Փաշինյանն այցելել է Վեդիի ջրամբար և Արարատի մարզի մի քանի բնակավայրերում ծանոթացել իրականացվող ծրագրերի ընթացքին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին 

Փաշինյանն այցելել է Վեդիի ջրամբար և Արարատի մարզի մի քանի բնակավայրերում ծանոթացել իրականացվող ծրագրերի ընթացքին: Այս մասին տեղեկացնում են Կառավարությունից:

Մարզային այցի շրջանակում երկրի ղեկավարը նախ այցելել է Վեդիի նորակառույց ջրամբար: Ծրագրի ընդհանուր արժեքը կազմել է 90 մլն եվրո։ Պատասխանատուները նշել են, որ ջրամբարի ընդհանուր ծավալը 29 մլն մ3 է։ Ծրագրի իրականացման արդյունքում կապահովվի Արարատյան դաշտավայրի 11 բնակավայրերի շուրջ 3220 հա հողերի անխափան և հուսալի ոռոգումը, մեխանիկական ոռոգումից անցում կկատարվի ինքնահոս ոռոգման, արդյունքում՝ տարեկան կտնտեսվի շուրջ 19․0 մլն. կվտ/ժամ էլեկտրաէներգիա։ Միաժամանակ, ոռոգման ցանցի կորուստները կկրճատվեն 20-25%-ով, փորձնական տարածքներում ներտնտեսային ոռոգման ցանցի կառուցման շնորհիվ հնարավոր կլինի նոր տեխնոլոգիաների (կաթիլային ոռոգում) կիրառումը։ Ծրագիրն իրականացվել է Կառավարության և Զարգացման ֆրանսիական գործակալության ֆինանսավորմամբ:

Հաջորդիվ Ջրային կոմիտեի պատասխանատուները ներկայացրել են հանրապետությունում այլ ջրամբարների կառուցման ուղղությամբ իրականացվող աշխատանքները։ 

Հաջորդիվ Դաշտաքար բնակավայրում վարչապետը հանդիպում է ունեցել տեղի բնակիչների հետ, անդրադարձել գյուղատնտեսության ոլորտում ժամանակակից տեխնոլոգիաների ներդրմանը, Կառավարության ծրագրերին։ Բնակիչները բարձրացրել են բնակավայրի դպրոցի շենքի վթարային լինելու խնդիրը, ինչի առնչությամբ վարչապետը նշել է, որ դպրոցների կառուցման և հիմնանորոգման հարցը Կառավարության ուշադրության կենտրոնում է և այս դեպքում էլ ևս խնդիրը կլուծվի։   

Նիկոլ Փաշինյանի հաջորդ կանգառը եղել է Գոռավանում, որտեղ ներկայացվել է  բնակավայրի նախադպրոցական հաստատության կառուցման ընթացքը: Սուբվենցիոն ծրագրի ընդհանուր արժեքը կազմում է 291 մլն դրամ, որի 80%  կամ շուրջ 232 մլն 960 հազար դրամը հատկացվել է պետական բյուջեից: Նախատեսվում է 2500 քմ  տարածքի վրա կառուցել  1105 քմ  մակերեսով մանկապարտեզի շենք՝ 90 տեղ հզորությամբ։ 

Այնուհետև վարչապետը զրուցել է բնակիչների հետ՝ ծանոթացել առկա խնդիրներին և անդրադարձել դրանց լուծման ուղղությամբ իրականացվող քայլերին։ 

Հաջորդիվ՝ Նիկոլ Փաշինյանն այցելել է Եղեգնավան բնակավայր, որտեղ ներկայացվել է բնակավայրի նախադպրոցական հաստատության կառուցման ընթացքը: Հրատապ ծրագրով իրականացվող աշխատանքների ընդհանուր արժեքը կազմում է շուրջ 310 մլն դրամ: Ծրագիրն ամբողջությամբ իրականացվում է ՀՀ պետական բյուջեի միջոցներով։ Նախատեսվում է 2730 քմ  տարածքի վրա կառուցել  է 1105 քմ  մակերեսով մանկապարտեզի շենք՝ 90 տեղ հզորությամբ։

Այցի ընթացքում վարչապետը հարգանքի տուրք է մատուցել հանուն հայրենիքի կյանքը նվիրաբերած հերոսների հիշատակին։

Հետևեք մեզ՝ այստեղ