Ինչո՞ւ է որոշվել ջինսերի վրա փակցնել կաշվե պիտակ. «Փաստ»

«Փաստ» օրաթերթը գրում է.

Վերջին մի քանի տասնամյակի ընթացքում ջինսերը գրավել են ամբողջ աշխարհի մարդկանց սրտերն ու զգեստապահարանները: Դե, նաև գրպանները: Իսկ ջինս գնելիս կամ կրելիս երբևէ մտածե՞լ եք՝ ինչի համար է հետևի մասում կարված կաշվե պիտակը: Չնայած այն հանգամանքին, որ ջինսերի ապրանքանիշը, ոճը, չափը կամ գույնը կարող են տարբեր լինել, բայց գոտու կամ հետևի գրպանի վրա գրեթե միշտ կարված կաշվե կամ թղթե պիտակ է լինում:

Ինչո՞ւ է այդպես:

Սովորաբար այս կաշվե (ներկայում՝ ժակրոնե) ուղղանկյուն կամ քառակուսի պիտակը կարվում է բոլոր ապրանքանիշերի ջինսերի հետևի հատվածում: Արևմուտքում այն սովորաբար կոչվում է ժակրոն՝ ի պատիվ հենց այն նյութի, որից այն ամենից հաճախ լինում է։ «Ժակրոնը» կամ, ինչպես այն նաև կոչվում է, «վեգանական կաշին», բաղկացած է գրեթե 95 % ցել յուլոզից: Իսկ այդ նյութի կոշտության ողջ գաղտնիքը լատեքսի փոքր պարունակությունն է, որն այն դարձնում է ոչ միայն անջրանցիկ, այլ նաև աներևակայելի դիմացկուն և ամուր:

Ավանդաբար, այդ պիտակը ցույց է տալիս արտադրանքի բրենդային անվանումը, գործվածքի խտությունը, ինչպես նաև այլ տեղեկատվություն:

Ի սկզբանե՝ 100 տարի առաջ, Levi's ընկերությունն էր պատրաստել ջինսի այդ պիտակը ոչ թե ժակրոնից, այլ սովորական բնական կաշվից, և նրանք դա արել էին մի պատճառով... Հայտնի Levi's-ը այդ պիտակում բառերի փոխարեն օգտագործել էր սիմվոլներ, տեսողականորեն ցույց էր տրվել արտադրանքի ամրությունը, երբ երկու ձի ապարդյուն փորձում են պատռել ջինսը: Levi's ընկերությունը 1873 թվականին է ներկայացրել իր ջինսե կոմբինեզոնի հետևի մասում կարված կաշվե պիտակի նորաձևությունը շատ պարզ պատճառով՝ անբարեխիղճ կեղծ արտադրողների պատճառով, որոնք հաճախ շուկաները հեղեղում էին բյուջետային «կեղծ» Levi's ջինսերով: Levi's-ը հաշվարկել էր կեղծ շուկայի կորուստները և որոշել արտադրել հատուկ պիտակ, որը ամուր ամրացված է ջինսերի հետևի մասում: Այդ պիտակը պատրաստված էր բնական կաշվից, ինչպես նաև ուներ հատուկ ապրանքանիշ:

Բայց չէ՞ որ կեղծ արտադրողները ևս կարող էին կեղծել այդ կաշվե պիտակը: Բայց հարցն է, որ եթե հիմա դա դժվար չէ, ապա 1880-ականների վերջին իսկական կաշին բավականին թանկ ապրանք էր արդյունաբերական ծավալներով ընդհատակյա հագուստ պատճենելու համար: Բացի դա, Levi's-ի արտոնագրած ապրանքանիշը դրոշմված էր կաշվի վրա, և խաբեբաները երկար ժամանակ չէին կարողանում կրկնօրինակել այդ եզակի լոգոն դրոշման գործարանային բարդ գործընթացի պատճառով, որը պահանջում էր հատուկ գործիքներ:

Հետևաբար, հենց հետևի կաշվե պիտակի շնորհիվ գնորդները կարող էին անմիջապես որոշել՝ արդյո՞ք Levi's ջինսերը օրիգինալ են: Եվ եթե ի սկզբանե այդ պիտակները կարվում էին կեղծիքների դեմ պայքարելու համար, ապա այսօր դրանք տեղեկատվական և մարքեթինգային հնարք են: Դրանք շարունակում են ակտիվորեն կարվել ջինսերի վրա՝ պահպանելու ծանոթ, դարավոր դիզայնը: Այսօր ժակրոնը իրականում պարզ պիտակ է, որի վրա նշված է բրենդը, երբեմն հագուստի խնամքի կանոնները, կազմը, գործվածքի խտությունը և այլն:

ԿԱՄՈ ԽԱՉԻԿՅԱՆ 

Մանրամասները՝ «Փաստ» օրաթերթի այսօրվա համարում