Սունդուկյան թատրոնի ստուդիան՝ միջազգային թատերական փառատոնի մրցանակակիր

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Ապրիլի 11-14-ը Սանկտ Պետերբուրգում անց կացվեց մանկական թատերախմբերի միջազգային «Բրյանցևյան փառատոնը»։ Փառատոնի կազմակերպիչն է Պետերբուրգի «Ա․ Բրյանցևի անվան պատանի հանդիսատեսի թատրոնը»։ Երկարամյա պատմություն ունեցող ամենամյա փառատոնը հյուրընկալում է թատերախմբեր տարբեր երկրներից՝ մասնակիցների տարիքային սահմանափակումն առանձնացնելով 18 տարին։ Փառատոնը մրցութային է՝ միջազգային ժյուրիով, յուրաքանչյուր օր տեղի են ունենում ներկայացումների քննարկումներ՝ հայտնի թատերագետների մասնակցությամբ։

Ապրիլի 13-ին փառատոնի շրջանակներում Մայր թատրոնի ստուդիան ներկայացրեց «Թմկաբերդի առումը» բեմադրությունը։ Ներկայացման ռեժիսորը Արմեն Քուշկյանն է, բեմական խոսքի դասախոսը՝ Ռուզաննա Հախնազարյանը, պարերի բեմադիչը՝ Արմինե Ավետիսյանը, զգեստների նկարիչ՝ Իզաբելլա Սոֆրոնովան, երաժշտական ձևավորման հեղինակը՝ Ջուլիետա Հովսեփյանը, գլխավոր համակարգող՝ Կարեն Սիմոնյանը։ Ստուդիայի այս բեմադրությանը թատրոնը մոտեցել է ամենայն պատասխանատվությամբ։ Գ․ Սունդուկյանի անվան ազգային ակադեմիական թատրոնի տնօրեն Վարդան Մկրտչյանի խոսքերով․ «Թատերական ստուդիան մեզ համար հիմնաքարային նշանակություն ունի։ Ստուդիա թատրոնում սկսել է գործել տակավին Վարդան Աճեմյանի նախաձեռնությամբ՝ 1966 թվից ի սկզբանե նպատակ ունենալով այդպիսով թե՛ թատերական կրթություն տալ սաներին, թե՛ հետագայում թատրոնի դերասանական կազմը համալրել երիտասարդ ուժերով։ Վերսկսելով ստուդիայի գործունեությունը՝ մենք սահմանում ենք բարձր պրոֆեսիոնալ նշաձող, ինչի մասին է փաստում նաև միջազգային փառատոնի մասնակցությունն ու հաղթանակով վերադարձը»։

Ստուդիայի ղեկավար և ներկայացման բեմադրիչ Արմեն Քուշկյանը Պետերբուրգից վերադարձել է ստեղծագործական նոր գաղափարներով և առաջարկներով։ «Մեծ պատիվ էր մասնակցել նման բարձր մակարդակով կազմակերպված փառատոնի և շատ ոգևորիչ 13 թատերախմբերից լավագույնը ճանաչվել՝ այն դեպքում, երբ մրցակցությունն իրապես բարձր է։ Ներկայացումների քննարկման ընթացքում, երբ որպես կանոն հնչում էին նաև քննադատական տողեր, փառատոնի հրավիրյալ անվանի թատերագետ Մարինա Տոկարևան մեր ներկայացման մասին միմիայն բարձր գնահատանքի խոսքեր հնչեցրեց», - պատմեց Արմեն Քուշկյանը։

Հաղթահարելով լեզվական խոչընդոտը՝ «Թմկաբերդի առումը» ներկայացումը տպավորել է ոչ միայն ժյուրիի անդամներին, այլ նաև հրավիրյալ մասնագետներին, ինչի վկայությունն են Բելոռուսիայի պետական ակադեմիական պատանի հանդիսատեսի թատրոնի տնօրեն Վերա Պոլյակովա-Մակեյի խոսքերը․ «Ինձ անասելի զարմացրեցին հայերը, նույնիսկ չեմ պատկերացնում, թե ինչպես է ժյուրին գնահատելու նրանց, քանի որ նրանք պրոֆեսիոնալ էին, նրանց պետք է գնահատել պրոֆեսիոնալ մակարդակով»։

Հավելենք, որ «Թմկաբերդի առումը» ներկայացումը շուտով ներառվելու է թատրոնի խաղացանկում։

Հետևեք մեզ՝ այստեղ