշում է, որ մարդը հաճախ երջանկություն է փնտրում հեռվում, մինչդեռ այն իր ընտանիքում է։ Ներկայացման նպատակը հանդիսատեսին հիշեցնելն է՝ գնահատել այդ ջերմությունը և չմոռանալ ծնողներին։ Ռեժիսորը նաև գոհունակությամբ է խոսում դերասանական կազմի և ստեղծագործական գործընթացի մասին՝ ընդգծելով «Շունչ» թատրոնի ստեղծած միջավայրի կարևորությունը։ «Փորձերն անցել են շատ լավ ու հաճելի մթնոլորոտւմ: Սիրով ենք աշխատել»:

Թատրոնի հիմնադիր, դերասան Սամվել Դանիելյանը նշում է, որ թեման ընտրվել է իր արդիականության պատճառով։ Եթե տարիներ առաջ այն այնքան էլ բնորոշ չէր մեր հասարակությանը, այսօր արդեն դարձել է քննարկվող խնդիր։ Ներկայացումը հիմնված է Ժոզեֆինա Լոուրենսի ստեղծագործության վրա և տեղայնացվել է հայկական իրականությանը համապատասխան։ Դերասանի խոսքով՝ կարևոր է բարձրաձայնել այս հարցը, որպեսզի մարդիկ առերեսվեն խնդրին և վերանայեն իրենց վերաբերմունքը ծնողների հանդեպ։ Սամվել Դանիելյանն ընդգծեց, որ «Ծնողը» ներկայացումը նոր շունչ ու կարևոր խոսք է բերում ընտանիքի, սիրո ու պատասխանատվության մասին՝ հիշեցնելով, թե որքան կարևոր է գնահատել մեր ամենամոտ մարդկանց, քանի դեռ ժամանակ ունենք։

Հետևեք մեզ՝ այստեղ