Գեներալի անունը կրող «թույլ տաբատը», որ դարձավ կանանց զգեստապահարանի մաս. «Փաստ»

«Փաստ» օրաթերթը գրում է.

Գալիֆեն (ֆրանսերեն՝ Galliffet) տաբատ է, որը կիպ գրկում է սրունքները և զգալի լայնանում է ազդրերի հատվածում: Ընդ որում, միայն մի քանի երկրում, այդ թվում՝ Հայաստանում են այդ տաբատները կոչվում գեներալ Գալիֆեի անունով։ Օրինակ՝ Ֆրանսերենում դրանք պարզապես կոչվում են culotte bouffante (թույլ կամ թուլացած տաբատ):

Նորաձևությունը քմահաճ տիկին է, և քչերը կարող են գուշակել, թե ինչ միտումներ կգերակայեն, ասենք, կանացի վերնազգեստի կամ ծովափնյա զգեստների նորաձևությունում մեկ-երկու տարի հետո: Թե՛ հին ժամանակներում, թե՛ այսօր զինվորական համազգեստը ևս ենթարկվում է նորաձևությանը: Օրինակ՝ ռուսական բանակի, ինչպես նաև 18-19-րդ դարերի եվրոպական բանակների սպաների արտահագուստը շատ թանկարժեք էր: Սովորաբար բարձրորակ կաշվից կարված սպիտակ լասինաները, տունիկաներն ու մենտիկները ասեղնագործվում էին աքսելբանտներով, հյուսերով, բրենդենբուրներով և այլ զարդանախշերով: Եվ դա՝ մինչև 20-րդ դարը: Հենց այդ դարից զինվորական համազգեստի դիզայներներն անցան բանակի սպաների և շարքայինների համար շատ պարզեցված համազգեստի ստեղծմանը: Շատ տասնամյակներ ռուսական, իսկ հետո՝ խորհրդային բանակում սպաներն սկսեցին հագնել գալիֆե տաբատ, որն ամենևին էլ չէր սահմանափակում շարժումները և միաժամանակ ներքևի հատվածում նեղ էր, ինչը հեշտացնում էր ճտքավոր կոշիկ հագնելը։ Համազգեստի մաս կազմող այդ գալիֆեները կարվում էին նաև շարքային կազմի համար, բայց դրանց լայնությունը ազդրերի շրջանում մեծ չէր, գործվածքն էլ լավագույնը չէր, ուստի դրանք չունեին այնպիսի պաշտոնական տեսք, որքան սպաների համար կարվածը:

Գալիֆեի մոդելի ստեղծման հարցում կան լեգենդներ։ Դրանցից մեկի համաձայն, դա ֆրանսիացի հեծելազորային գեներալ Գաստոն Օգյուստ Գալիֆեի ստեղծագործությունն էր, որըվիրավորվել էր ֆրանս-պրուսական պատերազմում (1870 - 1871 թթ.) և աշխարհիկ միջավայր դուրս չէր գալիս ազդրի ծռության պատճառով։ Նրա կազմվածքը տգեղ տեսք ուներ, երբ կիպ տաբատ էր հագնում։ Եվ երբ այնպես պատահեց, որ նա չկարողացավ մերժել պարահանդեսին մասնակցելու հրավերը, նա ինքը ձևավորեց և կարեց այնպիսի տաբատ, որը թաքցնում էր իր կազմվածքի թերությունը։ Բայց սա ընդամենը պատմական լեգենդ է։ Իրականում, այդ գաղափարը շատ ավելի գործնական պատճառ ուներ, քան սոսկ անձնական: Այո, իրոք Գալիֆեն է եղել այն գաղափարի հեղինակը, որ հեծելազորին պետք է հագցնել այնպիսի տաբատներ, որոնք չեն խանգարի ձիու վրա նստելն ու ձիավարելը, ինչպես նաև հնարավոր կլինի հագնել բարձրաճիտք հեծելազորային կոշիկներ: Բայց նա դա արել է առաջին հերթին իր հրամանատարության ներքո Մեքսիկա ուղարկված ստորաբաժանումների համար: Ի վերջո, շոգ կլիմայական պայմաններում նման տաբատները ավելի գործնական էին, քանի որ նման տաբատով հեծյալը ավելի քիչ էր քրտնում և ավելի ազատ էր ձիավարում: Հետո ամբողջ բանակի հեծելազորին հագցրեցին գալիֆեներ։ Գեներալի արժանիքն անմահացել է նրանով, որ այդ տաբատը կոչվել է նրա անունով։

Ներկայում գալիֆեները կանացի զգեստապահարանի ատրիբուտներից են, և նրանք այսօր վերադառնում են պոդիումներ, չնայած այնպես չէ, որ տղամարդիկ չեն օգտվում դրանցից։ Այսօր այդ տեսակի տաբատները արդյունավետ կերպով լրացնում են ողջ աշխարհի ոճային նորաձևության զգեստապահարանները։

ԿԱՄՈ ԽԱՉԻԿՅԱՆ 

Մանրամասները՝ «Փաստ» օրաթերթի այսօրվա համարում