Ռեգեներատիվ բժշկության անսպասելի գտածոն. ոսկորները վերականգնում են ոչխարի բրդի օգնությամբ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին            

Լոնդոնի թագավորական քոլեջի հետազոտողներն ապացուցել են, որ սովորական ոչխարի բուրդը կարող է հիմք դառնալ վնասված ոսկորների վերականգնման համար օգտագործվող նոր սերնդի նյութերի համար, գրում է Medical Xpress-ը։

Հետազոտությունը ցույց է տվել, որ բրդից ստացված կերատինն ընդունակ է արդյունավետորեն խթանել ոսկրային նոր հյուսվածքի աճը և մի շարք պարամետրերով նույնիսկ դրա կառուցվածքն ավելի լավ մոտեցնել բնական առողջ ոսկորին, քան ներկայիս «ոսկե ստանդարտը»՝ կոլագենը։

Աշխատանքը նվիրված է ռեգեներատիվ բժշկության և ատամնաբուժության համար բիոնյութերի ստեղծմանը։ Տասնամյակներ շարունակ կոլագենը համարվել է հատուկ թաղանթների և կմախքների (կարկասների) հիմնական նյութը, որոնք օգնում են օրգանիզմին վերականգնել ոսկորը վնասվածքներից, վիրահատություններից կամ հյուսվածքների կորստից հետո։ Սակայն կոլագենն ունի թերություններ. այն համեմատաբար արագ է քայքայվում, միշտ չէ, որ բավականաչափ ամուր է և պահանջում է բարդ ու թանկարժեք արտադրություն։

Դոկտոր Շերիֆ Էլշարկավիի գլխավորած հետազոտական խումբը մշակել է այլընտրանքային նյութ՝ կերատինի հիմքով, որը բրդի, մազերի և եղունգների մեջ պարունակվող կառուցվածքային սպիտակուց է։ Գիտնականներն անջատել են կերատինը ոչխարի բրդից և քիմիապես մշակել այն՝ ամուր բիոհամատեղելի թաղանթներ ստեղծելու համար։

Սկզբում նյութը փորձարկել են լաբորատորիայում՝ մարդու ոսկրային բջիջների վրա։ Բջիջները հաջողությամբ աճել են կերատինային հիմքի վրա և ցուցադրել առողջ ոսկրային հյուսվածքի ձևավորման նշաններ։

Այնուհետև թաղանթները պատվաստել են գանգի արհեստականորեն ստեղծված արատներ ունեցող առնետների մոտ, որոնք ընդունակ չեն ինքնուրույն լավանալու։ Մի քանի շաբաթվա ընթացքում հետազոտողները հետևել են, թե ինչպես է նյութը նպաստում ոսկորի վերականգնմանը։

Թեև կոլագենային թաղանթներն ընդհանուր առմամբ խթանել են ոսկրային հյուսվածքի ավելի մեծ ծավալի առաջացումը, կերատինային կառուցվածքները ցույց են տվել մեկ այլ կարևոր առավելություն. նոր ոսկորն ավելի կազմակերպված և կառուցվածքային առումով կայուն է եղել։ Մանրաթելերը դասավորվել են ավելի ճիշտ և ավելի շատ են հիշեցրել բնական առողջ ոսկորի կառուցվածքը։

Գիտնականները նաև նշել են նյութի լավ համատեղելիությունը շրջակա հյուսվածքների հետ և դրա կայունությունը լավացման ողջ գործընթացում. սա համարվում է վճռորոշ՝ ապագա կլինիկական կիրառման համար։

Առանձնահատուկ հետաքրքրություն է ներկայացնում մշակման բնապահպանական կողմը։ Բուրդը վերականգնվող բնական նյութ է և հաճախ մնում է որպես գյուղատնտեսության կողմնակի արդյունք։ Ուստի կերատինային բիոնյութերը պոտենցիալ կերպով կարող են լինել ոչ միայն արդյունավետ, այլև արտադրության տեսանկյունից զգալիորեն ավելի կայուն։

Աշխատանքի հեղինակները կարծում են, որ հետազոտությունը կարող է ճանապարհ հարթել ռեգեներատիվ բիոնյութերի նոր դասի ստեղծման համար, որոնք ժամանակի ընթացքում կարող են այլընտրանք դառնալ կոլագենին բժշկության և ատամնաբուժության մեջ։

Հետևեք մեզ՝ այստեղ