Գյուղացիները կարող են լուրջ կորուստներ կրել

Վերջին շրջանում գրեթե ամեն օր տեղեկություններ են ստացվում այն մասին, որ նոր սահմանափակումներ են կիրառվում Հայաստանից Ռուսաստան արտահանվող և Ռուսաստանի տարածքով ԵԱՏՄ այլ երկրներ ուղարկվող հայկական արտադրանքի նկատմամբ։ Խոսքը վերաբերում է մի շարք ապրանքատեսակների, այդ թվում՝ կարտոֆիլին, սմբուկին, չրերին, ձկնամթերքին, ծաղիկներին, ինչպես նաև խաղողին, բալին, ծիրանին, սալորին, դեղձին, նեկտարինին և այլ գյուղատնտեսական մթերքներին։

Ստեղծված իրավիճակը, առաջին հերթին, հարվածում է արտահանմամբ զբաղվող տնտեսվարողներին, ֆերմերներին և գյուղացիներին։ Նրանց շրջանում դժգոհությունն օրեցօր աճում է, իսկ վերջին օրերին լարված իրավիճակ է նկատվում նաև սահմանային անցակետերում։

Վերջին երկու օրերի ընթացքում Բավրայի և Բագրատաշենի անցակետերում պարբերաբար խցանումներ ու սահմանափակումներ են արձանագրվել։ Հայ-վրացական սահմանին բողոքի ակցիաներ են իրականացրել վարորդները, ջերմոցային տնտեսությունների սեփականատերերն ու ֆերմերները՝ հայտարարելով, որ չեն կարողանում իրենց արտադրանքը հասցնել ԵԱՏՄ շուկաներ։

Մեր տեղեկություններով՝ դժգոհության ալիք կա հանրապետության տարբեր մարզերում։ Շատերը մտահոգված են, որ ներկայիս զարգացումները կարող են լուրջ տնտեսական հետևանքներ ունենալ գյուղատնտեսական ոլորտի համար։ Տարբեր բնակավայրերում, այդ թվում՝ Բավրայի անցակետի հարակից հատվածներում, մեր թղթակիցները զրուցել են մի շարք ֆերմերների հետ։ Նրանցից շատերը չեն ցանկացել հրապարակել իրենց անունները՝ նշելով, որ մտավախություններ ունեն հնարավոր ճնշումների կամ խնդիրների վերաբերյալ։

Զրուցակիցները նշում են, որ իշխանությունների հայտարարությունները եվրոպական շուկաներ արտահանման հնարավորությունների մասին առայժմ իրենց համար համոզիչ չեն թվում։ «Մինչև այդ գործընթացները գործնական փուլ մտնեն, մեր բերքը կարող է պարզապես փչանալ։ Բացի այդ, անհասկանալի է, թե ինչ մեխանիզմներով և ինչ ժամկետներում պետք է հնարավոր լինի այդ ծավալի արտադրանք արտահանել եվրոպական շուկա»,– նշել է ֆերմերներից մեկը։

Միաժամանակ, գյուղացիներն ու արտադրողները դժգոհում են, որ չեն ստանում հստակ պատասխաններ պետական մարմիններից։ Նրանց խոսքով՝ փորձել են կապ հաստատել կառավարության և Էկոնոմիկայի նախարարության ներկայացուցիչների հետ՝ հասկանալու համար, թե ինչ լուծումներ են նախատեսվում, սակայն շատ դեպքերում պատասխան չեն ստացել կամ տեղեկացվել է, որ պատասխանատու պաշտոնյաները տվյալ հարցի վերաբերյալ տեղեկություն չունեն։

Արդյունքում, բազմաթիվ տնտեսվարողներ իրենց համարում են անորոշության և ռիսկերի պայմաններում, իսկ հանրային դժգոհությունը, նրանց գնահատմամբ, շարունակում է աճել։

Մանրամասները՝ «Փաստ» օրաթերթի այսօրվա համարում