Համաշխարհային պատերազմների նոր դարաշրջան է սկսվել. The New York Times

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին            

Ուկրաինայում և Մերձավոր Արևելքում հակամարտությունների ձգձգմանը զուգահեռ համաշխարհային պատերազմը վերադառնում է, հայտնում է The New York Times-ը:

«Փետրվարի 28-ին Իրանում պատերազմի մեկնարկի պահին աշխարհն արդեն համակված էր պատերազմով: Վերջին երկու տարիների պատերազմներն ավելի մասշտաբային են եղել, քան Երկրորդ համաշխարհային պատերազմի ավարտից հետո ցանկացած այլ տարի:

Այժմ, երբ Ուկրաինայի պատերազմը ձգձգվում է, իսկ Իրանի դեմ ԱՄՆ-ի և Իսրայելի պատերազմը դադարեցված է փխրուն զինադադարի շրջանակում, համաշխարհային ասպարեզում տեսնում ենք ևս մեկ անցանկալի երևույթի՝ համաշխարհային պատերազմի, վերադարձի:

Տարբեր մայրցամաքներում երկու խոշոր հակամարտությունները դարձել են խոշոր տերությունների միջև ռազմավարական մրցակցության հարթակներ:

Յուրաքանչյուր պատերազմի դինամիկան ուղղակի ազդեցություն է ունեցել մյուսի վրա, և երկուսն էլ պայքարի մեջ են ներքաշել երրորդ պետությունների: Թեև հակամարտությունների համակցված մասշտաբն ու ինտենսիվությունը զգալիորեն զիջում են նախորդ դարի երկու կործանարար համաշխարհային պատերազմներին, դրանք առաջացել են նույն վտանգավոր բնազդից. մրցակից երկրները ռազմական ուժը լիովին ընդունել են որպես իշխանության իրականացման հիմնական միջոց:

Ռուսաստանն ու Միացյալ Նահանգները պատերազմի մեջ են մտել տարբեր պատճառներով: Ռուսաստանի նախագահ Վլադիմիր Պուտինը ձգտում էր ընդլայնել իր տարածքային իշխանությունը և վերադարձնել այն հողերը, որոնք, ըստ նրա, պատկանում են ռուսաստանյան ազդեցության գոտուն: Իրանի դեմ պատերազմում Միացյալ Նահանգների հայտարարած նպատակներն այլ էին. Թրամփը մշտապես պնդում էր, որ չի կարելի թույլ տալ Իրանին միջուկային զենք ձեռք բերել: Այնուամենայնիվ, և՛ Պուտինը, և՛ Թրամփը կարծում էին, որ հաջողությունը հեշտ կլինի:

Մի քանի կարճ շաբաթվա ընթացքում Ուկրաինայի և Իրանի հակամարտությունները դարձան մեծ տերությունների միջև ծավալված մրցակցության արտահայտություն: Ռազմական գործողությունների երկու թատերաբեմերում էլ Ռուսաստանն ու Միացյալ Նահանգները սատարում էին միմյանց հակառակորդներին:

Յուրաքանչյուր պատերազմ ազդել է մյուսի վրա: Իրանի կողմից Հորմուզի նեղուցի փակման հետևանքով նավթի համաշխարհային գների ցնցումը Ռուսաստանի համար ֆինանսական օգուտ դարձավ՝ թե՛ սեփական նավթի գների բարձրացման, թե՛ Թրամփի վարչակազմի կողմից այդ նավթի նկատմամբ պատժամիջոցների թուլացման շնորհիվ, որը հուսահատորեն ձգտում էր նվազեցնել համաշխարհային գները։ Քանի որ ուշադրությունն ու ռեսուրսները տեղափոխվեցին դեպի Իրան, Ռուսաստանը սկսեց գարնանային հարձակումը՝ նպատակ ունենալով ամրապնդել և ընդլայնել իր տարածքային ձեռքբերումները Ուկրաինայում: Ուկրաինան, միևնույն ժամանակ, Միացյալ Նահանգներին և Իրանի հարձակումների թիրախում հայտնված արաբական երկրներին առաջարկեց Ռուսաստանի դեմ պայքարում կուտակած իր փորձը անօդաչու թռչող սարքերից պաշտպանվելու ոլորտում:

Երկու հակամարտություններն էլ ներքաշել են այլ երկրների: Ուկրաինայում Ռուսաստանի ռազմական ջանքերը երկար ժամանակ ապահովվում էին Չինաստանի տնտեսական և տեխնիկական աջակցությամբ, Հյուսիսային Կորեայի մարդկային ռեսուրսների ուղղակի ներդրմամբ և Իրանի անօդաչու սարքերով: Եվրոպական դաշնակիցներն ավելի ու ավելի կարևոր դեր են խաղացել Ուկրաինայի զինման գործում՝ նույնիսկ գլխավորելով այդ ջանքերը վերջին մեկ տարվա ընթացքում: Թեև ՆԱՏՕ-ի երկրները չարձագանքեցին պարոն Թրամփի՝ Հորմուզի նեղուցը բաց պահելուն օգնելու կոչին, անցյալ ամիս ՆԱՏՕ-ի հակահրթիռային պաշտպանության համակարգերը խոցեցին Թուրքիայի ուղղությամբ արձակված իրանական հրթիռները»,- գրում է պարբերականը:

Հետևեք մեզ՝ այստեղ