Past.am-ի դիտարկումը. որքանո՞վ են իրականությանը համապատասխանում վերջին սոցհարցումները

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Վերջին տարիներին սոցիոլոգիական հարցումների նկատմամբ վստահության հարցը դարձել է հանրային քննարկումների առարկա։ Եթե նախկինում դրանք ընկալվում էին որպես հասարակական տրամադրությունները չափելու միջոց, ապա այսօր շատերի մոտ տպավորություն է ձևավորվել, որ հարցումները հաճախ օգտագործվում են ոչ միայն հանրային կարծիքը արձանագրելու, այլև այն ձևավորելու նպատակով։

Նման մեթոդները նոր չեն քաղաքական տեխնոլոգիաների աշխարհում։ Տարբեր երկրներում սոցիոլոգիական տվյալները վաղուց կիրառվում են նաև որպես քաղաքական հաղորդակցության և ազդեցության գործիք։ Հատկապես այն դեպքերում, երբ խոսքը վերաբերում է այն երկրներին, որտեղ արտաքին ուժերն ունեն քաղաքական կամ ռազմավարական հետաքրքրություններ։

Ինչպես տեղեկանում է Past.am-ը, առաջիկա խորհրդարանական ընտրությունների վերաբերյալ վերջին օրերին հրապարակված որոշ հարցումների շուրջ մասնագիտական շրջանակներում լուրջ հարցեր են բարձրացվել։ Խոսքը հատկապես այն տվյալների մասին է, որոնք տարածվել էին եվրոպական լրատվական հարթակների միջոցով և ներկայացվել որպես Հայաստանի քաղաքական դաշտի իրական պատկերի արտացոլում։

Հատկանշական է, որ «Բրևիս» ընկերությունը հետագայում հայտարարեց, թե EuroNews-ով հրապարակված թվերը չեն արտացոլում իրենց կողմից իրականացված և հրապարակված հարցման արդյունքները։ Այս հանգամանքն ավելի է խորացրել քննարկումները տվյալների հավաստիության և դրանց ներկայացման ձևի շուրջ։

Սակայն խնդիրը միայն թվերը չեն։ Կարևոր է նաև հասկանալ, թե ինչ մեթոդաբանությամբ են իրականացվում նման հարցումները և որքանով կարող են դրանք արտացոլել իրական տրամադրությունները։ Հրապարակված տվյալները ներկայացվում էին որպես հեռախոսային հարցման արդյունքներ, մինչդեռ Հայաստանի պայմաններում նման մեթոդի արդյունավետության վերաբերյալ վաղուց տարակարծություններ կան։

Քաղաքական լարվածության, վերահսկողության և հասարակության զգայունության պայմաններում շատ քաղաքացիներ խուսափում են հեռախոսով հայտնել իրենց քաղաքական նախասիրությունները կամ մասնակցել նման հարցումներին։ Այդ պատճառով մասնագետների մի մասը կարծում է, որ հեռախոսային հարցումների արդյունքները միշտ չէ, որ կարող են ամբողջական պատկեր ներկայացնել։

Past.am-ի ունեցած տեղեկություններով՝ անմիջական շփման և դաշտային մեթոդներով իրականացված որոշ ուսումնասիրություններ զգալիորեն տարբերվող պատկեր են արձանագրում։ Այդ տվյալների համաձայն՝ գործող իշխանության վարկանիշը զգալիորեն զիջում է այն ցուցանիշներին, որոնք ներկայացվել էին աղմկահարույց հրապարակումներում։

Տարբեր գնահատականներով՝ ներկայիս իշխանությունը դժվար թե կարողանա միայնակ ապահովել իշխանության վերարտադրության համար անհրաժեշտ աջակցությունը։ Միևնույն ժամանակ, ընդդիմադիր հիմնական ուժերը՝ «Ուժեղ Հայաստան» դաշինքը, «Հայաստան» դաշինքը և ԲՀԿ-ն, դիտարկվում են որպես ապագա քաղաքական գործընթացների առանցքային դերակատարներ։

Քաղաքական շրջանակներում շրջանառվող տեղեկությունների համաձայն՝ խորհրդարան անցնելու հնարավորություն կարող են ունենալ նաև այլ քաղաքական ուժեր, մասնավորապես՝ Արման Թաթոյանի «Միասնության թևերը», Հայկ Մարությանի «Նոր ուժը» և Էդմոն Մարուքյանի «Լուսավոր Հայաստանը»։

Սակայն անկախ բոլոր հարցումներից ու կանխատեսումներից, ընտրությունների արդյունքի վրա վճռորոշ ազդեցություն կարող է ունենալ մեկ կարևոր հանգամանք՝ քաղաքացիների մասնակցության մակարդակը։Past.am-ի զրուցակիցների գնահատմամբ՝ հասարակության շրջանում ընտրություններին մասնակցելու պատրաստակամությունը բավական բարձր է, իսկ բարձր մասնակցությունն ավանդաբար կարող է էական ազդեցություն ունենալ վերջնական արդյունքների վրա։

Ուստի, որքան էլ սոցիոլոգիական հարցումները շարունակեն մնալ քաղաքական քննարկումների կենտրոնում, վերջնական պատասխանը, ինչպես միշտ, կտա ընտրողը՝ քվեարկության օրը։

Մանրամասները՝ «Փաստ» օրաթերթի այսօրվա համարում

Հետևեք մեզ՝ այստեղ