Ներքին Գետաշենում տարեցտարի ավելանում է բնակչության թիվը

ՀՀ Ոստիկանության Գեղարքունիքի մարզային վարչության  Մարտունու բաժանմունքի անձնագրային սեղանի պետ Սարիբեկ Մաթեւոսյանի տեղեկացմամբ` Գեղարքունիքի մարզի Ներքին Գետաշեն գյուղում  2016 թվականի փետրվարի դրությամբ հաշվառվել է 8824 բնակիչ:

«Տասնամյակներ շարունակ Մարտունու նախկին շրջանում գյուղական բնակչությամբ առաջատարը Վարդենիկն էր, որն արդեն նախապատվությունը զիջել է Ներքին Գետաշենին. Վարդենիկում 2016 թվականի հունվարին հաշվառվել է 8361 մարդ կամ` 463 մարդով պակաս Ներքին Գետաշենի բնակչության թվից: Հաստատորեն կարող եմ պնդել, որ Ներքին Գետաշենն այս պահին արդեն Գեղարքունիքի մարզի ամենամեծ գյուղական բնակավայրն է, ընդ որում, այն ամենաերիտասարդացող  բնակչության կազմ ունեցող բնակավայրերից է»,-հավաստեց Սարիբեկ Մաթեւոսյանը: 2015 թվականի համեմատ, 2016 թվականին բնակչությունն յստեղ աճել է 107 մարդով:

Ինչպես «Արմենպրես»-ին տեղեկացրեց Ներքին Գետաշենի գյուղապետ Կարո Գեւորգյանը, բնակչության աճը տեղի է ունենում վերջին տասը տարիների ընթացքում:եԵթե 2005 թվականին մենք ունեցել ենք 7880 բնակիչ, ապա 2016 թվականին այն արդեն ավելացել է 944 մարդով` հասնելով 8824-ի: Յուրաքանչյուր տարում Ներքին Գետաշենում գրանցվում է 150-160 ծնունդ, 45-50 մահ: Վերջին տարիներին մեզ մոտ արտերկրից մեր նախկին բնակիչներն ավելի շատ հաշվառման են կանգնում, քան թե դուրս են գրվում: Յուրաքանչյուր տարում մենք ունենում ենք բնակչության աճ 120-140 մարդով: 2015 թականին ունեցել ենք 155, 2014-ին`156 ծնունդ: Ամեն տարում մեզ մոտ ստեղծվում է մինչեւ 100 ընտանիք»,-հավաստեց համայնքի ղեկավարը:

Ընդ որում, Ներքին Գետաշենի բնակչության զբաղմունքի հիմնական մասը սեզոնային արտագնա աշխատանքն է, մնացած մասը` գյուղատնտեսությունը, առեւտուրը եւ հանրային ծառայությունները: «Մոտ 2500 երիտասարդ տարիքի եւ աշխատունակ տղամարդ մեկնում  են սեզոնային աշխատանքի եւ ուշ աշնանը վերադառնում` լուծելով իրենց տնտեսությունների առօրյա խնդիրները: Գյուղապետարանն իր հերթին փորձում է համահունչ արձագանքել աճող գյուղի օրավուր ավելացող կարիքներին: Կառավարության աջակցությամբ ավարտում ենք մանկապարտեզի շինարարությունը, ձեռնարկում ենք դպրոցական նոր մաս նաշենքի կառուցումը, խմելու ջրատարի ներքին ցանցի նորացումը, ոռոգման ցանցի ընդարձակումը, ասֆալտապատում երկրորդական կարգի փողոցները: Մտածում ենք նաեւ ապագայում ջրահեռացման համակարգի ստեղծման մասին: Հայրենի եզերքի հետ իրենց կյանքը սիրով կապած մարդկանց համար մենք պարտավոր ենք ստեղծել ամենաժամանակակից եւ բարեկեցիկ պայմաններըե-հավաստեց Կարո Գեւորգյանը:

 Խոսրով Խլղաթյան