Հոլանդիա-Հայաստան բարեգործական ակցիա՝ անապահով ընտանիքների երեխաների համար

Past.am-ը տեղեկացնում է, որ օրերս «Ռոսիա Մոլլ» նորաբաց մանկական սրճարանում տեղի ունեցավ հոլանդահայ նորաստեղծ «Bright Future» կամավորական խմբի կողմից կազմակերպված Հոլանդիա-Հայաստան բարեգործական ակցիան: Այն նվիրված էր մեր երկրի անապահով ընտանիքների երեխաներին: Ակցիայի անցկացման նպատակով Հոլանդիայից Հայաստան էր ժամանել խմբի հիմնադիր-ղեկավար Մարիամ Կիրակոսյանը: Վերջինս երեխաների համար բերել էր անհրաժեշտ նվերներ՝ հագուստ և խաղալիքներ: Մարիամ Կիրակոսյանն ասաց, որ այդ ամենի հավաքման գործում իրենց օգնությունն են ունեցել նաև Եվրոպայում բնակվող տարբեր ազգությունների մարդիկ և կազմակերպություններ: «Bright Future»-ի կամավորներն ավելի քան 2 ամիս Հոլանդիայից և Հայաստանից իրականացրել են կազմակերպչական տարաբնույթ աշխատանքներ, փնտրել աջակիցներ:

Մանկական սրճարանի այցելուները ներկա գտնվեցին ուրախ շոու-ծրագրի, որի ժամանակ անապահով ընտանիքների շուրջ 50 երեխա երգեցին, պարեցին, անվճար օգտվեցին մանկական ատրակցիոններից, վայելեցին երիտասարդ երգչուհի Քրիստինա Սահակյանի կատարումները։ Միջոցառման ավարտին հայաստանաբնակ 28 անապահով ընտանիքի հանձնվել են Հոլանդիայից Հայաստան բերված օգնությունը:

«Այսօր մենք ականատեսը եղանք, թե ինչպես ընկճված ու տխուր դեմքով փոքրիկները կարճ ժամանակ անց վերափոխվեցին, ակտիվացան, խաղացին, պարեցին ու ուրախացան։ Մեծ երջանկություն է նրանց աչքերում կրկին տեսնել սոցիալական խնդիրների պատճառով խավարած փայլը, որը վերգտնելու համար այնքան էլ շատ բան անհրաժեշտ չէ անել: Մենք այսօր համոզվեցինք, որ ուղղակի պարտավոր ենք շարունակական դարձնել նմանօրինակ ուրախ միջոցառումները՝ անհոգ ժամերը սոցիալապես անապահով հրաշք հայ մանուկների կյանքում հաճախակի դարձնելու նպատակով»,- նշեց «Bright Future» հայ-հոլանդական բարեգործական կամավորական խմբի ղեկավար Մարիամ Կիրակոսյանը և հավելեց, որ իրենց թիմը «Գլաձոր» համալսարանի և «ԻմիջԱրթՍտուդիո» արվեստի ստուդիայի հետ համատեղ այժմ սկսում են ուսումնական և կրթական բարեգործական ծրագրերի մշակումը, որպեսզի կարողանան ուսումնական մոտիվացված ծրագրեր կազմակերպել մեր հայ անապահով երեխաների համար։ Այս միջոցառման ընթացքում նկարահանվեց փոքրիկ ֆիլմ, որը շուտով հասանելի կլինի համացանցում:

Լևոն Փանոսյան