Շատ կարևոր երեկո՝ Քրիստինեի, Միհրանի, Արամեի և Մհերի համար

Blognews.am-ը գրում է.

Երևանի համերգասրահների հետնաբեմերում վաղուց դեռահասների հերթ չէր գոյացել՝ հայ երգիչ-երգչուհիների հետ նկարվելու համար. Արամ Խաչատրյան համերգասրահում երեկ կայացավ Քրիստինե Պեպելյանի, Միհրան Ծառուկյանի, Արամեի և Մհերի համերգը։ Երեկոն վարում էին Ստեփան Ղամբարյանն ու Անի Ամիրյանը։ BlogNews-ը հետևել է համերգի ընթացքին ինչպես հետնաբեմից, այնպես էլ դահլիճից։

Համերգի բացումն արեց Մհերը, եզրափակեց Միհրանը։ Մասնակիցներից յուրաքանչյուրը 4-ական երգ ներկայացրեց իր հանդիսատեսին։ Մեզ հետ զրույցում բոլորը միաբերան նշում էին, որ շատ են կարևորում նմանատիպ երեկոները։

Քրիստինե Պեպելյանը մոտ 3 տարի առաջ ունեցած մենահամերգից հետո առաջին անգամ էր Երևանում համերգասրահում ելույթ ունենում։ «Ինձ համար սա շատ հաճելի հանդիպում էր։ Տղաներն ու ես հումորով ասում էինք, որ այս համերգի առանձնահատկությունն այն է, որ միակ երգչուհին ես եմ:)»,- ասաց Քրիստինեն ու հավելեց, որ ի սկզբանե իրեն առաջարկել են մենահամերգ ունենալ, սակայն զբաղվածության պատճառով հրաժարվել է, արդյունքում՝ կազմակերպիչների հետ որոշել են հավաքական համերգ անել։

 «Հիմա Հայաստանում շատ քիչ են համերգներ կազամակերպվում և եթե համերգասրահում ներկայանալու հնարավորություն է լինում, շատ եմ ուրախանում։ Այս առաջարկը դիտարկել եմ ոչ թե շահավետության, այլ հանդիսատեսին հանդիպելու հանարավորության տեսանկյունից»,- նշեց Մհերը։

Արամեն ևս նշեց, որ մի քանի տարվա դադարից հետո է ելույթ ունենում Երևանում։ «Այս համերգը շատ լավ խորհուրդ ունի, մենահամերգներով մենք այդքան  չենք կարող հագեցնել հանդիսատեսին։ Նամանատիպ համերգներ պարբերաբար պետք է կազմակերպվեն, քանի որ երգչի համար կարևոր է շփվել իր հանդիսատեսի հետ, հասկանալ՝ ինչպես են ընդունվում նոր երգերը։ Մենք ամեն ինչ թողել ենք, անցել յութուբյան դիտումների, ինչը լավ չէ, չկան էմոցիաներ»,- ասաց երգիչը։

Միհրանն էլ անդրադարձավ վերջին շրջանում համերգների բացակայությանը. «Կարծես թե, արդեն ինչ-որ փոփոխություն, շարժ կա։ Շատ ուրախ եմ դրա համար։ Ինձ թվում է՝ հանդիսատեսն էլ շատ մեծ հաճույքով է եկել։ Երկար ժամանակ է՝ հանդիպում չէի ունեցել Հայաստանի հանդիսատեսի հետ։ Շատ կարոտել էի էս ջերմությունը։ Շատ լավ տպավորություններ ունեմ։ Երբ մի գործ ես անում, որից բավարարված ես լինում, շատ հաճելի է։ Հիմա էդպիսի զգացողություն ունեմ»։

Հանդիսավար Անի Ամիրյանն ամուսնությունից հետո ստեղծագործական դադարի մեջ է։ Մեզ հետ զրույցում Անին նշեց, որ բեմին ընդմիշտ հրաժեշտ չի տվել, պարզապես ավելի պասիվ է։ «Այս ասպարեզում վաղուց համերգ չեմ տեսել, ցանկացա իմ լուման ունենալ այս  համերգի կայացման հարցում։ Նպաստող հանգամանք էր նաև այն, որ համերգը վարում էի ամուսնուս հետ։ Շատ լավ գործընկեր է:) Երևի այն պատճառով, որ ինձ շատ է սիրում ու ամեն բան անում է, որ ինձ հարմարավետ զգամ։ Երևի միայն իր ու եղբորս՝ Արտավազդի հետ կհամաձայնեմ համերգ վարել»,- նշեց Անին։

                 

Նյութը՝ Ամալյա Հովհաննիսյանի