Ռադիկ Մարտիրոսյանը պարզաբանում է՝ որտեղից են շվեյցարական բանկի հաշիվները

«Հետք» էլեկտրոնային պարբերականում հոդված է տպագրվել, որտեղ ներկայացված է շվեյցարական HSBC բանկում հաշիվներ ունեցող հայերի ցանկը: Այդ ցանկում առկա է ԵՊՀ նախկին ռեկտոր, Գիտությունների ազգային ակադեմիայի նախագահ Ռադիկ Մարտիրոսյանի անունը:

Past.am-ը զրուցել է ԳԱԱ նախագահի հետ՝ փորձելով պարզաբանել մանրամասները: Պարոն Մարտիրոսյանը նշեց. «1997թվականին Երևանի պետական համալսարանի Աստվածաբանության ֆակուլտետի դեկանն էր արքիեպիսկոպոս Շահե սրբազանը:

Բավականին դժվար ժամանակներ էին, իսկ նա ունևոր մարդ էր, նորաստեղծ ֆակուլտետի համար բարեգործություն էր անում: Մի անգամ ասաց, որ կուզենա ֆակուլտետի ծախսերի համար հաշիվ բացել: Բայց նա չէր ուզում, որ այդ գումարը գա ընդհանուր համալսարանի հաշվին: Իմ անունով էր ուզում: Նա բերեց փաստաթուղթը, որը ես ստորագրեցի: Այդ հաշիվը եղել է երկու մարդու անունով՝ իր և իմ: Ո՛չ ես կարող էի առանց նրա տնօրինել այն, ո՛չ էլ նա առանց ինձ»:

Մեր զրուցակիցն ասաց, որ այդ ողջ ժամանակահատավածում որևէ գործարք չի արել, նույնիսկ չի իմացել բանկի անվանումը և հաշվեհամարը:

Ըստ նրա՝ հոգևորականն անձամբ է իր միջոցներից գումարներ օգտագործել:

«2005-ից հետո, երբ սրբազանը մահացավ, ես որևէ տեղեկատվություն չունեմ գումարների մասին: Այսօր եմ կրկին լսում այդ գումարների մասին մամուլից: Ես վրդովված եմ, որ այդ տպողը կարող էր մի քիչ հետաքրքրվել և իմանալ իրողությունը: Ի՞նչ է նշանակում «սկանդալային», սկանդալն ինչո՞ւմն է: Ենթադրենք, թե այդ մարդու միջոցները գտնվում են այդ բանկում, միջոցներն էլ գրված է՝ 14 հազար դոլար, որը միայն պետք է ֆակուլտետի հոգսերի համար ծախսվեր»,- հավելում է Ռադիկ Մարտիրոսյանը:

Լևոն Փանոսյան