Նեթանյահուի երկու ամենաոխերիմ հակառակորդները միավորվել են՝ առաջիկա ընտրություններին ընդառաջ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին            

Իսրայելի վարչապետ Բենյամին Նեթանյահուի երկու ամենահզոր քաղաքական մրցակիցները կիրակի օրը հայտարարել են, որ միավորում են ուժերը՝ նպատակ ունենալով տապալել նրա կոալիցիոն կառավարությունն այս տարվա վերջին սպասվող ընտրություններում,. հայտնում է Reuters-ը։

Իսրայելի նախկին վարչապետներ աջակողմյան Նաֆթալի Բենեթը և կենտրոնամետ Յաիր Լապիդը հանդես են եկել հայտարարություններով, որոնցում հայտնել են իրենց «Բենեթ 2026» և «Ապագա կա» կուսակցությունների միավորման մասին։

«Այս քայլն ուղղված է բլոկի միավորմանը, ներքին տարաձայնություններին վերջ տալուն և բոլոր ջանքերը առաջիկա վճռորոշ ընտրություններում հաղթանակի ու Իսրայելը դեպի ապագա առաջ մղելու վրա կենտրոնացնելուն», - հայտարարել է ընդդիմության առաջնորդ Լապիդը։

Բենեթի գրասենյակից հայտնել են, որ նոր կուսակցությունը կոչվելու է «Միասին», և ինքն է լինելու դրա առաջնորդը։

Բենեթն ու Լապիդը նախկինում ևս միավորել էին ուժերը՝ վերջ դնելով Նեթանյահուի 12-ամյա կառավարմանը 2021 թվականի ընտրություններում, սակայն նրանց ձևավորած կոալիցիոն կառավարությունը գոյատևեց ընդամենը 18 ամիս։ Մինչև այդ՝ 2013 թվականին, նրանք կարողացել էին մտնել Նեթանյահուի կոալիցիոն կառավարություն՝ խաղից դուրս թողնելով ավանդական ուլտրաօրթոդոքս դաշնակիցներին։

Նեթանյահուն, որն Իսրայելի պատմության մեջ ամենաերկար պաշտոնավարած վարչապետն է, վերադարձավ իշխանության 2022 թվականի նոյեմբերին կայացած ընտրություններում հաղթանակից հետո և ձևավորեց Իսրայելի պատմության մեջ ամենաաջակողմյան կառավարությունը։

Սակայն 2023 թվականին պաղեստինյան ՀԱՄԱՍ խմբավորման հարձակումը Իսրայելի հարավի վրա, որը Մերձավոր Արևելքը գցեց քաոսի մեջ և հանգեցրեց նրան, որ Իսրայելը ստիպված եղավ պատերազմել մի քանի ճակատով, հարվածեց անվտանգության ոլորտում Նեթանյահուի հեղինակությանը։ Այդ ժամանակից ի վեր հասարակական կարծիքի հարցումները հետևողականորեն կանխատեսում են նրա պարտությունը հաջորդ ընտրություններում, որոնք պետք է կայանան հոկտեմբերի վերջին։

Այդուհանդերձ, Նեթանյահուն՝ թե՛ երկրի ներսում, թե՛ արտերկրում բևեռացում առաջացնող կերպարը և իր սերնդի ամենաազդեցիկ իսրայելցի քաղաքական գործիչը, նախկինում բազմիցս ցուցադրել է քաղաքական գոյատևման բացառիկ հմտություններ։

54-ամյա Բենեթը՝ բանակի հատուկ նշանակության նախկին ջոկատայինը, որը հետագայում դարձել է տեխնոլոգիական միլիոնատեր, նախընտրական հարցումներում զիջում է Նեթանյահուին։ Ապրիլի 23-ին իսրայելական N12 News-ի անցկացրած հարցումը ցույց է տվել, որ Բենեթը Քնեսեթի 120 տեղերից կստանա 21-ը՝ Նեթանյահուի «Լիկուդի» 25 տեղի դիմաց։ Պարզվել է նաև, որ Լապիդի կուսակցությունը կարող է ստանալ ընդամենը 7 տեղ՝ ներկայիս 24-ի փոխարեն։ Սակայն Նեթանյահուի աջակողմյան և կրոնական կուսակցությունների կոալիցիան միասին ստանում է ընդամենը 50 տեղ, մինչդեռ Բենեթի և Լապիդի հավանական կոալիցիան, որի մեջ կմտնեն մի քանի ավելի փոքր խմբակցություններ, կստանա առնվազն 60 տեղ։

Հետևեք մեզ՝ այստեղ