Գիրք նվիրելու օրվա կապակցությամբ Արարատի մարզից գրականություն ուղարկվեց սահմանամերձ գյուղեր

Գիրք նվիրելու օրվա կապակցությամբ, փետրվարի 19-ին` հայ մեծանուն բանաստեղծ Հովհաննես Թումանյանի ծննդյան օրը, մեծածավալ նախաձեռնությամբ էր հանդես եկել Օհան Չուբարյանի անվան Արարատի մարզային գրադարանը: «Դարձիր գրադարանի բարեկամը» կարգախոսով տոնի շրջանակներում, գրադարանի  աշխատողները 96 անուն գրականություն նվիրեցին մարզի գրադարանին: Իսկ  վերոհիշյալ գրքերը կհարստացնեն Տավուշի մարզի Ոսկեպար, Կողբ, Մովսես սահմանամերձ համայնքների գրադարանները:

Բացի այդ, մարզային գրադարանի ֆոնդից, օրվա շրջանակներում, 140 անուն դասական եւ ժամանակակից ստեղծագործողների գրքերը հանձնվեցին Հայաստանի ազգային գրադարանի գրափոխանակման բաժին: Այդ գրքերը եւս կառաքվեն այն սահմանամերձ համայնքները, որոնք ունեն դրանց կարիքը: 

«Արմենպրես»-ի թղթակցի հետ զրույցում Արտաշատի Օհան Չուբարյանի անվան Արարատի մարզային գրադարանի տնօրեն Յուրի Պետրոսյանը կարեւորելով օրվա խորհրդի շրջանակներում կազմակերպված նախաձեռնություններն, ընդգծեց. «Եթե կարողանում ենք նման ձեւով գրավել մեկ ընթերցողի, կամ մեկ երիտասարդի մեջ սեր արթնացնել դեպի գիրը, գրականությունն ու գրադարանը, ապա կարելի է ասել, որ կազմակերպված միջոցառումը ծառայեց իր նպատակին»: Անդրադառնալով գիրք նվիրելու ավանադույթին` գրադարանի տնօրենն ընդգծեց նաեւ, որ գիրք նվիրելու տոնը բազմախորհուրդ է. այն մեզ հիշեցնում է այն մասին, որ պետք է ճանաչենք եւ գնահատենք գրքի արժեքը: «Եթե ոչ հաճախ, ապա տարվա մեջ գոնե մեկ օր գիրք նվիրենք մեր մտերիմներին, հարազատներին ու ընկերներին` դրանով իսկ մեր մեջ արթուն պահենք ընթերցողին»,-ավելացրեց Պետրոսյանը:

Յուրօրինակ նշեցին գրքի տոնը Արտաշատի Հովհաննես Թումանյանի անվան դպրոցի աշակերտները: Տնօրեն Նաիրա Նիկողոսյանի գլխավորությամբ նրանք այցելեցին N զորամաս` իրենց հետ տանելով շուրջ 140 անուն գրականություն: Բարձր դասարանցիները Թումանյանի ծննդյան օրը եւ գրքի տոնը համեմեցին իրենց ասմունքով ու բանաստեղծությունների ընթերցմամբ: Միջին դասարանցիները զինվորներին հեքիաթների գրքեր նվիրելուց բացի հանդես եկան «Անխելք մարդը», «Փեփուշը», «Ոսկու կարասը» հեքիաթների բեմականացմամբ:

Օրվա կապակցությամբ հետաքրքիր նախաձեռնությամբ էր հանդես եկել նաեւ Արտաշատի «Մանկան մոլորակ» տիկնիկային թատրոնը: Անձնակազմը` տնօրեն Քաջիկ Ավետիսյանի գլխավորությամբ հյուրախաղերով այցելեց սահմանամերձ գյուղեր, բեմականացրեց Թումանյանի ստեղծագործություններից:

Հայաստանում փետրվարի 19-ը` Հովհաննես Թումանյանի ծննդյան օրը նշվում է որպես Գիրք նվիրելու օր` ՀՀ Գրողների միության նախկին նախագահ, երջանկահիշատակ Լեւոն Անանյանի նախաձեռնությամբ: Այն նպատակ ունի քաղաքացիների, հատկապես` երիտասարդներին մեջ սեր արթնացնել ընթերցանության ու գրքի նկատմամբ` դարձնելով գրադարանի լավագույն բարեկամը:

Լիլիթ Մաճկալյան