Կոալիցիոն գործընթացի հեղինակները որդեգրել են դանդաղ շտապելու աշխատելաոճը. Մարգարիտ Եսայան

Past.am-ի զրուցակիցն է ՀՀԿ խմբակցության պատգամավոր Մարգարիտ Եսայանը:

- Որո՞նք էին Սերժ Սարգսյանի ելույթի մեսիջները: Ո՞ւմ էր այն հասցեագրված:

- Հայաստանի Հանրապետության նախագահի ելույթը ծրագրային էր: Այն կարևոր էր այն իմաստով, որ երկրում տեղի են ունեցել սահմանադրական փոփոխություններ, համակարգային փոփոխության է գնում Հայաստանը:

Քանի որ կիսանախագահականից մենք անցնում ենք խորհրդարանական կառավարման համակարգի, այս համատեքստում հանրապետության նախագահի ելույթը սպասված էր և շատ կարևոր: Նախագահը մատնանշեց այն հիմնական ուղին և ընթացքը, որով մեր երկրում պիտի առաջնորդվեն թե՛ քաղաքական, թե՛ հասարակական, թե՛ պետական կառույցներն ու ամբողջ հասարակությունը:

Ըստ իս՝ այդ ելույթը կառուցված էր հենց փոփոխված սահմանադրական դրույթների համատեքստում: Մեսիջներն ուղղված են ամբողջ հանրությանը: Դրանք շատ լուրջ են: Կարծում եմ՝ այն պահին, երբ փոփոխված Սահմանադրությունն իր բոլոր դրույթներով կմտնի կիրառման մեջ, բոլորիս կյանքը պիտի արմատական փոփոխությունների ենթարկվի:

Ես այս ելույթը համարում եմ այդ փոփոխությունների ուղենիշը: Բոլորս պետք ուշադիր ընթերցենք և առաջնորդվենք դրանով մեր աշխատանքի ընթացքում: Ուշադրություն դարձրեք, որ սա ոչ թե Հայաստանի Հանրապետական կուսակցության նախագահի ելույթն է, այլ հենց երկրի նախագահն է խոսում փոփոխությունների անհրաժեշտության մասին:

- Իսկ կարո՞ղ ենք ասել, որ ազդարարվում է նախընտրական քարոզարշավի ոչ պաշտոնական մեկնարկ, չնայած ելույթում ճիշտ հակառակ պնդումներ եղան:

-Ո՛չ, նման բան չենք կարող ասել, որովհետև դեռ մեկ տարի կա մինչև պառլամենտական ընտրությունները, երկու տարի կա մինչև նախագահի պաշտոնավարման ժամկետի ավարտը: Նախագահը շեշտեց, որ որևէ մեկը չշտապի, առաջ չընկնի իրադարձություններից և ժամանակից, քանի որ որևէ քաղաքական ուժի և որևէ անհատի ներկայությունն ապագա ԱԺ-ում այս պահին, այնուամենայնիվ, երաշխավորված չէ: Քարոզարշավը կմեկնարկի օրենքով սահմանված կարգով: Սա երկրի նախագահի ուղենշային ելույթն էր իրականում:

- Դուք ելույթը համարում եք հեղափոխական, բայց Սերժ Սարգսյանն անձամբ նշեց, որ հեղափոխությունների կողմնակից չէ: Հակասություն չկա՞:

- Միտքն այն էր, որ մենք գնում ենք փոփոխությունների, բոլորը պետք է դրան պատրաստ լինեն: Սա փոփոխությունների կոչ էր: Ես դրական առումով հեղափոխության մասին եմ ասում: Նախագահը բառացիորեն ասաց. «Պետք է հիասթափեցնեմ անընդհատ հեղափոխություն անելու կողմնակիցներին»: Իմ ընկալմամբ՝ այստեղ  մի փոքր հեգնանք կար, որովհետև մեր ընդդիմադիր գործիչներն իրենց մի քանի հոգանոց հավաքներն անվանում են «հեղափոխական հավաքներ»:

Նախագահը սթափության կոչ է անում ելույթի այդ հատվածով: Նախագահն ասում է, որ մենք չենք շտապելու, քանի որ քաղաքական ոլորտում շտապողականությունը երբեք լավ ավարտի չի հանգեցրել: Այնուամենայնիվ, նախագահի խոսքում նշվում է, որ կհիասթափեցնի նաև նրանց, ովքեր գոհ են ստատուս-քվոյից և ներկա վիճակից:

- Նախորդ շաբաթ Շարմազանովն ասաց, որ մինչև շաբաթվա վերջ կհստակեցվեն բոլոր պաշտոններն ու պարզ կլինի համագործակցության ձևաչափը: Նոր շաբաթ է եկել, բայց այդ ամենը դեռ հայտնի չէ: Ինչո՞վ կբացատրեք:

- Քաղաքական կարևոր փուլ է, երկու քաղաքական ուժեր որոշում են համագործակցել և միասին շարունակել իրենց գործունեությունը: Ես կարծում եմ, որ շտապողականությունը ճիշտ չէ: Այդ պայմանավորվածությունները ենթադրում են ավելի լուրջ ճանապարհ անցնել, ավելի երկար միասին աշխատելու տեսլական: Կողմերը շատ հավասարակշիռ ծանրութեթև են անում բոլոր հնարավոր տարբերակները: Շտապելն այս դեպքում էլ լավ բան չէ:

Պետք է բոլորս համբերենք, տեսնենք, թե երբ կլինի այդ մասին հայտարարությունը, բայց ամենակարևորի մասին հայտարարությունն արդեն արված է: Կարևոր է, որ ՀՅԴ-ն և ՀՀԿ-ն պատրաստ են միասին ստանձնել երկրի կառավարման ղեկը: Ես հասկանում եմ լրատվամիջոցների և բոլորի մտահոգությունն ու անհանգստությունը, բայց պիտի խորհուրդ տամ, որպեսզի դանդաղ շտապեն, որովհետև գործընթացի հեղինակները որդեգրել են դանդաղ շտապելու աշխատելաոճը:

Լևոն Փանոսյան