Նոր նշաձող՝ տարածաշրջանում. «Նոա» ՖԱ-ն ներկայացրեց նոր մարզաբազան և «Noah Park»-ը՝ ապագայի ֆուտբոլային ու սպորտային քաղաքը (տեսանյութ, լուսանկարներ)

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

«Նոա» ֆուտբոլային ակումբը ներկայացրեց իր զարգացման հերթական կարևոր փուլը՝ ազդարարելով ոչ միայն ակումբի, այլև հայկական ֆուտբոլի նոր մտածողության, նպատակների և հավակնությունների սկիզբը: Կայացավ «Նոա» ՖԱ-ի նոր մարզաբազայի բացման արարողությունը, որը տարածաշրջանում նոր չափանիշներ է սահմանում:

«Այն կոչել ենք «Չեմպիոնների տուն», որովհետև կարծում ենք՝ չեմպիոններ կարող են ծնվել ճիշտ միջավայրում և ճիշտ պայմաններում։ Սա ֆուտբոլային բարձրակարգ ենթակառուցվածք է, ինչպիսին եվրոպական մի շարք թոփ ակումբներում նույնիսկ չկան և շատ հպարտանում ենք դրանով»,-ասում է «Նոա» ֆուտբոլային ակումբի Զարգացման տնօրեն Աննա Օհանյանը։

Մասնաշենքը ներառում է գերժամանակակից հանդերձարաններ՝ համալրված մի քանի տեսակի վերականգնողական սենյակով, սենյակներ՝ բժշկական և մերսողական նորագույն սարքավորումներով, գերժամանակակից, ընդարձակ մարզասրահ, հավաքների համար նախատեսված համապատասխան հյուրանոցային համարներ, գրադարան, առաջին թիմի անձնակազմի համար նախատեսված ճաշարան, խորհրդակցությունների դահլիճներ, աշխատասենյակներ, ժամանցի մի քանի սրահ՝ համալրված սեղանի թենիսի պարագաներով և համակարգչային խաղերով, և, իհարկե խաղադաշտեր:

«Մեզ համար շատ կարևոր է խաղադաշտերի առկայությունը, որոնց վրա շատ երկար ենք աշխատել: Այս ենթակառուցվածքը մենք գնել ենք ՀՖՖ-ից 2,5 տարի առաջ և այն անճանաչելի է դարձել այդ 2,5 տարվա ընթացքում: Տեսնում եք նոր բնական խաղադաշտը, նոր արհեստական խաղադաշտը և խաղադաշտ, որը, կարելի է ասել՝ ավերակների մեջ էր, հիմա վերածվել է լավագույն ֆուտբոլային դաշտերից մեկին»,-մանրամասնում է «Նոա» ֆուտբոլային ակումբի Զարգացման տնօրեն Աննա Օհանյանը։

Նոր սկիզբ դեպի գերազանցություն և դեպի բոլոր այն նպատակները, որոնց ուղղությամբ անվերապահորեն առաջ է շարժվում «Նոա»-ն։ Ակումբը ներկայացրեց նաև «Noah Park»-ը՝ ապագայի ֆուտբոլային ու սպորտային քաղաքը՝ իր լայնածավալ ճարտարապետական և ինժեներական կոնցեպտով, որը նախատեսվում է իրականացնել Վաղարշապատում։ Նախագիծը միավորում է մարզական, կրթական, ենթակառուցվածքային և հանրային տարածքները՝ նպատակ ունենալով ձևավորել ժամանակակից ֆուտբոլային և զարգացման էկոհամակարգ, որի վրա աշխատում են միջազգային հեղինակավոր մասնագետներ և ընկերություններ՝ Իտալիայից ու Եվրոպայից։ 

«Այսօր մեզ համար, որպես նոր ակումբի, սովորական օր չէ, մեզ համար նոր երազանքի սկիզբ է: Մենք ինչ կառուցում ենք, մեր փիլիսոփայությունն է՝ կառուցել երազանքի շուրջ»,-նշում է «Նոա» ֆուտբոլային ակումբի նախագահ Վարդգես Վարդանյանը։ 

Նշանակալի իրադարձությանը մասնակցում էին նաև բարձրաստիճան պաշտոնյաններ և համաշխարհային ֆուտբոլի լեգենդ Լուիշ Ֆիգուն:

«Կարծում եմ՝ այսպիսի ենթակառուցվածքներն ու պայմանները չափազանց կարևոր են ցանկացած ակումբի համար։ Դրանք «Նոա»-ին հնարավորություն են տալիս շարունակաբար զարգացնել տաղանդներ, շանս տալ երիտասարդ ֆուտբոլիստներին և, իհարկե, առաջին թիմին ապահովել բարձր մակարդակի մարզումային պայմաններով։ Երբ նայում էի այս ամենին, մտածում էի, որ ընդամենը երկուուկես տարվա ընթացքում այստեղ կատարված աշխատանքը պարզապես զարմանալի է։ Եվ սա կարևոր է ոչ միայն «Նոա»-ի, այլ ընդհանրապես հայկական ֆուտբոլի համար: Կարծում եմ՝ նման պայմանները իսկական երազանք են»,-ասում է նախկին ֆուտբոլիստ Լուիշ Ֆիգուն։

«Նոա»-ն ներկայացրեց նաև իր խորհրդանիշը՝ բազեն, որը կրում է հայկականության անցյալի, ներկայի և ապագայի արժեքները։ Օրն ամփոփվեց տպավորիչ և տեխնոլոգիապես հագեցած դրոնային շոուով, իսկ «Նոա»-ն ևս մեկ անգամ ընդգծեց իր ռազմավարական ուղին՝ որպես հայկական ֆուտբոլի զարգացման համար երկարաժամկետ արժեք ստեղծող, ենթակառուցվածքային ու մշակութային հիմք ձևավորող ակումբի:

Հետևեք մեզ՝ այստեղ