«Շատ փայլուն ելույթ ունեցավ և պայծառ ապագա ունի, համոզված եմ». Նարեկ Հախնազարյանը՝ «Դասական Եվրատեսիլ 2026» -ի հաղթող մասնակցի մասին

Ինչպես արդեն հայտնել էինք, Լեհաստանը ներկայացնող 18-ամյա ակորդեոնահար Միհալ Ստոչելը հաղթել է Երևանում կայացած «Դասական Եվրատեսիլ 2026» 22-րդ միջազգային մրցույթում։

Միհալի կողմից Մայկուսյակի` ակորդեոնի համար «Դասական կոնցերտի» երրորդ մասի կատարումը տպավորել է միջազգային ժյուրիին և Լեհաստանին ապահովել մրցույթում թվով չորրորդ հաղթանակով։

Մրցույթում Լատվիան ներկայացնող մարիմբահարուհի Սոնյա Միսինյան գրավել է երկրորդ, իսկ Հայաստանը ներկայացնող ֆլեյտահարուհի Էլեն Վիրաբյանը՝ երրորդ պատվավոր տեղերը։

Լատվիական հանրային ծառայությունների մեդիան (LSM) հայտարարվել է որպես «Դասական Եվրատեսիլ 2027»-ի հյուրընկալող երկիր։

18-ամյա ակորդեոնահար Միհալ Ստոչելը հաղթել է «Դասական Եվրատեսիլ» միջազգային հեղինակավոր 22-րդ մրցույթում, որն այս տարի Հայաստանի հանրային հեռուստաընկերության նախաձեռնությամբ անցկացվում էր Ալեքսանդր Սպենդիարյանի անվան օպերայի և բալետի ազգային ակադեմիական թատրոնում։ Մրցույթը կազմակերպվել է Հայաստանի հանրային հեռուստաընկերության և Եվրոպական հեռարձակողների միության (EBU) համագործակցության շրջանակում` Հայաստանի Հանրապետության կրթության, գիտության, մշակույթի և սպորտի նախարարության բարձր հովանու ներքո։ Մրցույթը կայացավ հունիսի 6-ին` հայ մեծանուն կոմպոզիտոր Արամ Խաչատրյանի ծննդյան 123-րդ տարեդարձի օրը։ Առաջին մրցանակը հաղթողին հանձնեց Հայաստանի Հանրապետության կրթության, գիտության, մշակույթի և սպորտի նախարար Ժաննա Անդրեասյանը։

Ազգությամբ լեհ Ստոչելը միջազգային ժյուրիին տպավորել է Միկոլայ Մայկուսյակի` ակորդեոնի համար «Դասական կոնցերտի» 3-րդ մասի կատարմամբ։

«Դասական Եվրատեսիլ 2026»-ում երկրորդ պատվավոր տեղը գրաված լատվիացի մարիմբահար Սոնյա Միսինյան և երրորդ տեղը գրաված հայ ֆլեյտահարուհի Էլեն Վիրաբյանը գերազանց ելույթներ ունեցան և արդարացրին մրցույթի բարձր չափանիշները։ «Դասական Եվրատեսիլը» դասական երաժշտության ապագա աստղերին բացահայտող ամենակարևոր հարթակներից է։

Այս հաղթանակով Ստոչելը Լեհաստանին բերեց «Դասական Եվրատեսիլում» իր 4-րդ հաղթանակը։

Պատվավոր առաջին տեղը գրավելուց հետո տարեկից պատանի երաժիշտներին դիմելով` Միհալը նշեց. «Փորձեք հաջորդ անգամ և երբեք մի հանձնվեք։ Կարծում եմ` դա շատ կարևոր է։ Եթե ցանկանաք, ապա կկարողանաք»։

Միհալ Ստոչելը ակորդեոն նվագել սկսել է յոթ տարեկանից, և այժմ համարվում է իր սերնդի լավագույն արտիստներից մեկը։ 2026 թվականին նա արժանացել է «Տարվա լավագույն պատանի երաժիշտ» տիտղոսին։ Միհալը նաև մոտ 30 տեղական և միջազգային մրցույթների դափնեկիր է։ Նրա երաժշտացանկում դասական և ժամանակակից գործեր են` փոխադրված ակորդեոնի համար։

Ժյուրիի անդամ, Հայաստանի Հանրապետության վաստակավոր արտիստ, թավջութակահար Նարեկ Հախնազարյանը նկատում է. «Ես համարում եմ, որ տղան՝ Միհալը շատ փայլուն ելույթ ունեցավ... Շատ վառ, շատ արտիստիկ, ռիթմիկ... Եվ ունի պայծառ ապագա, համոզված եմ»:

Երեկոյի ընթացքում հայտարարվեց, որ Լատվիայի հանրային ծառայությունների մեդիան (LSM) կհյուրընկալի հաջորդ՝ 2027 թվականի «Դասական Եվրատեսիլը»։ Հաջորդ տարվա մրցույթը տեղի կունենա Լիեպայա քաղաքում, որը նաև Եվրոպայի՝ 2027 թվականի մշակութային մայրաքաղաքներից մեկն է։ Մրցույթի շրջանակում LSM-ը դառնալու է գլխավոր հեռարձակողը և աշխատելու է Great Amber համերգասրահի հետ «Լիեպայա 2027» ծրագրի շրջանակում։

Այս տարվա «Դասական Եվրատեսիլին» մասնակցում էին 11 պատանի երաժիշտներ հետևյալ երկրներից՝ Հայաստան (AMPTV), Բելգիա (RTBF), Կիպրոս (CYBC), Չեխիա (CT), Գերմանիա (WDR), Լատվիա (LSM), Լեհաստան (TVP), Պորտուգալիա (RTP), Սերբիա (RTS), Շվեդիա (SVT) և Շվեյցարիա (SRF):

«Դասական Եվրատեսիլ» միջազգային մրցույթը նախաձեռնվել է 1982 թվականին Եվրոպական հեռարձակողների միության (EBU) կողմից։ Նշանավորելով ստեղծարարությունը, մշակութային բազմազանությունն ու երաժշտության համընդհանուր լեզուն՝ մրցույթը մի հարկի տակ է հավաքում 12-21 տարեկան տաղանդավոր երաժիշտների՝ նպատակ ունենալով ոգեշնչել և միավորել աշխարհի տարբեր անկյուններում գտնվող մարդկանց։

Հայաստանի հանրային հեռուստաընկերությունը ստանձնել էր այս տարվա մրցույթի կազմակերպչական և հեռարձակման աշխատանքները․ մրցույթն ուղիղ ռեժիմով հեռարձակվել է եվրոպական 11 երկրում և հեռուստաէկրանների մոտ հրավիրել միլիոնավոր մարդկանց։

Համլետ Առաքելյանն ու Հրաչուհի Ութմազյանը մրցույթի հաղորդավարներն էին, երիտասարդ մենակատարներին նվագակցում էր Հայաստանի ազգային ֆիլհարմոնիկ նվագախումբը՝ Էդուարդ Թոփչյանի խմբավարությամբ։

Լուսանկարները՝ Աքսաննա Ոսկանյանի