«Եթե վաղը սահմանները կրկին բացվեն, մեր ապրանքն այդ շուկայում տեղ չի ունենալու». «Փաստ»

«Փաստ» օրաթերթը գրում է.

Պետական բարձրագույն պաշտոններ զբաղեցնող անձանց հիմնական խնդիրը սեփական պաշտոններից կառչած լինելն է: Խոսելով ներկայիս կառավարման համակարգի և իշխող էլիտայի վարքագծի մասին՝ «Փաստ» թերթի հետ զրույցում այսպիսի կարծիք է հայտնում «Համահայկական ճակատ» շարժման առաջնորդ, գեներալ-մայոր Արշակ Կարապետյանը: Նա նշում է, որ իրավիճակի նման զարգացումը պայմանավորվում է նրանով, որ ով ստանձնում է երկրի ղեկը, ժամանակի ընթացքում այնքան է խրվում այդ աթոռի մեջ և այնքան շահեր ձևավորում, որ հետագայում նրան հեռացնելը դառնում է ծայրահեղ բարդ առաքելություն:

Շարժման առաջնորդը վստահություն հայտնեց, որ ստեղծված իրավիճակից միակ տրամաբանական ելքը ղեկավարության ամբողջական փոփոխությունն է, քանի որ վերջին ութ տարվա ընթացքում հնարավոր դրական ռեսուրսն արդեն սպառվել է: Ըստ նրա, մի քանի տեղ ասֆալտ փռելով՝ հնարավոր չէ երկար ժամանակով կոծկել խորքային ձախողումները, հատկապես, երբ հասարակությունն առաջիկայում անմիջականորեն զգալու է տնտեսական խորացող խնդիրների հետևանքները:

'Անդրադառնալով Հայաստանի արտաքին տնտեսական վեկտորի փոփոխությանն ու ավանդական շուկաների կորստի խնդրին՝ գեներալ-մայորը հիշեցրեց Ռուսաստանի շուկայի աստիճանական փակման վտանգի մասին, որը շուրջ 300 տարի եղել է հայկական արտադրանքի հիմնական սպառման վայրը: Նա հստակեցրեց, որ սա սոսկ սահմանային անցակետերի խնդիր չէ, այլ ռազմավարական կորուստ. նույնիսկ եթե վաղը սահմանները բացվեն, հայկական ապրանքն այդ շուկայում այլևս տեղ չի ունենալու:

Իրավիճակը համեմատելով կենցաղային օրինակի հետ՝ մեր զրուցակիցը նշեց, որ դա նման է սեփական լոլիկը վերցնելուն ու Կոմիտասի շուկա վաճառելու գնալուն, որտեղ, չնայած օրենքի արգելքի բացակայությանը, ներքին կանոններն ու իրականությունն այնպիսին են, որ պարզապես թույլ չեն տա ազատ առևտուր անել: Նրա պնդմամբ, նույն մեխանիզմն է աշխատում նաև պետությունների մակարդակում, և գործող իշխանությունների անգրագետ քաղաքականության, ինչպես նաև եվրոպական շուկայում ծաղիկներ վաճառելու մակերեսային պատկերացումների պատճառով պետությունը գնում է դեպի տնտեսական կոլապս:

Ինչ վերաբերում է հանրության կողմից հնչող կոչերին և իր հետագա անելիքներին, Արշակ Կարապետյանը հայտնեց, որ թեև իրենից անհապաղ ու կտրուկ քայլեր են պահանջում, ցանկացած լուրջ քաղաքական գործընթաց պետք է ունենա ժողովրդական հստակ մանդատ և իրավական հիմքեր: Այդ իսկ պատճառով «Համահայկական ճակատ» շարժման անդամներն այս օրերին Օպերայի հարակից տարածքում ստորագրահավաք են իրականացնում՝ անցած ընտրությունների արդյունքներն անվավեր ճանաչելու պահանջով, ինչը, ըստ նրա, կլինի այն փաստացի հիմքը, որը կվկայի հասարակության կողմից խաբված լինելու փաստի գիտակցումը:

Ըստ Արշակ Կարապետյանի, իրադարձությունների նման զարգացման դեպքում երկիրը կանգնած է կործանման եզրին: Նրա պնդմամբ, տարածաշրջանի չորս հարևանները, գերպետությունների անմիջական ղեկավարությամբ ու թողտվությամբ, արդեն իսկ քարտեզի վրա մեր երկիրը տորթի նման կտրտում են, և այդ աշխարհաքաղաքական բաժանման մեջ Հայաստանի շահերը պարզապես գոյություն չունեն:

Մանրամասները՝ «Փաստ» օրաթերթի այսօրվա համարում