Նոր կանոններ չափիչ սարքերի համար․ ինչ է փոխվում քաղաքացիների և բիզնեսի համար

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իրավական ակտերի նախագծերի հրապարակման միասնական e-draft.am հարթակում հանրային քննարկման է ներկայացվել ՀՀ էկոնոմիկայի նախարարի հրամանի նախագիծ, որով առաջարկվում է սահմանել Հայաստանում կիրառվող չափման միջոցների ստուգաչափման պարբերականությունը։

Նախագծի ուսումնասիրությունից պարզ է դառնում, որ խոսքը վերաբերում է այն չափիչ սարքավորումներին, որոնք կիրառվում են օրենսդրական չափագիտության ոլորտում։ Նպատակն է ապահովել դրանց չափումների ճշգրտությունը, հուսալիությունն ու վերահսկողությունը՝ սահմանելով ստուգաչափման միասնական ժամկետներ։

Past.am-ի տեղեկություններով՝ Էկոնոմիկայի նախարարությունում նշում են, որ նախաձեռնության անհրաժեշտությունը պայմանավորված է «Չափումների միասնականության ապահովման մասին» օրենքում 2025 թվականի վերջին կատարված փոփոխություններով։ Դրանց արդյունքում առաջացել է գործող ենթաօրենսդրական ակտերը նոր իրավական պահանջներին համապատասխանեցնելու անհրաժեշտություն։

Գործող օրենսդրությամբ Էկոնոմիկայի նախարարությունը հանդիսանում է չափումների միասնականության ապահովման ոլորտի լիազոր մարմինը։ Օրենքում կատարված փոփոխություններից հետո հենց նախարարությունն է ստանձնել չափման միջոցների ստուգաչափման պարբերականությունը սահմանելու լիազորությունը, մինչդեռ նախկինում այն որոշվում էր չափման միջոցի տեսակի հաստատման ընթացքում՝ Չափագիտության ազգային մարմնի կողմից։

Նախագծի հիմնական նպատակը օրենսդրական չափագիտության ոլորտում օգտագործվող բոլոր չափման միջոցների համար հստակ ստուգաչափման պարբերականություն սահմանելն է։ Այդ գործընթացում հաշվի են առնվել սարքավորումների կիրառման առանձնահատկությունները, չափումների ճշգրտության նկատմամբ գործող պահանջները, ինչպես նաև Եվրոպական միության և Եվրասիական տնտեսական միության անդամ երկրների փորձը։

Փաստաթուղթը մշակվել է ՀՀ էկոնոմիկայի նախարարության և Չափագիտության ազգային մարմնի համատեղ աշխատանքի արդյունքում։

Նախագծի ընդունման դեպքում իրավական կարգավորումները կհամապատասխանեն օրենքում կատարված փոփոխություններին, ինչպես նաև կհստակեցվեն օրենսդրական չափագիտության ոլորտում կիրառվող բոլոր չափման միջոցների ստուգաչափման ժամկետները։

Միաժամանակ նշվում է, որ առաջարկվող փոփոխությունները պետական կամ համայնքային բյուջեների վրա էական ֆինանսական ազդեցություն չեն ունենա, – տեղեկացնում է Past.am-ը:

Նախաձեռնությունը բխում է նաև ՀՀ կառավարության ծրագրից, որով որպես առաջնահերթ ուղղություն նախատեսվել է որակի ենթակառուցվածքների և չափագիտության համակարգի զարգացումը՝ համապատասխան օրենսդրական բարեփոխումների իրականացմամբ։

Հետևեք մեզ՝ այստեղ